Leta Blong Hed Kampani
Ol Brata Mo Sista:
Papa blong yumi long heven, Jehova, hem i nambawan eksampol blong fasin ya blong lavem man. Taswe, Baebol i talem se: “God [hem] i lav.” (1 Jon 4:8, NW) Jehova i gat olgeta paoa, be Baebol i no talem se, “God [hem] i paoa.” Taem hem i rul long ol man, hem i soemaot lav long evri samting we hem i mekem. !Hemia i pulum yumi i kam klosap long hem!
Yumi glad se Jehova i no fosem yumi blong mekem wok blong hem. Hem i no mekem i strong tumas long yumi blong yumi obei. Hem i wantem se yumi mekem wok blong hem from we yumi lavem hem long fulhat blong yumi. Taem yumi mekem olsem, yumi soemaot we yumi wantem se hem i rul long yumi. Yumi bilif se hem nomo i naf blong rulum ol man long stret fasin mo lav. Yumi luk samting ya, stat long taem blong Adam mo Iv.
Jehova i no fosem Adam mo Iv blong tufala i obei long hem. Hem i letem tufala i jus. Sipos tufala i lavem Jehova mo tufala i tinghae long ol samting we Jehova i mekem long tufala, bambae tufala i no lesin long Setan taem hem i pulum tufala blong agensem Jehova.
Moses i toktok laswan long neson blong Isrel, i se: “Yufala nomo i jusumaot se yufala i wantem folem ol gudfala fasin, no yufala i wantem folem ol fasin we i nogud. Yufala i mas jusumaot se yufala i wantem laef, no yufala i wantem ded.” (Dut. 30:15) Oli fri blong jusum wanem we oli wantem mekem long laef blong olgeta. Josua tu i talem long ol man Isrel se: “Sipos yufala i no wantem biaen long [Jehova], be naoia yufala i mas jusumaot wanem god we yufala i wantem.” Olgeta oli ansa se: ‘Jehova i God blong yumi, mo bambae mifala i no save lego hem.’ (Jos. 24:15, 16) Yumi tu yumi tingting olsem. Yumi lavem Jehova, taswe yumi no save lego hem.
Long kongregesen, yumi luk fasin ya we yumi fri blong jus. Baebol i talem se ol elda oli mas givim advaes mo stretem man, be oli no traem bos long laef mo bilif blong narafala. Aposol Pol i raetem se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, nogat. Bilif blong yufala i stanap finis. Mifala i wantem wok wetem yufala, blong mekem yufala i harem gud moa.”—2 Kor. 1:24.
Taem yumi wantem mekem samting, yumi harem gud blong mekem. !Be yumi harem nogud taem man i fosem yumi! Jehova i askem long yumi blong yumi mekem samting we i stret. Be yumi mas mekem olsem from we yumi lavem hem. Ol tok we tabu spirit i pulum Pol blong raetem i soemaot samting ya, i se: “Sipos mi givimaot olting blong mi i go nating nomo long ol puaman, mo mi letem ol enemi blong mi oli bonem mi long faea from we mi man blong Kraes, be mi no lavem man, bambae mi no winim wan samting nating.”—1 Kor. 13:3.
!Taem plante milian brata mo sista oli mekem wok blong Jehova from we oli lavem hem long fulhat blong olgeta, oli leftemap nem blong Jehova mo oli mekem hem i glad tumas!
From samting ya, Jehova i lavem ol man blong hem. Mo hem i lavem ol pikinini mo ol yangfala tu we oli lavem hem, i winim we oli lavem wol ya mo ol samting we oli save harem gud long hem. Yufala i mas save se mifala long hed kampani, mifala tu i lavem yufala tumas.—Luk 12:42, 43.
Las yia, yufala ol brata mo sista mo ol yangfala, yufala i spenem 1,748,697,447 aoa blong talemaot gud nius, from we yufala i lavem Jehova. Mo lav ya i pulum 7,782,346 man blong oli joen long wok blong prij. Yumi glad tumas se 268,777 niuwan, we plante long olgeta oli yangfala, oli givim laef blong olgeta i go long Jehova mo oli baptaes. Hemia i min se evri wik i gat 5,168 we oli baptaes. !Yumi glad we yumi glad tumas long samting ya!
Long taem blong en ya, ol man blong God oli gat plante trabol blong winim. Laef i had, ol man oli agensem olgeta, plante oli sik no oli olfala. Be yumi gat strong tingting se yumi no save “tanemraon blong gobak” mo yumi no save “lego.” Mifala i lavem yufala tumas.—Hib. 10:39; 2 Kor. 4:16.
Ol brata blong yufala,
Hed Kampani Blong Ol Witnes Blong Jehova