Bodi Blong Bitel Ya Diabolical Ironclad

Long wes saed blong Not Amerika, i gat wan kaen bitel we oli singaotem se diabolical ironclad (Phloeodes diabolicus). Ol man blong mekem risej oli faenemaot se bodi blong bitel ya i strong we i strong. Taswe bitel ya i no save ded taem wan hevi samting olsem wan trak i ron antap long hem. ?Wanem i mekem se bodi blong bitel ya i strong?

Long tufala saed blong bodi blong bitel ya i gat ol defdefren kaen joen. I gat wan joen we i strong mo i no save ben, mo hemia i protektem ol impoten haf blong bodi blong hem olsem ol gat blong hem. Wan narafala joen i no strong tumas mo i save ben. Mo i gat wan narafala joen bakegen we i mekem se bodi blong bitel ya i save kam flat. Hemia i mekem se hem i naf blong skwisim hem i go insaed long wan wud o haed long ol smosmol hol long ston.

Mo tu, long medel blong baksaed blong bitel ya i gat wan spesel joen we i joen tugeta olsem gem ya pasel. Haf ya we i joen tugeta olsem pasel, oli singaotem se ol blade. Insaed long ol blade ya i gat ol laen, mo bitwin ol laen ya i gat ol protin we oli wok olsem wan glu blong mekem se ol laen ya oli fasgud tugeta. Be taem wan hevi samting i foldaon antap long baksaed blong bitel ya, ol laen ya oli no moa fas tugeta. Hemia i mekem se ol blade oli save muv olsem lastik, be oli no kamaot fulwan long spesel joen ya. Biaen, ol protin oli mekem se ol laen ya oli fasgud tugeta bakegen.

Ol man blong mekem risej oli sapraes long fasin ya we bitel ya i no save ded, nating se wan hevi samting i foldaon o ron antap long hem. Mo oli talem se hemia i save givhan long ol man blong wokem ol haos, ol trak, ol brij, mo ol narafala samting olsem, long wan fasin we i sef moa.

?Wanem tingting blong yu? ?Bodi blong bitel ya diabolical ironclad i kamaot olsem nomo, o i gat wan Man we i wokem?