Winim Sore Long Paoa Blong Jeova

MAN BLONG WEKAP! LONG SPEN I RAETEM STORE YA

LONG Febuwari long yia ya, plante Wetnes blong Jeova long kongregesena blong Balen long Spen, oli spenem wan nambawan dei tugeta long ol hil blong Siera Nevada we oli stap kolosap. Be long rod blong kamhom, samwe long 5 kilomita aot long ples blong olgeta, wan trak we i stap kam fored blong bas we olgeta oli stap insaed long hem, i krosem rod, i kam long saed we bas i stap ron long hem, ale i smasem fored blong bas. I olsem we wan bom i faerap, mo faea i laet long bas. Samfala long bas oli save jyamaot kwik, be plante we oli stap insaed long bas biaen, oli no moa save pulum win from smok blong faea ya, nao oli ded.

Twante-sikis Wetnes evriwan oli ded, wetem fo we oli stap prij fultaem mo plante pikinini​—kolosap 25 pesen blong kongregesen blong Balen. King blong Spen, Juan Carlos, i talemaot tingting blong bighaf blong ol man Spen, taem hem i raetem wan telegram i go long mea blong Balen. Hem i se: “Mifala i harem nogud nyus blong akseden ya. Mifala i sanem trufala sore blong mifala. Plis talemaot dip sore mo tingting blong mifala i go long ol famle we oli lusum wan long ded, long taem ya we oli harem nogud tumas.”

Wan kwestin we i stap long tingting blong sam long ol taosen man we oli go blong berem olgeta, hemia se, ?From wanem ol akseden olsem oli hapen? I klia se ol man blong Jeova tu oli save kasem wan akseden olsem ol narafala man, from we “ol taem mo ol samting we yumi no tingbaot” oli save kamaot. (Eklesiastis 9:​11, 12) Nating se i olsem, Jeova i promes se kolosap nao, bambae i no moa gat ol akseden olsem.​—Revelesen 21:​4, 5.

Plante we oli wok long hedkwota blong ol Wetnes blong Jeova long Spen, mo plante taosen Wetnes we oli kam long ol narafala ples long kantri, oli mekem trep i go long Balen blong leftemap tingting mo sapotem ol brata long ples ya. Ol man blong Balen, wetem ol haeman blong taon ya mo eria ya, olgeta tu oli joen blong soem sore blong olgeta long ol Wetnes famle ya. Plante oli sapraes we ol Wetnes ya we oli lusum sam famle blong olgeta, oli soemaot strong tingting.

Mea blong Balen, Antonio Gómez i talem se: “Mi mi save ol Wetnes blong plante yia finis. Nating se mi no bilif long paoa blong God, be mi tinghae long bilif blong yufala. Taem akseden ya i hapen, wantaem nomo mi tingbaot se fasin blong yufala blong joengud olsem wan skul mo olsem wan grup blong man, bambae i givhan long yufala blong winim trabol ya, i bitim ol narafala grup. Mi luk olsem wanem olgeta man long taon ya oli sapotem ol famle we oli stap harem nogud from we sam long olgeta i ded. Ating bifo, maet samfala oli gat narakaen tingting long saed blong yufala, be mi glad blong talem se ol tingting olsem oli lus finis. Yufala i gat wan paoa insaed long yufala, we i hadwok long ol narafala we oli no Wetnes blong kasem save long hem.”

José Borrell we hem i minista blong pablik wok, i go blong berem ol dedman, olsem man we gavman blong Spen i sanem hem. Nao hem i talem se: “?Yu save talem wanem long wan man we hem i lusum kolosap olgeta memba blong famle blong hem wantaem nomo? Yu no save talem wan tok we i mekem hem i haremgud bitim samting we hem i gat finis long bilif blong hem. . . . Yufala i gat wan nambawan bilif.”

“Yufala i Mas Stap Toktokgud Long Yufala”

?Wanem samting we oli “gat finis long bilif” blong olgeta? Samting we i impoten moa bitim ol narafala samting se, Jeova i givhan blong mekem olgeta oli haremgud, from we hem i ‘Papa blong yumi we i gat sore, mo i givhan long yumi long olgeta trabol blong yumi.’ (2 Korin 1:​3, 4) Nating se oli harem nogud, oli faenem paoa blong leftemap tingting blong narafala. Oli folem tok blong Pol we i go long ol man Tesalonaeka, i se: “Yufala i mas stap toktokgud long yufala blong mekem tingting blong yufala i strong, mo yufala i mas givgivhan long yufala.”​—1 Tesalonaeka 5:11.

Sam long ol Kristin brata mo sista oli bin lusum go kasem eit famle blong olgeta. I pulum filing blong plante man, taem oli luk we ol brata mo sista ya oli go visitim ol narafala long kongregesen we olgeta tu oli bin lusum sam famle blong olgeta. Presiden elda, Francisco Saez, we hem i bin lusum tufala pikinini nomo we hem i gat, i eksplenem se: “Taem mifala i joen wanples, mifala evriwan i krae. Be wetem ol wora long ae blong mifala, mifala i stap tokbaot hop blong laef bakegen, mo samting ya i leftemap tingting blong mifala.”

“Mifala i no fogetem wok blong prij blong mifala. Mo mifala i bin mekem spesel visit long ol famle we oli no Wetnes we wan blong olgeta i ded. Mifala i karem buklet ya When Someone You Love Dies.” Francisco i gohed se: “Long saed blong mi wan, mi wantem blong prij, from we mi save se taem mi prij long ol narafala bambae mi haremgud moa. Mo i tru, nating se mi stap krae taem mi aot long haos blong mi, be taem mi kambak mi haremgud.”

Ol man long taon blong Balen oli lesingud taem ol Wetnes oli go prij long olgeta. Wan wik biaen long akseden ya, Encarna, we hem i stap harem nogud from we hem i lusum tufala gel blong hem wetem fo smol bubu, i visitim wan woman we hem i jes stat blong stadi Baebol wetem hem. Encarna i bin leftemap tingting blong woman ya wetem ol tok blong Baebol, from we hasban blong woman ya i ded fo manis bifo. Woman ya i talem se: “Naoia, yumitu i mas leftemap tingting blong yumitu.” Mo tufala i gohed blong stadi long buk ya When Someone You Love Dies.

Wantaem nomo, olgeta brata long olgeta ples blong wol oli givhan. Francisco Capilla we hem i sekretari blong kongregesen, i talem se: “Olgeta evriwan long kongregesen oli haremgud long plante taosen leta mo telegram we mifala i kasem. Evri dei, posofis i sanem wan bigfala trak i kam long haos blong mi, blong karem ol leta ya i kam. Mifala i talem bigfala tangkyu long ol brata ya we oli tingbaot mifala wetem lav.”

Trabol Ya i Givim Hop

?I gat wan gudfala samting i save kamaot long wan nogud akseden olsem? King Solomon blong bifo i raetem se: “Hat blong ol waes man i stap long haos blong krae from ol dedman.” (Eklesiastis 7:4) Folem tingting ya, akseden long Balen i mekem samfala oli tingting hevi moa long fasin fren blong olgeta wetem God. Faustino, wan hasban we i no gat bilif, we hem i lusum tu long ol sikis pikinini blong hem long akseden ya, i talem long woman blong hem Dolores, we hem i wan Wetnes, se: “Mi gat sam gud nyus blong talem long yu. Bambae mi stadi long Baebol, from we mi wantem luk tufala pikinini ya blong mi bakegen long nyufala wol.”

Nating se bambae i tekem longtaem blong ol brata mo sista blong Balen oli winim sore blong olgeta, be oli stap leftemap tingting blong ol narafala mo ol narafala oli stap mekem olgeta oli haremgud tu. Jeova i stap givim paoa long olgeta tru long tabu speret blong hem, mo tru long fasin blong plante brata mo sista blong givhan long olgeta wetem lav. Yumi stap gohed blong prea long Papa blong yumi long heven from olgeta ya.

[Futnot]

[Tok Blong Pija Long Pej 28]

Fo long olgeta we oli ded