Ol Man Oli Talem
Ol Kakros Haf ya “Laef Blong Kakros” i intres tumas. (Wekap! Namba 2, 1992) Famle blong mi i folem ol tok insaed, mo stat long taem ya, mifala i no bin luk la cucaracha long haos blong mifala.
B. H., Amerika
Mi bin stadi long kakros long skul samwe long tri yia bifo. Be mi neva tingbaot se oli save givim gudfala samting. Mi sapraes tumas blong save se ol kakros, we mi stap tingbaot olgeta olsem ol enemi, oli gud long samfala rod. Naoia mi kasem save tu from wanem i hadwok blong finisim olgeta, nating se yumi stap yusum ol posen blong kilim olgeta.
E. A., Naejiria
Mi sapraes we yu no talem borik asid blong “kilim” kakros. !Mifala i yusum long haos blong mifala, mo hem i wok!
S. D., Amerika
Ol stadi oli givim woning se borik asid i save givim nogud trabol long helt blong ol pikinini mo ol bebi. Lukluk long “Ol Man Oli Talem” long Wekap! long Oktoba 22, 1984 (Engglis).—ED
Mi bin ridim ol magasin blong yufala blong eit yia, mo mi wantem talemaot tangkyu long yufala from ol haf ya we yufala i mekem we i tokbaot ol smol wok long haos. Mi lukluk long haf ya “Laef Blong Kakros.” (Wekap! Namba 2, 1992) Gudfala fasin blong yufala blong raetem store ya i tijim mifala blong fri long samting ya. Sipos mi folem ol rod we yufala i talem, i no longtaem bambae haos blong mi i fri long ol trabol we oli mekem.
A. F. A. A., Brasil
Rid Mi mi wan yangfala we mi mi wantem tumas blong rid. Be, plante taem mi no kasem save long wanem we mi mi ridim, mo mi no ridim plante wod we oli hadwok blong kasem save long olgeta. Haf ya “Rid Blong Kasem Save” (Wekap! Namba 1, 1992) i halpem mi blong kamgud long saed ya.
A. R. B., Brasil
Mi mi gat 13 yia. Haf ya “Rid Blong Kasem Save” (Wekap! Namba 1, 1992) i stret haf we mi nidim. Bifo mi stap ridim ol wod wanwan. Tingting blong mi i save go olbaot, mekem se mi mas ridim bakegen ol haf insaed long buk blong kasem save long hem. Ol gudfala tok blong yu oli givhan long mi bigwan.
A. K., Polan
Man Blong Stretem Nil From we bodi blong mi i no strong mi no save joen long ol wok blong bildim haos long ol ples we ‘Watch Tower Society’ i stap wok long hem long Seltas/Taunus, long Jemani. !Be taem mi ridim haf ya we i tokbaot olfala Adams Akuetteh, se “man blong stretem ol nil long hedkwota long Gana” (Wekap! Namba 3, 1992), samting ya i mekem mi mi krae!
T. R., Jemani
Dring Alkol Mo Draev Mi mi laekem tumas haf ya we i tokbaot “Alkol Mo Draev—Wan Fasin Blong Meksemap Ded.” (Wekap! Namba 4, 1991) Smol sista blong mi we i gat naen manis blong hem i ded long wan akseden long trak samwe long 31 yia bifo finis. Mi stap sore long hem yet. Wan draeva we i drong i sperem trak blong mifala. Mi tingbaot yet mama blong mi we i swim wetem blad mo smol sista blong mi we i ded long jea blong hem. Mi mi glad blong gat bilif long laef bakegen long ded, be mi mi hop se haf ya i save mekem samfala oli tingbaot frut blong fasin blong dring mo draev.
K. N., Amerika
Mi mi gat 16 yia. Haf ya “Ol Man Blong Mekem Rabis fasin Oli Fesem Ol Man We Oli Mekem i Nogud Long Olgeta” i gat ol bigfala ekspiryens long hem mo i mekem wora blong ae blong mi i ron. Mi sua se haf ya i save givhan long plante yangfala olsem mi blong tingbaot ol narafala mo blong lukaotgud long fasin blong yusum alkol.
R. H., Jemani