Ol Yangfala Oli Askem . . .

?From Wanem Olgeta Narafala Oli Stap Mared Be i No Mi?

“Mi mi wantem tumas blong mared. Olsemia, bambae mi save hapi.”​—Cheryl.a

YUMI evriwan i gat tingting ya blong wantem mared. God i mekem man mo woman long fasin we tufala i intres long tufala. Mo hem i stanemap mared olsem wan rod blong joenem wan man mo wan woman blong olwe.​—Jenesis 1:​27, 28; 2:​21-24.

Taswe, i no wan sapraes we yu harem nogud, no maet yu harem se yu defren long ol narafala, sipos yu no mared yet​—antap moa, sipos bighaf blong ol fren blong yu oli mared finis. Maet sam narafala fren oli ting se oli stap givhan long yu, be oli jes mekem yu yu wari moa. Tina i talem se: “Mi mi gat 24 yia, mi no mared, mo mi no stap fren wetem wan man. I luk olsem we ol narafala oli wari long mi from we mi mi no mared yet, nao oli stap mekem mi mi harem nogud from. Oli mekem mi mi harem olsem se mi wan olfala woman, mo se wan samting i rong long mi.”

Long samfala, fasin blong stap olgeta nomo i save kam olsem wan wol, wan fenis we oli no save karemaot, we i blokem olgeta blong oli no glad. Evri yia we i pas, i olsem we oli putum moa simen antap long wol ya. Maet wan yangfala i save stat blong harem se hem i no naes mo i no gat man we i save laekem hem. Wan yangfala woman long Itali we nem blong hem Rosanna, i talem se: “Plante taem mi harem nogud blong stap mi wan mo mi harem olsem nating nomo. I luk olsem we mi mi no gat wan jans nating blong mi save mared.” Ol yangfala man oli save gat ol filing ya tu. Wan eksampel, Frank i harem se taem ol fren blong hem oli mared oli kam waes moa, mo ol narafala oli intres moa long olgeta. Hem i stat tingting se sipos hem i mared, maet hem tu i save kam olsem.

?Yu yu faenem se yu gat tingting olsem? Sipos yu no mared yet, ?samtaem yu gat tingting ya se maet wan samting i rong long yu, no maet bambae yu yu stap yu wan blong ful laef blong yu?

Mared​—Gyaman Tingting Mo Trutok

Fastaem, yumi traem luklukgud long tingting ya we plante man oli gat, se mared i openem doa i go long rod blong kasem glad. I tru se mared i save givim glad, mo plante taem samting ya i kamtru. Be, i no minim se wan man i mared nao i kasem glad olsem nomo. Nating se wan mared i nambawan, be i mas gat ‘trabol long laef blong tufala.’ (1 Korin 7:28) Glad insaed long mared i save kam nomo taem tufala i rere blong livim sam samting we tufala nomo i wantem mo wok had oltaem. I gud blong makem tu se, man we i hae moa long olgeta man we oli laef long wol, Jisas Kraes, i no mared. ?Yumi save talem se hem i no glad? !No gat! Hem i glad from we hem i mekem wok blong Jeova.​—Jon 4:34.

Wan narafala gyaman tingting, hemia se mared i save winim fasin blong harem nogud blong stap yu wan nomo. !Samting ya i no tru! Wan Kristin man we i mared i harem nogud nao i talem se: “!Woman blong mi i neva talemaot long mi olgeta samting we i stap haed long tingting blong hem, mo hem i neva storeyan wetem mi long ol dip filing blong hem, !neva!” Samfala Kristin waef oli talem semfala tok se hasban blong olgeta i no stap toktok wetem olgeta, mo hem i intres moa long wok mo ol fren blong hem. Sore tumas blong talem be, plante man we oli mared oli harem nogud, from i olsem se oli stap olgeta nomo.

Mo tu, i gat olgeta we oli ting se mared i wan rod blong ronwe long ol problem long famle blong olgeta. Wan yangfala woman we i mared i talem se: “Mi ting se papa mama blong mi tufala i mas givim jans long mi blong gruap. Be oli no letem mi blong gat wan boefren no blong goaot wetem ol fren blong mi . . . Sipos oli bin givim jans ya long mi, ating mi no save mared taem mi gat 16 yia nomo. Mi mekem olsem from mi wantem soem long olgeta se mi mi bigwan finis.”

Maet yu harem se i gat tumas rul long famle blong yu. Be, i gat sam wok insaed long mared tu we oli blokem yu long sam samting, mekem se yu no fri olgeta. !Tingbaot se bambae yu mas wok blong winim mane, pem ol kaon, fiksimap haos mo trak blong yu, kuk, klinim ples, wasem klos, mo maet lukaot long sam pikinini tu! (Proveb 31:​10-31; Efesas 6:4; 1 Timote 5:8) Plante yangfala oli sek taem oli kasem olgeta wok ya blong ol bigman.

Samfala oli bilif se sipos oli mared, hemia rod blong faenem plante fren. Be i no from we yu mared se bambae ol man oli wantem joen wetem yu​—mo wetem hasban no waef blong yu. Ol man bambae oli laekem yu sipos yu kaengud, yu glad blong givim presen, mo yu no tingbaot yu wan nomo, i no from we yu mared no yu no mared. (Proveb 11:25) Mo nating se i isi moa long hasban mo waef blong joengud wetem ol fren blong olgeta we oli mared, be tufala i no mas fogetem se naoia tufala i olsem “wan bodi nomo.” (Jenesis 2:24) Samting we i mas impoten moa long tingting blong tufala, hemia blong joengud tugeta​—i no wetem ol fren blong tufala.

?Yu Yu Rere Blong Mared?

Be, nating se yu luksave we olgeta poen ya oli tru, maet samtaem yu harem se tingting blong yu i foldaon yet. Wan waes tok blong bifo i talem se: “Samting we yu putum tingting blong yu i stap strong long hem be taem hem i no kamtru, bambae i mekem hat blong yu i trabol.” (Proveb 13:12) Wan eksampel, yangfala Tony i faenem se tingting blong hem i foldaon olgeta from we hem i no mared yet. Hem i stat blong tingting se hem i rere blong mared wetem eni gel. Wan yangfala gel tu we nem blong hem Sandra, i harem nogud evri taem wan gel i stap fren wetem wan boe. Hem i stap tingbaot wetaem nao bambae jans blong hem i kam.

Bifo we tingting blong yu i foldaon, askem long yu wan se, ‘?Mi mi rili rere blong mared?’ !Blong talem stret, sipos yu no gat 20 yia yet, maet ansa long kwestin ya i klia se no gat! Long Yunaeted Stet, bighaf blong ol mared blong ol yangfala we oli no gat 20 yia yet, oli finis bifo we faef yia i pas.b I tru, maet sam yangfala oli bigman long tingting blong olgeta nating se oli yang yet, mo maet oli naf blong mekem mared blong olgeta i stanap strong. Be samting ya i no min se yu yu mas mared. ?Yu yu tingbaot finis sipos yu naf blong mekem ol wok insaed long mared?

Sipos yu luklukgud long fasin blong yu wan, maet yu luksave plante samting. Olsem se, ?yu yu bigman long saed blong tingting, mo yu yu naf blong mekem ol stret disisen mo folem olgeta? ?Yu yu naf blong sevem mane blong yu, no yu westem ol mane ya kwiktaem nomo afta we yu kasem? ?Yu yu kwik blong pem ol kaon blong yu? ?Yu yu naf blong holemtaet wan wok mo blong lukaot long wan famle? ?Yu yu joengud wetem ol man raonabaot long yu, olsem ol man we oli wok wetem yu, papa mama blong yu, no yu stap rao oltaem wetem olgeta? Sipos yes, maet yu faenem se i hadwok blong joengud wetem hasban no waef blong yu.

Sipos yu yu no gat 20 yia yet, maet yu luksave se yu nidim sam moa yia blong kam bigman long tingting blong yu, mo blong gat ol fasin we oli no olbaot nomo. Hemia samting we yu nidim blong kam wan gudfala hasban no waef. Taem yu luksave trutok ya, samting ya i save givhan long yu blong stretem sam rong tingting we yu gat long saed blong mared, mo mekem yu yu tingbaot mared olsem wan samting we i save kamtru long fyuja nomo. Samting ya i save halpem ‘tingting blong yu blong stap kwaet’ taem yu no mared yet, nating se long fyuja maet bambae yu mared.​—1 Korin 7:37.

Reregud

Be ?olsem wanem sipos yu ting se yu “pastru long yang taem” blong yu finis, mo naoia yu harem se yu rere blong mared? Maet i mekem tingting blong yu i foldaon sipos i no gat wan man no woman blong mared wetem, no sipos evri taem yu askem wan be hem i no intres long yu. ?Samting ya i minim se i no gat wan we i wantem yu? No gat. King Solomon i no winim hat blong wan yangfala gel we hem i laekem tumas​—!mo hem i wan man we i rij tumas, mo i waes tumas! ?Wanem problem i stap? Gel ya i no gat filing long hat blong hem long Solomon. (Sing blong Solomon 2:7) Long sem fasin, maet yu yu no mitim hemia we i stret long yu yet.

?Yu yu harem se yu no naes inaf blong pulum ae blong wan narafala? I tru se, blong luk naes i save pulum narafala, be hemia i no wan samting we i impoten tumas. Taem yu luk ol fren blong yu we oli mared finis, ?yu luk se i gat sam oli bigwan, sam oli smol, sam oli bunbun sam oli fatfat, sam oli naes mo sam oli no naes tumas? Mo tu, wan we i rili fraetgud long God, bambae hem i tingbaot fasin “we i stap haed insaed long hat” blong yu olsem samting we i impoten moa.​—1 Pita 3:4.

Be, samting ya i no min se yu no mas kea long bodi mo fes blong yu. I stret nomo we yu wantem luk naes. Ol klos mo hea we oli doti mo olbaot oli save givim rong tingting long ol narafala long saed blong yu.c Mo tu, sipos yu no traehad blong storeyangud wetem ol narafala mo yu gat ol fasin we oli no stret, bambae yu mekem ol narafala oli gowe long yu nating se oli no savegud yu yet. Wan fren we i bigman long tingting blong hem, no papa mama blong yu, oli save talem stret long yu ol samting we yu nidim blong jenisim. Maet yu harem nogud taem yu save trutok long saed ya, be sipos yu agri long wanem we oli talem, bambae i halpem yu blong stretem ol rong ya, mo bambae ol narafala oli laekem yu moa.​—Proveb 27:6.

Taem yu ademap olgeta save ya, bambae yu luk se ol man oli no tingbaot sipos yu mared no no gat, blong jajem se yu sas no yu impoten long tingting blong olgeta. Samting we i moa impoten, hemia olsem wanem God i stap tingbaot yu. Hem i “luk wanem i stap long hat” blong yu. (1 Samuel 16:7) Taswe, samting we yu mas tingbaot moa i blong mekem Jeova i agri long yu, i no blong traem mared. Yu no mas letem mared i kam bigfala samting long tingting mo toktok blong yu. Lukaotgud long wanem kaen fren, myusek mo pleplei yu jusum.

I tru, filing ya we yu wantem mared maet i no save lus, be yu no mas wari. Wokem fasin ya blong gat longfala tingting. (Eklesiastis 7:8) Bitim we yu harem nogud from we yu no mared yet, yusumgud jans ya we yu gat taem yu stap yu wan, mo yu fri blong mekem wok blong God we i no gat narafala samting i pulum yu. (1 Korin 7:​33-35, 38) Maet bambae yu mared samtaem long fyuja​—mo maet samting ya i kamaot kwiktaem moa bitim we yu tingbaot.

[Ol Futnot]

[Tok Blong Pija Long Pej 30]

I isi blong harem se yu defren long ol narafala taem ol fren blong yu oli mared