Wan Eksampel Long Stret Fasin Blong Mekem Long Ol Refuji
LONG Loa we Jeova God i givim long ol man Isrel, hem i mekem olgeta oli tingbaot se oli bin stap olsem ol refuji long Ijip. (Eksodas 22:21; 23:9; Dutronome 10:19) Taswe, oli kasem oda se oli mas soem kaengud fasin long ol strenja we oli stap wetem olgeta. Yes, oli mas mekem long olgeta olsem we oli ol brata blong olgeta.
Loa blong God i talem se: “Sipos wan man blong narafala kantri [we plante taem hem i wan refuji] i stap wetem yufala olsem wan strenja long kantri blong yufala, yu no mas mekem nogud long hem. Strenja we i stap wetem yufala, yu mas mekem long hem olsem we hem i wan manples blong yufala. Yu mas laekem hem olsem we yu laekem yu, from we yufala tu i bin stap olsem ol strenja long kantri blong Ijip.”—Levitikas 19:33, 34.
Jeova i luksave se i isi blong ol man oli mekem nogud long ol strenja, nao ol strenja oli harem se oli no stap sefgud. Taswe, Jeova i givim ol klia loa blong givhan long olgeta mo blong lukaotgud long olgeta. Tingbaot ol raet we loa i givim long olgeta.
RAET BLONG KASEM STRET JAJMEN LONG KOT: “I mas gat wan fasin nomo blong jajem yufala. Yufala i mas yusum sem fasin blong jajem ol man blong narafala kantri olsem we yufala i yusum blong jajem ol manples.” “Yufala i no mas jajem wan strenja long fasin we i kruked.”—Levitikas 24:22; Dutronome 24:17.
RAET BLONG KASEM HAF BLONG WAN HIF BLONG OL TEN HIF WE OL MAN OLI GIVIM OLSEM PRESEN: “Long en blong tri yia, yufala i mas karem wan hif blong ol ten hif blong kakae we yufala i karem long garen long yia ya, ale yufala i mas putum i stap insaed long get. Nao ol Livaet, we oli no gat graon olsem yufala, mo olgeta we oli stap wetem yufala, olsem ol man blong narafala kantri, ol pikinini we oli no gat papa, mo ol wido, oli save kam, mo oli save kakae mo haremgud.”—Dutronome 14:28, 29.
RAET BLONG KASEM PEI WE I STRET: “Yu no mas rabem wan man blong wok blong yufala, we hem i trabol mo hem i pua, nating se hem i wan brata blong yu no wan man blong narafala kantri we i stap long kantri blong yufala, insaed long get blong yufala.”—Dutronome 24:14.
MAN WE I KILIM MAN I DED BE I NO MINIM, HEM I GAT RAET BLONG HAED: “Long saed blong ol man Isrel mo ol man blong narafala kantri, mo ol man we oli kam stap wetem olgeta, ol sikis taon ya bambae oli kam olsem ples blong haed blong olgeta. Man we i kilim narafala man i ded be i no minim, hem i save ronwe i go haed long ol taon ya.”—Namba 35:15.
RAET BLONG PIKIMAP OL HAF KAKAE WE I STAP LONG GAREN: “Taem yufala i karem ol kakae long garen blong yufala, yufala i no mas karem kakae we i stap kolosap long en blong garen olgeta, mo yufala i no mas karem ol haf kakae we i foldaon long graon. Mo tu, yufala i no mas hivimap ol haf kakae we i stap afta we yufala i karem ol frut blong mekem waen long hem, mo yufala i no mas pikimap ol wanwan frut ya we oli stap olbaot long garen. Yufala i mas livim olgeta blong ol puaman mo ol man blong narafala kantri oli save karem. Mi mi Jeova, God blong yufala.”—Levitikas 19:9, 10.
Yes, Man we i Wokem yumi, Jeova God, i gat sore long ol refuji. Mo hem i glad taem yumi sore long olgeta tu. Kristin aposol Pol i raetem se: “Yufala i mas traehad blong folem fasin blong [God]. Yufala i mas laekem ol man tumas.”—Efesas 5:1, 2.
[Foto Credit Line blong pija long pej 9]
Boy on left: UN PHOTO 159243/J. Isaac