En Blong Fasin Blong Faet Long Famle

“Blong blokem ol faet long haos mo blong katem daon ol faet long famle i nidim ol bigfala jenis long fasin blong famle laef mo fasin joen blong ol man.”—Behind Closed Doors.

FASWAN man long histri we i kilim wan narafala man i ded hemia long medel blong tufala brata. (Jenesis 4:8) Long ol taosen yia we oli pas, ol man oli bin harem nogud long plante defren kaen faet long famle. Plante man oli bin traem sam rod blong blokem, be plante long ol rod ya oli no wokgud.

Eksampel, ol plan blong givhan long ol man we oli stap faet insaed long famle oli save givhan long olgeta nomo we oli luksave se oli nidim help. Wan man we bifo i stap mekem nogud long waef blong hem i talem wetem sore se: “Taem i gat wan long mifala i kamgud [we oli stap givhan long hem blong kamgud bakegen], i gat trifala man we oli stap mo oli talem se, ‘Yu mas bos long olfala woman [waef] ya.’ ” Ale man ya blong mekem i nogud i mas traehad blong luksave rong blong hem wan. ?From wanem hem i kam olsem wan man blong mekem i nogud? Sipos hem i kasem help blong stretem ol rong blong hem wan, maet biaen hem i save winim trabol ya.

Be i no gat tumas man blong wok blong givhan long ol man blong mekem nogud folem ol program ya. Taswe, oli ting se 90% long ol pikinini blong Amerika we oli kilim olgeta i ded, oli bin talemaot se i gat trabol long famle bifo we oli bin kilim pikinini. From samting ya, ol program blong ol man mo ol ogenaesesen blong polis oli save mekem smol samting nomo blong winim fasin blong faet insaed long famle. Oli nidim wan samting we i moa impoten.

“Nyufala Laef”

Wan tim blong mekem stadi i talem se, “I nidim ol bigfala jenis long fasin blong mekem ol memba blong famle oli joengud bakegen.” Faet long famle i no jes wan trabol long saed blong bodi nomo; trabol ya i bigfala moa long tingting. Ol sid blong hem oli kamaot long fasin we ol memba blong famle—hasban no waef, pikinini, papa mama, brata no sista—oli mekem long olgeta bakegen insaed long famle. Blong mekem fasin ya blong joengud bakegen, i minim se oli mas putum samting we Baebol i kolem se “nyufala laef.”—Efesas 4:22-24; Kolosi 3:8-10.

I gud yumi faenemaot sam rul blong famle we Baebol i tokbaot we i save givhan long yumi blong tekem nyufala Kristin fasin we i save mekem wan gudfala fasin joen long medel blong wan famle.—Lukluk Matyu 11:28-30.

Tingting blong ol papa mama long saed blong ol pikinini: I gat plante moa samting long saed blong wok blong papa mama bitim blong mekem wan pikinini. Be, sore tumas, plante papa mama tede oli tingbaot ol pikinini blong olgeta olsem wan baden mo oli no mekemgud wok blong olgeta olsem wan papa mo wan mama. Hemia nao ol man we oli save mekem nogud long pikinini blong olgeta.

Baebol i talem se ol pikinini oli “wan presen we Hae God i givim” mo “wan gudfala samting.” (Ol Sam 127:3) Ol papa mama oli gat kaon long Man we i Wokem yumi blong lukaotgud long presen ya. Olgeta we oli tingbaot pikinini blong olgeta olsem wan baden oli mas kasem nyufala fasin ya mo tingting long saed ya.a

Stret tingting long mak we yu wantem ol pikinini oli kasem: Wan stadi i soemaot se plante mama we oli stap mekem nogud long pikinini blong olgeta oli ting se pikinini i mas save samting we i stret mo i no stret taem oli gat wan yia nomo. Plante long ol mama ya [kolosap 33%] oli ting se taem ol pikinini oli kasem sikis manis oli mas save.

Baebol i soemaot se evri man oli sinman taem oli bon. (Ol Sam 51:5; Rom 5:12) I no talem se wan pikinini i gat fasin blong luksave taem hem i bon. Be, Baebol i talem se “olgeta we oli stap traehad longtaem finis,” oli save “kam we oli naf blong jusumaot wanem fasin i gud mo wanem fasin i nogud.” (Hibrus 5:14) Mo, Baebol i tokbaot “fasin blong pikinini,” “krangke fasin” blong wan smol boe, mo “flas fasin” blong ol yangfala. (1 Korin 13:11; Proveb 22:15; Eklesiastis 11:10) Ol papa mama oli mas kasem save long ol mak ya blong ol pikinini blong olgeta, i no blong putum wan mak blong hem i kasem we i bitim yia mo paoa blong wan pikinini.

Stretem ol pikinini: Long Baebol Grik tok we oli tanem i kam “stretem” i minim “tijim.” From samting ya, faswan mak blong stretem, i no blong givim soa, be blong lanem pikinini. Yu save mekem samting ya plante taem we yu no yusum stik blong stretem, be samtaem yu nidim. (Proveb 13:24) Baebol i talem se: “Yufala i lesin long ol tok we oli stap stretem yufala, mo yufala i kam waes from.” (Proveb 8:33) Mo Pol i raetem se wan man i mas mekem “tingting blong hem i longfala” mo hem i mas stretem ol narafala wetem ‘tingting we i longfala blong tijimgud olgeta.’ (2 Timote 2:24; 4:2) Samting ya i blokem fasin blong faerap long kros mo fasin blong mekem i strong tumas long pikinini taem papa mama oli mas stretem hem wetem stik.

From ol rul ya blong Baebol, askem yu wan se: ‘?Fasin blong mi blong stretem i stap tijim pikinini blong mi, no i blokem hem from we mi mekem bodi blong hem i soa nomo? ?Fasin blong stretem blong mi i tijim hem long ol stret rul no i jes blong mekem pikinini i fraet?’

Ol mak blong blokem fasin blong ol bigman: Wan man blong mekem i nogud i talem se hem i bin “lusum tingting” mo i faetem woman blong hem. Wan man blong givim advaes i askem man ya sipos hem i bin stikim woman blong hem wetem naef samtaem. Man ya i ansa se, “!Neva mi save mekem samting ya!” Man ya blong givim advaes i givhan long man ya blong luk se hem i bin putum sam mak we hem i no mas bitim, be trabol se oli no ol stret mak.

?Wanem ol mak blong blokem ol fasin blong yu? ?Yu yu stop blong rao bifo we yu mekem samting nogud? No ?yu kros mo biaen yu stat blong singaot, agensem, pusum, sakem ol samting, no faetem narafala?

Nyufala fasin i gat wan strong mak, stop longtaem bifo we yu sakem ol tok we oli spolem tingting blong narafala no faet long saed blong bodi i kamaot. Efesas 4:29 i talem se, “Long ol toktok blong yufala, yufala i mas no talem ol rabis tok we i save spolem man.” Vas 31 i gohed i se: “Yufala i mas lego olgeta fasin blong kros. Yufala i mas no holem kros, mo yufala i mas no kros kwik. Yufala i mas no sakem tok blong yufala i go antap, mo yufala i mas no tok nogud long yufala.” Grik tok ya “kros” i soemaot wan “fasin blong no tingtinggud fastaem.” I gud blong save, buk ya, Toxic parents i makem se plante taem fasin blong ol man blong mekem nogud long pikinini, “oli no gat paoa blong blokem samting we oli wantem mekem kwiktaem we oli no tingtinggud long hem fastaem.” Nyufala fasin i blokem ol filing we oli pusum yumi blong mekem wan samting kwiktaem long saed blong bodi mo toktok.

Tru ya, waef i mas gat nyufala fasin i sem mak long hasban. Hem i no mas mekem wan samting blong mekem se hasban blong hem i kros, waef i mas soemaot fasin tangkyu long hasban from traehad blong hem blong lukaot long famle, mo hem i mas wokgud wetem hasban blong hem. Mo tufala i no mas ting se tufala i mas mekem samting we tufala i no naf blong mekem—stap stretgud olgeta. Be, tufala i mas folem tok blong 1 Pita 4:8 se: “Antap long ol narafala samting, yufala i mas stap laeklaekem yufala tumas. Yufala i mas no kam slak long samting ya, from we fasin blong laekem tumas ol man, hem i save blokem plante sin.”

Respek long ol olfala: Levitikas 19:32 i talem se: “Soem respek long ol olfala mo givim ona long olgeta.” (Today’s English Version) Hemia i wan traem taem wan olfala papa mama i sik mo ating oli wantem se yu stap mekem sam samting blong olgeta oltaem. 1 Timote 5:3, 4 i tokbaot fasin blong “ona gud” mo “pem kaon” long papa mama. Hemia ol samting we yu mas pem wetem mane i sem mak long fasin blong givim ona. From olgeta samting we papa mama oli mekem long yumi taem yumi wan smol pikinini we yumi no save mekem wan samting, long sem fasin yumi mas tingbaot olgeta taem oli nidim help.

Winim fasin blong faet long medel blong brata sista long famle: Bifo we tingting blong Ken i lidim hem blong kilim i ded brata blong hem Ebel, God i givim advaes long hem se: “Sin i stap long doa blong yu. Hem i wantem rulum yu, be yu mas winim hem.” (Jenesis 4:7, TEV) Man i save bos long filing. Lanem blong gat longfala tingting wetem ol narafala, “yu save joengud wetem narafala from we yu gat lav long ol narafala.”—Efesas 4:2, Phillips.

Lanem Blong Talemaot

Plante man we oli stap harem nogud long faet long haos oli no talemaot faet ya long ol narafala man. Be Dokta John Wright i talem se: “Woman we man blong hem i faetem hem i mas lukaot help long saed blong filing mo bodi long wan we i gat save long bisnes ya.” Samting ya i tru tu long ol narafala memba long famle we oli mekem nogud long olgeta.

Samtaem wan man no woman we i harem nogud i faenem se i had tumas blong talemaot trabol blong hem long wan narafala man. Hemia from we fasin ya nao blong trastem olgeta we oli stap kolosap moa long hem—famle—i bin mekem hem i harem nogud. Be, Proveb 18:24 i talem se: “I gat sam man we oli fasgud long ol fren blong olgeta moa, i bitim ol stret brata.” Blong faenem fren ya mo blong lanem blong talemaot long waes fasin, i wan bigfala haf blong kasem help we yu nidim. Tru ya, man blong mekem nogud tu i nidim help.

Evri yia, plante handred taosen man oli kam ol Wetnes blong Jeova. Ol man ya oli stap traehad blong putum nyufala fasin. Long medel blong olgeta i gat sam we bifo oli man blong faet long famle. Blong blokem enikaen rod we i save mekem oli gobak long olfala fasin blong olgeta, oli mas gohed blong luk Baebol olsem wan samting we “i stret gud blong tijim ol man long ol trutok . . . i stret gud blong stretem ol krangke fasin, mo blong tijim ol man long stret fasin.”—2 Timote 3:16.

Long ol nyufala Wetnes ya, fasin blong putum nyufala laef i wan samting we i stap gohed nomo, from we Kolosi 3:10 i talem se, “Oltaem, God i stap mekem laef ya i kam nyuwan bakegen.” Taswe oli nidim fasin traehad oltaem. I gud tumas we ol Wetnes blong Jeova oli save kasem help long plante plante “brata no sista no mama no papa no pikinini” long saed blong speret.—Mak 10:29, 30; lukluk long Hibrus 10:24, 25.

Naoia tu, long ol 70,000 kongregesen blong ol Wetnes blong Jeova raonabaot long wol, i gat ol elda we oli gat lav mo oli olsem “wan ples blong haed long hem taem i gat bigfala win, mo olsem wan sefples taem bigfala ren i foldaon.” “Bambae oli openem sora mo ae blong olgeta long olgeta man we oli gat nid.” (Aesea 32:2, 3, TEV) Ale ol nyufala Wetnes blong Jeova, i sem mak long olgeta we oli gat moa ekspiryens, oli gat nambawan ples blong kasem help insaed long Kristin kongregesen taem oli stap wok blong putum nyufala fasin.

Kaengud Fasin Blong Ol Elda

Taem ol man oli kam luk ol Kristin elda long kongregesen blong ol Wetnes blong Jeova blong kasem advaes, ol elda ya oli tren blong lesin long evri wan long sem fasin nomo. Oli glad blong soem kaengud fasin mo fasin blong kasem save long evriwan, antap moa long hemia we oli mekem nogud long hem bigwan insaed long famle.—Kolosi 3:12; 1 Tesalonaeka 5:14.

Eksampel, maet wan waef i harem nogud from hasban i faetem hem mo i kasem bigfala kil from. Long plante kantri tede, sipos wan man i bin mekem sem kaen fasin blong faetem man olsem afsaed long famle, biaen man ya blong mekem i nogud i mas go long kalabus from. Taswe man ya we i kasem trabol i nidim we man blong givim advaes long hem i soemaot nambawan kaengud fasin long hem, olsem narafala man we i harem nogud from oli mekem nogud long hem long wan defren kaen trabol, olsem mekem nogud long saed blong seks.

Antap moa, oli mas singaot man ya we i mekem nogud agensem loa blong God i kam blong oli stretem samting ya. Long rod ya kongregesen i save stap klin, mo ol narafala man we oli no gat poen oli stap sefgud. Mo samting we i moa impoten, i no gat wan samting we i blokem tabu speret blong God blong i kam.—1 Korin 5:1-7; Galesia 5:9.

Tingting Blong God Long Mared

Taem ol man oli kam ol Wetnes blong Jeova, oli agri blong folem ol rul blong Kristin laef we yumi faenem long Tok blong God. Oli lanem se man i olsem hed blong famle, blong lidim famle long trufala wosip. (Efesas 5:22) Be man olsem hed blong famle i neva mas yusum paoa blong hem blong spolem waef, spolem prapa fasin blong hem, no sakemaot ol tingting blong hem.

Long defren fasin, Tok blong God i soemaot klia se ol hasban “yufala i mas laekem woman blong yufala tumas, olsem we Kraes i laekem jyos ya tumas. Taswe hem i letem laef blong hem, blong sevem jyos ya. . . . Man i mas laekem woman blong hem, i mas lukaot gud long hem, olsem we i stap lukaotgud long bodi blong hem nomo. Taem man i stap lukaotgud long woman blong hem, i olsem we hem i stap lukaotgud long bodi blong hem nomo. Nao i no gat man we i stap lukluk nogud long bodi blong hem, i stap spolem bodi blong hem, no gat.” (Efesas 5:25, 28, 29) Tru ya, Tok blong God i talem stret se waef i mas kasem “ona.”—1 Pita 3:7; lukluk tu long Rom 12:3, 10; Filipae 2:3, 4.

I tru se i no gat wan Kristin hasban we i save talem stret olgeta se hem i laekem woman blong hem no givim ona long hem sipos hem i mekem nogud long woman blong hem long toktok mo long bodi. Hemia gyaman fasin, from Tok blong God i talem se: “Mo yufala man we i mared, yufala i mas laekem tumas ol woman blong yufala, yufala i mas mekem i gud long olgeta.” (Kolosi 3:19) I no longtaem nao, taem jajmen blong God i kam agens long ol rabis man long Amageden, ol man we oli gat gyaman fasin bambae oli harem nogud long sem panis we ol man we oli agensem ol rul blong God bambae oli kasem.—Matyu 24:51.

Wan hasban we i fraetgud long God i mas laekem waef blong hem olsem bodi blong hem wan. ?Hem i save faetem bodi blong hem wan, slavem hem wan long fes blong hem, no i pulum strong ol hea blong hem? ?Hem i save daonem hem wan, tok nogud long hem wan mo jikim hem wan long fored long ol narafala? Man we i stap mekem ol samting olsem yumi save talem se hem i krangke, yes i stret blong talem olsem.

Sipos wan Kristin man i faetem waef blong hem, samting ya i mekem se ol narafala Kristin wok we hem i stap mekem i kam olsem nating nomo long ae blong God. Tingbaot, “man blong faet” i no naf blong holem wok long Kristin kongregesen. (1 Timote 3:3; 1 Korin 13:1-3) Tru ya, wan waef we i stap mekem sem samting olsem long hasban blong hem i stap sakemaot loa blong God tu.

Long Galesia 5:19-21 i talem ol fasin we God i no laekem, hemia “rao oltaem, nao oli stap seraot from, . . . oli stap kros” mo i talem se “ol man we oli stap mekem ol fasin ya, bambae oli no save go insaed long nyufala wol ya we God i king long hem.” Taswe fasin blong faetem waef no pikinini i neva save kam olsem wan stret fasin. Oltaem hem i agensem loa blong gavman mo i agensem loa blong God stret.

Wajtaoa, wan magasin we ol Wetnes blong Jeova oli prentem, i givim sam poen long Baebol long bisnes ya, i tokbaot olgeta we oli talem se oli Kristin be oli man blong faet se: “Wan man we i talem se hem i wan Kristin be plante taem hem i kros mo i stap faet, mo hem i no tanem tingting blong hem from fasin ya, kongregesen i save putumaot hem,” hem i no moa joen.—Mei 1, 1975, pej 287 [Engglis]; skelem wetem 2 Jon 9, 10.

Samting We Loa Blong God i Letem

Tru ya bambae God i jajem olgeta we oli stap brekem ol loa blong hem. Be naoia, ?wanem samting Tok blong Hem i talem long ol Kristin waef we hasban blong olgeta i bin faetem olgeta mo hasban ya i no jenisim fasin ya be i gohed blong faet? ?Waef we i no gat fol bambae i gohed blong stap long ples we i denja long saed blong bodi, tingting mo long saed blong speret, we ating hem i save lusum laef blong hem tu?

Wajtaoa, we i tokbaot faet long haos, i makem wanem samting we Tok blong God i talem. Hem i talem se: “Aposol Pol i givim advaes se: ‘Woman i mas no livim man blong hem. Sipos woman i livim man blong hem, bambae i mas stap olsem nomo i no mared bakegen. No sipos no, bambae i mas kambak blong joengud bakegen long man blong hem. Mo man i mas no mekem divos long woman blong hem.’ ” Haf ya i gohed moa blong talem se: “Long taem we waef i no moa save holemstrong, no laef blong hem i stap long denja, hemia we i bilif i save jusum blong ‘livim hem.’ Be tufala i mas traehad blong ‘kambak blong joengud bakegen’ biaen. (1 Korin 7:10-16) Baebol hem wan i no talem se ‘fasin blong livim’ i minim divos mo mared bakegen; be, divos mo fasin blong seraot we loa blong gavman i agri long hem maet i save blokem fasin blong man blong hem i mekem nogud bakegen long hem long fyuja.”—Maj 15, 1983, pej 28-29; [Engglis] lukluk tu long Novemba 1, 1988, [Engglis mo Franis] pej 22-23.

Samting we waef we i no gat fol i jusum blong mekem, i mas prapa disisen blong hem wan. “From we evri man [no woman] i gat basket blong hem blong karem.” (Galesia 6:5) I no gat wan narafala man i save mekem disisen ya long hem. Mo i no gat wan man i save pusum hem blong gobak long hasban we i gat fasin blong mekem nogud mo i save mekem trabol long waef blong hem long saed long laef, bodi, mo long saed blong speret. Hemia i mas prapa disisen blong hem, hem i fri blong mekem, i no from we ol narafala oli stap traem pusum hem blong mekem olsem we oli wantem.—Lukluk Faelimon 14.

En Blong Faet Long Famle

Ol Wetnes blong Jeova oli save se faet long famle i wan saen we Baebol i talem se i mas kamaot long ol las dei, we bambae plante man oli save “mekem i nogud” we “oli no man blong sore” mo “oli man blong mekem i strong tumas oltaem long ol narafala man.” (2 Timote 3:2, 3, The New English Bible) God i promes se long ol las dei ya, bambae hem i lidim yumi i go insaed long wan nyufala wol we i gat pis long hem we bambae olgeta man “oli stap sefgud, mo bambae i no gat man blong mekem oli seksek.”—Esikel 34:28.

Long nambawan nyufala wol ya, bambae faet long famle i kam olsem wan samting blong bifo foreva. “Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” —Ol Sam 37:11.

Mifala i askem yu blong lanem moa long saed blong ol promes blong Baebol we i tokbaot fyuja. Tru ya, yu save kasem ol gudfala frut naoia taem yu stap folem ol rul blong Baebol long famle blong yu.

[Futnot]

[Tok blong pija long pej 10]

Ol rul blong Baebol oli givhan blong winim ol faet long famle

[Tok blong pija long pej 13]

Wan we i kasem trabol i nidim blong talemaot long wan fren we hem trastem