Ol Pleplei Blong Wol We Oli Save Pulum Ae
!HOLYWUD! Nating se yu stap long wanem ples long wol ya, ating nem ya i mekem se yu tingbaot ol sinima mo ol pleplei. Plante man oli kolem ples ya se bigfala taon blong pleplei blong wol mo wan Flas Taon (Tinseltown), i no gat narafala ples we kolosap i sem mak wetem ol bisnes blong pleplei olsem taon ya afsaed long Los Anjeles, Kalifonia. Hem i kam olsem stampa ples blong olgeta man long wol long saed blong ol pleplei we oli save pulum man. Wan man blong raetem nyuspepa i talem se, “tingting long saed blong Holywud se hem i stap wokem ol sinima we oli olsem drim nomo i go finis long olgeta ples long wol.”
Ol Pleplei—Bigfala Bisnes
Be i no tingting nomo long saed blong Holywud we i bin go long olgeta ples long wol; “Holywud” i wan bigfala bisnes long wol we i stap sanemaot ol pleplei i go long olgeta ples. Yes, magasin ya, Time, i talem se, long Amerika, pleplei i bigfala moa long olgeta samting we oli mekem blong sanem i go long ol narafala kantri long wol, namba tu long hem, hemia ol samting we oli mekem blong yusum antap long skae. Long ol pleplei we oli mekem oli kasem plante handred milyan dola long evri yia, mo haf blong hem—20%—i kam long ol narafala kantri.
Amerika i kasem plante mane from, 35% long ol buk we ol stoa blong buk oli salem raonabaot long wol, 50% blong ol kaset we oli mekem raonabaot long wol, 55% blong ol sinima mo ol video we ol narafala man oli rentem raonabaot long wol mo stat long 75% kasem 80% blong ol televisin we oli givimaot.
Blong kasem ol bigfala mane ya, Holywud i givim pleplei long ful wol. I no se olgeta man long wol oli glad oltaem long hem—i gat sam kantri we oli stap toktok smosmol se, ol yangfala blong olgeta oli lego ol prapa kastom blong olgeta from ol samting blong pulum ae we Amerika i stap givimaot. Be, samting ya i no blong talem se, ol pleplei oli kamaot long Amerika nomo. Plante kantri oli gat ol prapa pleplei blong olgeta—ol sinima, televisin, ol kaset, ol buk, ol spot, mo ol narafala samting olsem.
Ol Pleplei—Fulap Defren Kaen Tede
Nating se hu i stap givimaot ol pleplei long wol no hu i mas mekem olsem, be samting we yumi sapraes long hem se i gat fulap defren kaen pleplei we i isi nomo blong ol man oli kasem, samting ya i mekem laef blong ol man i defren olgeta long laef we oli gat bifo. Blong eksplenem moa: Sipos yu bin stap laef wan handred yia bifo, ?yu ting se yu save luk ol man we oli trengud finis blong mekem ol defren kaen pleplei, we oli stap soemaot gudhan blong olgeta long fored blong ol narafala man? Nating se yu bin stap long ol ples we oli rij, long tingting blong plante yangfala tede, yu yu bin mestem wan bigfala samting from we yu no gat jans blong luk ol pleplei blong naoia. Wan eksampel, wan handred yia bifo, yu mas wokbaot longwe sipos yu wantem luk wan man blong singsing no plei myusek. Tede i isi nomo blong lesin long enikaen myusek long stereo, no yumi sidaon long wan gudfala jea, nao taem yumi pusum wan baten nomo, yumi save harem enikaen singsing no lukluk enikaen pleplei we oli save kamaot.
Long ol rij kantri, yu save faenem wan televisin long ol haos wanwan, wan video mo wan CD no wan teprikoda, mo plante narafala samting we oli wok wetem lektrik. Sam pikinini oli gruap long wan ples we oli putum plante televisin raonabaot long haos. Long ol kantri we oli pua tumas, plante velej mo ol man we oli stap raonabaot long olgeta oli gat prapa ples blong olgeta blong lukluk televisin we long evri aftenun oli save kam wan ples blong lukluk. Ol man oli laekem televisin tumas. Oli spenem moa long ol fri taem blong olgeta long ol defren kaen pleplei.
?I rong blong mekem ol samting ya? ?I gat denja i stap long ol pleplei blong tede? ?No ol pleplei we oli plante tumas tede oli minim nomo se ol man oli rij tumas? I gud yumi skelemgud ol pleplei blong wol we oli save pulum ae.