Baebol i Talem Wanem . . .

?Yumi Rili Nidim Ol Pris?

LONG leta blong yia we John Paul II i raetem i go long ol pris long “Tabu Tasde,” 1992, hem i talem se, “Talem tangkyu from presen blong wok blong ol pris.” I no ol Katolik nomo be ol narafala man tu oli bin harem nogud from ol rong blong olgeta. Oli harem se oli nidim wan man we God i glad long hem, i talemaot wil blong God long olgeta, i givim wan sakrifaes long Hem, mo blong toktok long God from olgeta. Oli kolem wan man olsem se wan pris. ?Yumi rili nidim wan pris blong givhan long yumi blong kasem fasin fogif long God?

Tingting ya blong gat ol pris mo mekem sakrifaes i no kamaot long man be i kamaot long God. Sipos ol man oli no mekem sin agens long God, bambae i no nid blong gat ol pris. Long Iden, man ya Adam we i stretgud olgeta i no nidim pris. God i mekem hem we hem i no gat sin.—Jenesis 2:7, 8; Eklesiastis 7:29.

?Hu Ya Ol Faswan Pris?

Tede yumi evriwan yumi sinman taem yumi bon from we Adam i jus blong mekem sin mo yumi ol pikinini blong hem. (Rom 3:23) Ebel, pikinini blong faswan man, Adam, i luksave samting ya. Baebol i tokbaot hem se: ‘From we Ebel i stap bilif long God, taswe hem i givim wan sakrifaes i go long God.’ (Hibrus 11:4) Nating se Ebel mo ol narafala man bifo we oli man blong bilif—olsem Noa, Ebraham, mo Job—ol man oli no kolem olgeta se ol pris, be oli givim sakrifaes long God from olgeta no famle blong olgeta. Eksampel, Baebol i tokbaot Job mo ol pikinini blong hem se: “[Job] i bonem ol sakrifaes we i stret long namba blong olgeta evriwan; from we, Job i talem se, ‘maet ol pikinini blong mi oli mekem sin.’ ” (Job 1:5) ?Oraet, olsem wanem ol pris mo sakrifaes i kam bigfala samting long plante kantri?

Tingbaot ol samting we oli stap hapen long taem blong Noa, wan man blong bifo. Noa mo famle blong hem, olgeta nomo oli laef tru long Bigfala Wora we i kavremap wol. Taem oli purumbut long wol ya we wora i karemaot evri samting long hem, Noa i wokem wan olta mo i mekem sakrifaes blong talem tangkyu long fasin sore mo han blong Jeova we i protektem olgeta. From we olgeta nesen oli kamaot long Noa, i tru se oli folem eksampel blong hem mo samtaem biaen oli stanemap ol defren kastom we i joen long fasin blong toktok long God from ol narafala man mo mekem sakrifaes from ol sin.—Jenesis 10:32.

Bitim wan handred yia biaen, wan fasin rebol agens long God i kamaot long taon blong Babel. God i mekem lanwis blong ol man i fasfas mo oli go wanwan. (Jenesis 11:1-9) Sam pris we long taem ya oli stap leftemap ol gyaman bilif mo ol bilif we oli no stret, oli stanemap ol krangke kastom long saed blong wosip long ol kantri we oli go long olgeta. Nating se i olsem, God i luk nid blong tijim ol man we oli stap wosip long hem, long nid blong olgeta blong gat wan laen blong pris, hemia wan hae pris wetem ol pris we oli wok aninit long hem, mo ol sakrifaes we Hem i glad long olgeta.

God i Putumap Ol Pris From Wan Risen

Biaen Jeova i givim tu stampa wok long ol pris blong nesen blong Isrel. Faswan, oli wok long nem blong God olsem ol jaj mo man blong tijim Loa blong God long fes blong olgeta man. (Dutronome 17:8, 9; Malakae 2:7) Namba tu, oli givhan long ol man taem oli kam long fes blong God blong givim sakrifaes i go long hem from olgeta man. Leta we Pol i raetem long ol Hibru Kristin i eksplenem se: “Yumi save finis fasin blong hae pris. Oltaem God i stap jusumaot wan long ol man, nao i putumap hem, blong hem i mekem ol wok long fes blong hem long nem blong ol narafala man. Ol hae pris ya oli stap givim presen i go long God, mo oli stap kilim anamol blong mekem rod blong tekemaot ol sin blong ol man. I no gat man we hem nomo i save jusumaot hae nem ya, se hem bambae i hae pris. God nomo i save singaot man blong i tekem wok blong hae pris.”—Hibrus 5:1, 4.

Pol i gohed blong eksplenem se wok blong ol pris blong Isrel i no laswan rod we God i stap yusum blong mekem ol man oli frengud bakegen wetem Hem. Wok we ol pris oli stap mekem oli pija blong ol samting we oli moa gud, hemia “ol samting we oli stap long heven.” (Hibrus 8:5) Taem ol samting blong heven oli kamtru, yumi no moa nidim ol samting we oli olsem saen nomo. Blong mekem wan eksampel: Maet yu save kipim wetem yu wan pablisiti blong wan samting we yu rili nidim, be bambae yu sakemaot pablisiti ya kwiktaem nomo taem yumi kasem samting ya.

Longtaem bifo we ol man Isrel oli kam wan nesen, God i gat tingting finis blong putumap ol pris we bambae oli wok blong givim blesing, i no long ol man Isrel nomo, be long olgeta man. Fastaem, ol man Isrel oli gat jans blong ol pris ya oli save kamaot long laen blong olgeta. Taem nesen ya i stanap, Jeova i talem long ol man Isrel se: “Oraet, sipos yufala i obei long mi . . . , bambae yufala i tabu, yufala i man blong mi nomo, mo bambae yufala i pris blong mi, yufala i stap mekem wok blong mi.” (Eksodas 19:5, 6; lukluk Jenesis 22:18.) Sore tumas, plante taem nesen ya i no obei long tok blong God. Taswe, Jisas i talem long ol pris mo ol Farisi se: “Bambae God i putumaot yufala, bambae hem i no moa king blong yufala. Nao bambae hem i openem rod long ol narafala man we oli save mekem i stret long hem, blong oli kam we hem i king blong olgeta.” ?Hu ya ol man we naoia oli mas wok olsem pris, blong blesem olgeta man?—Matyu 21:43.

?Ol Kristin Oli Nidim Wanem Laen Blong Ol Pris?

From we yumi gat sin blong Adam finis taem yumi bon, yumi save kasem laef blong olwe tru long sakrifaes ya nomo we i stretgud olgeta we Jisas i givim. (1 Jon 2:2) Jisas hem wan i olsem Hae Pris, i stap wok long fes blong God from yumi, olsem ol pris blong Isrel bifo we oli olsem pija nomo blong hem oli bin mekem. Hibrus 9:24 i talem se: “Kraes i no go insaed long wan tabu ples we ol man nomo oli stanemap, we i olsem pija nomo blong prapa tabu ples we i stap, no gat. Hem i go insaed long heven stret, mo naoia hem i stap stanap long fes blong God blong talemaot ol poen blong yumi.” Olsem nao, from we laen blong ol pris blong Kraes i nambawan mo i hae olgeta, samting ya i mekem se ol man oli no moa nidim ol pris long wol ya, olsem man blong wok long medel blong ol man mo God. Be, yumi nidim yet wok blong ol pris we oli wok aninit long Kraes. ?Long wanem rod?

Ol pris oli mas ‘givim sakrifaes long saed blong speret i go long God we God i glad long hem, we oli mekem tru long Jisas Kraes.’ (1 Pita 2:5, NW) Pol i raet blong tokbaot fasin blong givim presen ya, i se: “Oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem. From we evri taem yumi talemaot nem blong Jisas long fes blong ol man, i olsem we yumi givim presen i go long God.” (Hibrus 13:15) From samting ya, olgeta we bambae oli kam olsem pris blong king, taem oli stap yet long wol ya, oli wok long nem blong God olsem ol Wetnes blong hem long fes blong olgeta man, oli no olsem ol man blong wok long nem blong ol man long fes blong God. Biaen, taem bambae oli stap wetem Jisas Kraes long heven, oli save wok long fes blong God long nem blong olgeta man, blong givimaot ol nambawan blesing blong sakrifaes blong Kraes mo blong finisim ol sik blong olgeta man.—Lukluk Mak 2:9-12.

I tru se olgeta man we oli bilif oli mas givim wetnes, be wan smol namba nomo bambae oli wok long ‘kingdom blong ol pris’ long heven. Jisas i talem se: “Yufala ol sipsip blong mi, yufala i no plante, be yufala i no fraet. Papa blong yufala i glad tumas blong tekem yufala i kam man blong hem, we hem i king blong yufala.” (Luk 12:32; Revelesen 14:1) Olgeta ya bambae oli laef bakegen blong go long heven mo “bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.”—Revelesen 20:6.

God i mekemrere finis blong ol pris ya blong heven oli mekem ol samting long saed blong speret mo ol samting long saed blong bodi we wan laen blong pris i no bin mekem yet. I no longtaem, taem oli mekem praes blong ransom sakrifaes blong Jisas i wok fulwan long laef blong olgeta, bambae oli save joen blong mekem se ol man we oli bilif oli kam stretgud olgeta. Nao, bambae Aesea 33:24 i kamtru long nambawan fasin. I talem se: “Bambae i no gat wan man ples i save talem se: ‘Mi mi sik.’ Ol man we oli stap long ples ya, bambae God i tekemaot rong blong olgeta.”

[Foto Credit Line blong pija long pej 22]

“Benediction of the Wheat at Artois” 1857, by Jules Breton: France / Giraudon/Art Resource, N.Y.