Ol Gudfala Han Blong Yumi

WAN yang man i singaot bigfala, hem i sakem hama blong hem i godaon mo hem i holemtaet fingga blong hem blong mekem se i no soa. Hem i wantem kilim nil, nao i mestem mo i kilim fingga blong hem—bakegen.

Long taem ya ating man ya we i traem blong mekem wok blong kapenta i save haremgud moa sipos hem i no gat bigfala fingga blong hem. Be bigfala fingga we i save “givim trabol” long yumi, hem i wan impoten haf blong samting we yumi stap yusum oltaem, we yumi wanwan i gat—hemia han blong man.

From we yumi savegud evri haf blong han blong yumi—ol fingga blong yumi we oli stap muf kwik, ol joen oli save muvmuf, ol string we oli mekem yumi save filim samting, mo ol narafala samting bakegen—taswe i isi blong no tinghae long olgeta. Kolosap evri wok we yumi mekem yumi mas yusum han blong yumi. Waes King Solomon i talem olsem se: “Olgeta samting we han blong yu i save mekem, i gud yu mekem wetem paoa blong yu.” (Eklesiastis 9:10) I stret we hem i yusum han olsem wan saen we i minim wok, from we han i wan gudfala tul we yumi gat.

Oli Gud Tumas

Ol fingga blong yumi, yumi save yusum blong kilim taepraeta long samting olsem wan handred wod long wan menet. Yumi save yusum olgeta blong kilim 88 ki blong wan bigfala piano mo blong tanem wan pej blong ol not i go long wan gudfala myusek. ?Be olsem wanem long bigfala fingga? Traem samting ya: Yu openem han blong yu, mo holemtaet ol fingga blong yu oli stap stret. Nao stat wetem smolwan yu traem benem wanwan long ol fingga blong yu. ?Yu luksave se i hadwok blong holemtaet ol narafala fingga blong oli no muf tu? Naoia yu traem benem bigfala fingga blong yu, yu save muvum i go antap mo i godaon, yu save tanem i goraon. Yu save mekem olsem nating se yu no muvum ol narafala fingga. Bigfala fingga ya i no dipen nating long ol narafala—hemia from we ol joen blong hem we oli joenem hem long han oli save muf olbaot mo from we hem i gat ol masel blong hem wan—mekem se hem i naf blong mekem plante spesel samting.

Wan long ol samting ya se bigfala fingga ya blong yumi hem i save tajem ol narafala fingga, no hem i save joen wetem eniwan long ol narafala fingga blong holem wan samting. ?Hemia i impoten no no gat? Yu traem pikimap wan selva mane be yu no yusum bigfala fingga blong yu, no yu openem wan botel, no yu openem wan doa. Nating se i olsem, fren blong yumi we i kapenta, hem tu i nidim bigfala fingga ya we i save “mekem trabol” long hem blong hem i save holem nil long stret ples no i save holem hama blong hem. Long taem bifo, sam nesen we oli holem ol enemi blong olgeta we oli soldia, oli folem nogud fasin blong katemaot ol bigfala fingga blong olgeta.—Jajes 1:6, 7.

Ol fingga oli mekem fulap wok, be oli gat smol masel nomo. Maet yu ting se samting ya i nogud from se taem i gat plante masel samting ya i min se i gat moa paoa. Be ol masel oli save gru moa taem yumi yusum olgeta oltaem. ?Wanem i save hapen sipos ol fingga blong yumi oli fulap long ol masel we oli gat paoa? From olgeta wok we ol fingga oli mekem, sloslou han blong yumi i save kam strong olsem ol padel, samting ya i save mekem se sam smosmol wok oli save kam had no yumi no save mekem. !Yumi tangkyu tumas long Man we i Wokem yumi, hem i soemaot fasin waes taem hem i putum moa masel long ples we han i joenem narafala haf blong han antap, mo i joenem olgeta long ol fingga wetem ol string we i strong gud!

Wan Han Glaf We i Stretgud

Skin we i stap long han blong yu i no olsem wan samting we i kavremap han blong yu nomo. Yu traem pinsim skin blong baksaed blong han blong yu. Bambae yu luk se hem i sofsof mo i isi blong muvum. Samting ya i mekem se han i save sat. ?Nao, olsem wanem long medel blong han blong yu? Long ples ya skin i strong mo i no save muvmuf plante. Yu traem tingbaot, skin we i kavremap medel blong han blong yumi, sipos i stap muvmuf oltaem bambae i had blong holemstrong long wan samting. Blong mekem se yumi holemstrong, i gat sam gris we i stap long medel blong han blong yumi. Ol gris ya oli tik moa long ples we fingga i joen long han mo kolosap long joen we han i stat—hemia ol haf blong han we yumi yusum moa taem yumi holemtaet wan samting.

Sipos yu lukluk kolosap long medel blong han blong yu, bambae yu luksave se skin blong yu i no glisgud. I gat sam bigfala laen oli stap long medel blong han, be antap moa i gat plante smosmol laen tu, sam oli ron stret, sam oli goraon, we oli kolem ‘papilari rijes.’ I sem mak long ol laen aninit long sus blong yu, ol ‘rijes’ ya oli mekem se yumi save holemgud samting.

Long en blong ol ‘rijes’ ya i gat ples we i open blong smol swet i save kamaot blong mekem insaed long han i wetwet. Ating yu luk finis wan man blong wok we i rabem tufala han blong hem tugeta bifo we hem i mekem wan hevi wok. Samting ya i no wan prapa fasin blong hem. Hem i blong mekem se tufala han blong hem i hot, ale samting ya i mekem smol swet i kamaot. Ol smol wora ya oli mekem se i isi blong holemtaet wan samting. ?Yu yu mekem wanem taem yu yu gat trabol blong openem ol pej blong wan buk we ol pepa blong hem oli smol nomo? Ating yu mekem sem samting we man ya i mekem—yu ravem en blong fingga blong yu wetem bigfala fingga blong mekem se i isi blong openem wan pej we i smol tumas.

Ol ‘rijes’ long en blong ol fingga blong yumi we oli goraon mo olbaot long hem oli gat wan narafala wok tu—oli mekem prapa finggapren blong yumi. Ating i hadwok blong bilivim se, long en blong fingga ya i gat ol laen we oli defren long bitim 50 bilyan narafala fingga mo bigfala fingga blong olgeta man long wol. Nating se tufala twin i luk sem mak nomo, be finggapren blong tufala i no sem mak. Long ol yia stat long 300 B.K.T. go kasem 200 B.K.T. ol bisnesman blong Jaena oli save hu nao i stap pem ol samting blong olgeta from ol finggapren blong olgeta, we i sem mak olsem we man i saenem nem blong hem. Mo tu taem fingga i kasem kil bambae samting ya i no save jenisim finggapren blong yu. Bambae hem i gru bakegen sipos kil we hem i kasem i no bigwan tumas.

Plante Taosen String

I tru se ol han blong yumi oli no save lukluk, harem, no smelem wan samting be oli wan stampa samting blong filim ol samting long wol raonabaot long yumi. Eksampel, ?bambae yu mekem wanem taem yu stap yu wan long wan rum we i tudak? Yu stap tajem ol samting raon long rum. Yes, ol han blong yumi oli no ol gudfala tul nomo be yumi yusum tu blong filim ol samting. Oltaem oli stap givim plante save long yumi—olsem stof we i hot, taoel we i wetwet, kot we i glisgud, hea blong puskat we i sofsof, mo ol narafala samting olsem. Namba faef fasin blong yumi blong filim samting, hemia taem yumi tajem samting, i stat wetem ol han.

En blong fingga blong yumi oli save filim samting from we oli gat fulap smosmol string we oli mekem se yumi filim ol samting kwiktaem—1,400 long evri sentimita skwea. Sipos yu holem tu pin nao i gat 6 milimita bitwin long tufala mo yu mekem tufala i tajem fes blong yu, bambae yu filim olsem we wan pin nomo i stikim yu. Be yu traem tajem en blong fingga blong yu wetem tufala sem pin ya, mo ol string we i stap insaed long fingga ya bambae oli talemaot long yu kwiktaem se i gat tu pin i stikim yu. Samting ya nao i mekem se i isi long wan blaenman i save rid taem hem i tajem ol leta we oli stap long wan pepa. ?Hu i talem se ol han oli no save lukluk?

Wan haf blong han nomo we i no gat ol string long hem, hemia ol nil blong fingga. Be samting ya i no min se yumi no save yusum. Defren nao, ol nil blong fingga oli blokem mo protektem en blong ol fingga we oli sofsof. Yumi save yusum tu, taem yumi nidim blong karemaot skin blong wan aranis, blong karemaot wan smol doti, no pikimap wan smol bidbid. ?Yu yu stap askem se ol nil blong fingga oli gru kwiktaem olsem wanem? Samting ya i dipen long plante samting. Ol nil blong fingga blong yumi oli gru kwik long hot taem bitim long kol taem. Oli gru kwik long bigfala fingga mo oli gru slou long smol fingga. Oli gru moa kwik long han we yu yusum moa. Mo oli ting se oli stap gru samting olsem 0.1 milimita long wan dei.

Oli Talemaot Yumi

Ol han blong yumi oli save talemaot plante samting. Taem yu sekhan long wan man wetem kaen fasin, taem yu tajem samting slou nomo, taem yu taetemgud han blong yu, yu saksakem fingga blong yu—oli soemaot wan samting long saed blong yumi. Olsemia nao, plante long yumi oli faenem se i had blong toktok taem oli no yusum han blong olgeta no taem oli no soemaot saen long han blong olgeta. Long olgeta we sora blong olgeta i fas, fasin ya i impoten tumas, from oli yusum blong toktok. Taem yu no moa save olsem wanem blong talem wan samting, han blong yu i save givhan olsem saen blong toktok. Ol Indian blong Amerika, ol man Hawai, mo ol man bus blong Afrika, oli gat prapa saen long han blong olgeta olsem wan lanwis.

Yumi save se ol han blong yumi oli no talemaot sam samting long saed blong yumi nomo, oli talemaot sam samting long yumi tu. John Napier i raetem long buk blong hem Hands se: “Ol han blong man oli defren long ol narafala samting from we man i save yusum, i no blong talemaot ol toktok blong hem nomo be tu blong soemaot ol filing mo tingting blong hem.” Nating se plante anamol tu oli gat ol “han” we oli kolosap sem mak long ol han blong yumi, be fasin we God i yusum blong mekem han blong man i gud tumas mo ol defren samting we man i save mekem wetem han blong hem, oli no laenap wetem tijing ya blong evolusen. Defren nao nambawan plan i soemaot klia waes fasin blong Hemia we i Mekem plan, Hemia we i Mekem plan mo i Wokem olgeta samting, Jeova God.—Revelesen 4:11.

Nao taem yangfala kapenta we yumi tokbaot fastaem i tekem hama blong hem bakegen, hem i holem nil wetem wan bigfala fingga mo wan narafala fingga blong hem, ating naoia i gat respek long tufala gudfala han blong hem. Tru ya, yumi reregud blong mekem ol samting we han blong yumi i wantem mekem.

[Tok blong pija long pej 30]

Long bitim 50 bilyan fingga mo bigfala fingga blong olgeta man long wol i no gat tu finggapren we i sem mak