?Yu Yu Save?
?From wanem Jehova i letem ol man Isrel oli givim ol sotleg mo pijin olsem ofring?
FOLEM Loa, ol man Isrel oli save givim ol sotleg mo pijin i go long Jehova olsem ofring. Taem Baebol i tokbaot loa long saed blong sakrefaes, oltaem hem i tokbaot tufala pijin ya tugeta, mo oli save yusum wan, sipos narawan i no gat. (Lev. 1:14; 12:8; 14:30) ?From wanem hemia i gud? Wan risen hemia se i no oltaem we i gat ol sotleg. ?From wanem?
Sotleg
Ol sotleg oli laef long Isrel long hot taem nomo. Evri yia long manis Oktoba oli stap flae i go long saot blong ol kantri we i hot, mo oli kambak long Isrel long taem we ol tri oli putum flaoa. (Sing. 2:11, 12; Jer. 8:7) Hemia i min se long Isrel bifo, i had blong ol man Isrel oli givim sotleg olsem sakrefaes long koltaem.
Pijin ya Rock Pigeon
Be ol pijin, oli no stap flae i go long narafala ples, oli stap oltaem long Isrel. Antap moa, ol pijin oli no wael mo oli stap raon nomo long haos. (Skelem wetem Jon 2:14, 16.) Buk ya Bible Plants and Animals i talem se: “Long evri vilej mo ol taon blong Palestaen, i gat ol pijin. Klosap evri haos oli wokem ol smol haos o hol long wol blong haos blong olgeta, blong ol pijin oli save laef long hem.”—Skelem wetem Aesea 60:8.
Pijin long hol blong haos
Jehova i soemaot se hem i gat lav mo i no mekem i strong long olgeta, taem hem i letem ol man Isrel oli givim eni pijin we oli gat.