Baebol i Talem Wanem . . .
Ol Rabis Buk Mo Video Oli Save Spolem Man
BIFO, sipos man i wantem luk man mo woman oli mekem nogud long saed blong seks, hem i mas go long sam spesel ples. Be tede, man i save luk rabis fasin olsem long evri ples. Long plante kantri, ol magasin, nyuspepa, buk, televisin, sinima mo video oli soemaot rabis fasin long saed blong seks. ?Olsem wanem? ?Samting ya i save spolem man?
Ol rabis buk mo video oli soemaot “ol rabis fasin long saed blong seks, blong mekem man we i luk samting ya, hem i wantem tumas ol samting long saed blong seks.” Tok ya i klia nomo. ?Be wanem samting i mekem man i stat blong wantem tumas ol samting long saed blong seks? Ol man oli talem plante tingting long kwestin ya, be oli no agri tugeta. Long saed blong samfala buk mo video, olgeta man i no agri. Sam oli talem se ol video ya oli nogud, sam no gat. Hemia i min se sam buk no video i save mekem man i stat blong wantem tumas ol samting long saed blong seks, be buk ya no video ya oli no wok long narafala man. Be i gat sam narafala buk mo video we oli rabis moa. Olgeta oli save pulum kolosap evri man. Wan stadi we oli jes mekem long Jemani long 5,000 man i soemaot gud samting ya.
?Samting Ya i Rong?
I no waes blong wantem tumas wan gudfala samting we yu no gat raet blong kasem. Hemia nao wan eksampel. Yu yu laekem tumas wan kakae, be mane blong yu i no naf. Nao sipos yu lukluk pija blong kakae ya long ol buk mo magasin oltaem, samting ya i no save fulumap bel blong yu, mo yu no save harem gud. Mo tu, ating yu yu no save tekem kakae ya, from we dokta i no wantem. ?Be olsem wanem nao sipos yu yu stap tingbaot kakae ya oltaem? Maet bambae yu tekem kakae ya mo yu save kasem trabol long bodi blong yu. Long sem fasin, ating wan man i traem blong no moa smok. Be sipos oltaem hem i stap lukluk ol narafala man we oli smok, mo hem i wantem smok tumas, ale samting ya i save pulum hem blong smok bakegen.
Long saed blong seks, Baebol i talem se man i rili save harem gud sipos hem i slip wetem woman blong hem nomo, mo woman i rili save harem gud sipos hem i slip wetem man blong hem nomo. (1 Korin 7:2-5; Hibrus 13:4) Be ating wan man we i no mared i stap lukluk rabis fasin long saed blong seks blong harem gud. Samting ya i no waes from we afta, hem i wantem slip wetem woman tumas, be hem i no gat woman blong hem. Antap bakegen, man we i no mared mo i wantem harem gud long saed blong seks, bambae i save pleplei wetem samting blong hem. No maet bambae hem i save mekem nogud wetem woman nao hem i brekem loa blong God.—1 Tesalonaeka 4:3-7.
?Olsem wanem nao long man we i mared finis? ?I oraet we man olsem i lukluk ol rabis buk mo video? No gat. Olgeta we oli mared oli mas folem ol loa blong Baebol tu. Ol rabis buk mo video olsem oli mekem man i tingbaot hem nomo, mo oli pulum hem blong mekem ol samting we hem nomo i harem gud long ol. Be lav i defren. Yes, man we i laekem woman blong hem, i wantem mekem hem i harem gud. Hem i no tingbaot hem wan nomo. Ol rabis buk mo video i mekem man i no kea long woman blong hem mo woman i no kea long man blong hem. Oli tingbaot olgeta nomo. Mo insaed long mared tu, ol rabis buk mo kaset oli save pulum olgeta blong mekem samting blong sem, we i no gat lav long hem.—1 Korin 13:5.
Ol rabis buk mo video oli spolem mo oli daonem lav bitwin man mo woman. Oli tokbaot fasin blong slip wetem man mo woman long wan fasin we i doti from we oli givim rong mo rabis tingting long saed blong seks. Antap bakegen, man mo woman we oli mared, oli no mas tingbaot blong harem gud long seks nomo. No gat. Oli harem gud from we oli laeklaekem tufala, oli save tok fani samtaem, oli toktok tugeta, mo oli kea long tufala. Be ol rabis buk mo video oli save spolem mared blong tufala.
Ol anamol oli no save tingting, bodi blong olgeta nomo i bos long olgeta. Mo ol rabis buk mo video oli mekem man i sem mak. Ol rabis buk mo rabis video oli no leftemap fasin blong bos long tingting we i wan frut blong speret blong God. (Galesia 5:22, 23) Oli save pulum man blong mekem ol samting blong sem long saed blong seks. Ol risen ya oli soemaot from wanem ol Kristin oli no luk ol rabis buk mo rabis video nating.
Baebol i givim wan waes advaes. Hem i talem se: “Stap glad wetem waef blong yu we i mared long yu taem yu yang yet. . . . Pikinini blong mi, ?from wanem nao yu wantem harem gud tumas long wan narafala woman, wan we i olsem strenja, no yu wantem holem [wetem han, no long tingting wetem ol rabis buk mo video] titi blong wan woman afsaed?”—Proveb 5:15-20.
?Olsem wanem nao blong blokem ol rabis buk mo video? ?Mo sipos man i stap aninit long paoa blong olgeta finis, olsem wanem hem i save go fri long hem?
?OLSEM WANEM MAN I SAVE LEGO FASIN YA?
Blong no letem fasin ya i pulum yu, Baebol i talem se: “Yufala i mas kilimaot ol fasin ya blong yufala, [kilim i ded ol haf blong bodi blong yufala, NW] we oli blong laef ya long wol nomo. Hemia ol fasin olsem. Ol man oli stap mekem nogud wetem woman, ol man oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas.” (Kolosi 3:5) Long vas ya, tok ya “kilim i ded” i soemaot gud se man i mas tekemaot enikaen haf blong bodi blong hem we hem i save yusum blong mekem nogud. Hem i no talem se man i mas blokem olgeta nomo. No gat.
Be tok ya i no min se ol Kristin oli mas rili katemaot sam haf blong bodi blong olgeta. No gat. Vas ya i min se yumi mas “kilim i ded” ol tingting long saed blong seks we oli nogud. Sipos yumi mekem olsem, bambae yumi no save foldaon long trik blong ol rabis buk mo video. Olsem nao, bambae yumi no yusum ol haf blong bodi blong yumi olsem ae, long wan fasin we i rong. (Skelem wetem Matyu 5:29, 30.) From samting ya, Baebol i givim advaes ya se: “Ol fasin we oli stret, mo ol fasin we oli klin gud,” oli mas tekem ples blong ol rabis tingting. Nao ‘yumi mas putum tingting blong yumi i stap strong long olgeta.’—Filipae 4:8.
?Wanem samting bakegen oli save givhan long yu? Tingbaot—mo lanem tu baehat—sam vas blong Baebol olsem olgeta ya:
“Plis yu mekem we ae blong mi i no stap lukluk ol samting we oli nating nomo.”—Ol Sam 119:37, NW.
“From we ol samting blong wol oli olsemia: Man i wantem tumas ol samting we bodi blong hem i wantem, mo i wantem tumas ol samting we ae blong hem i luk . . . Be ol samting ya, oli no kamaot long Papa blong yumi, oli stap kamaot long wol ya nomo.—1 Jon 2:16, NW.
“Ol samting blong traem man oli save kam strong long hem taem hem i wantem ol samting nogud, nao fasin ya blong wantem ol samting nogud i kasem hem, i pulum hem i foldaon. Be taem hem i wantem tumas ol samting nogud, fasin ya bambae i kam bigfala moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigfala moa long hem, nao bambae man ya i ded from.”—Jemes 1:14, 15.
Olgeta samting we oli pulum man i go long ded, oli denja. !Ol rabis buk mo video oli olsem ya! Rimemba tok ya: “Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we i ded nomo. Be sipos hem i planem fasin we Tabu Speret i wantem, Tabu Speret bambae i givim kakae long hem, we i no save finis.” !Yu yu no mas letem ol rabis buk mo rabis video oli blokem yu blong kasem laef we i no save finis!—Galesia 6:8.
[Tok Blong Pija Long Pej 26]
Ol rabis buk mo video oli no mekem lav i strong moa bitwin wan man mo woman blong hem. Be oli daonem mo spolem lav blong olgeta