801 Mi Stap Laef Tru Long Akseden Blong Plen

TAEM plen i godaon long Guam, mi lukluk afsaed long windo. Mi tingting se ‘I narakaen, ples i tudak tumas.’ Tru, medel naet i pas finis mo bigfala ren i mekem se man i no save lukluk klia. Be, ?ol laet blong aelan mo epot oli stap wea? Mi save luk nomo ol laet blong plen blong mifala.

Wan wokman blong plen i talemaot long maekrofon se plen i rere blong godaon, mo mi harem noes we ol wil blong plen oli mekem taem oli goaot. Wantaem nomo, i gat wan bigfala noes taem plen blong mifala i skrasem graon. Plen i stap seksek olbaot, mo ol pasenja oli holemtaet jea blong olgeta mo oli singaot bigwan se, “?Wanem i stap hapen?”

Biaen, from wan mastik blong paelot, plen blong mifala i bangem wan hil 5 kilomita bifo long epot. From samting ya, long Ogis 6, 1997, i gat 228 pasenja mo wokman oli ded. Mi mi wan long ol 26 man we oli stap laef.

Bifo we mi tekem plen long Seul, Koria, wan man blong kampani blong plen i jenisim ples we mi sidaon long hem, mo i putum mi long laswan jea blong fas klas long plen. Mi mi glad tumas, ale mi telefon long waef blong mi, Soon Duck, we bambae i kam tekem mi long epot long Guam. Jenis ya i karem wan bigbigfala blesing long mi moa i bitim wanem we mi save tingbaot.

Akseden Mo Samting We i Hapen Biaen

Ol paelot oli no save lukluk klia from we weta i nogud tumas, ale oli no luksave se denja i stap kam. !Evri samting i hapen kwiktaem tumas! Jes bifo, mi stap rerem mi wan blong samting we i nogud tumas, mo nekis samting we mi save se, mi stap long graon afsaed long plen, mo mi stap yet long jea blong mi. Mi no sua sipos mi wekap no nogat.

Mi ting se mi stap drim. Be taem mi luksave se i no wan drim, mi tingbaot waef blong mi. Biaen, hem i talem long mi se hem i neva lusum hop se mi stap laef. Nating se hem i harem long epot se seven pasenja nomo oli laef, hem i bilif se mi mi wan long ol seven man ya.

Plen blong mifala i brok long fo haf mo ol bodi blong ol man oli stap olbaot long graon. Sam haf blong plen oli bon long faea, mo sam samting oli bosta, nao mi harem we sam man oli kraeaot bigfala se “!Halpem mi! !Halpem mi!” Jea we mi stap long hem i foldaon long gras we i hae olsem 2 mita. Mo, from laet blong faea long ples ya we i tudak, mi luk wan hil we i kolosap. Hem i 2 klok long moning, mo ren i stap foldaon.

From we mi mi sek tumas mi no tingbaot sipos mi bin kasem kil. Be, taem mi luk wan yangfala gel we skin blong hed blong hem i stap hang long bak blong hem, wantaem nomo, mi tajem hed blong mi. Mi faenem se i gat blad from wan kil we mi kasem antap long lefsaed blong ae blong mi. Mi stat jekem ol narafala haf blong bodi blong mi mo mi faenem plante moa smosmol kil. Tangkyu tumas we mi no gat bigfala kil. Be, tufala leg blong mi i soa tumas from we tufala i brok, mekem se mi no naf blong muf nating.

Biaen, taem mi kasem hospital, ol dokta oli talem se kil blong mi i “no impoten.” Mo samting ya i tru taem mi skelem wetem ol narafala man we oli laef i stap afta long trabol ya. Wan man we oli pulumaot long plen ya i no moa gat tufala leg blong hem. Sam narafala oli safa from we oli bon long faea, mo tri long olgeta we oli laef tru long trabol ya, oli ded sam wik biaen we oli harem i soa tumas.

Faea i Mekem Mi Mi Wari

I bitim we mi tingbaot ol kil blong mi, mi mi tingbaot moa sipos i gat sam man we bambae oli save faenem mi long stret taem. Medel haf blong plen we jea blong mi i bin stap long hem, i brokbrok olgeta. Ol haf blong plen we oli stap yet oli bon long faea, mo sam pasenja we oli fas i stap insaed oli harem i soa tumas bifo we oli ded. Bambae mi neva fogetem se oli krae bigwan blong kasem help.

Jea blong mi i slip kolosap long nus blong plen. Mi stap kolosap tumas long ol haf blong plen we oli brokbrok. Taem mi tanraon, mi luk faea. Mi fraet se kolosap nao faea i kasem mi, be laki nomo se samting ya i no kamtru.

!Oli Sevem Mi!

Taem i stap go sloslou, bitim wan haoa i pas. Biaen, long 3 klok long moning, sam man oli faenem ples we plen i foldaon long hem. Mi save harem olgeta oli toktok antap long hil, oli sapraes tumas long wanem we oli luk. Wan long olgeta i singaot se: “?I gat man long ples ya?”

Mi singaot bigfala se: “Mi stap ya.” Sam narafala pasenja tu oli singaot se “!Halpem mi!” Wan man we i kam blong sevem mifala i kolem wan narafala se “Ted.” Taswe mi stat kraeaot se “!E Ted, Mi stap long ples ya!” mo “!Ted, kam halpem mifala!”

Ansa we mi kasem hemia se “!Mifala i stap kamdaon! Yufala i wet.”

Bigfala ren i sevem plante man blong oli no ded long faea. Be, ren ya i mekem tu se graon i glis tumas, ale, ol man we oli kam blong sevem mifala oli hadwok lelebet blong kamdaon long hil. From samting ya, wan narafala haoa i pas bifo we oli kasem mifala we i laef i stap. Long tingting blong mi, taem we oli tekem blong kam kasem mi, i longfala tumas.

Tu man we oli kam wetem tojlaet oli talem se: “Mitufala i stap. Yu no mas fraet.” Biaen, tu narafala man oli kam, mo olgeta ya tugeta oli traem seftem mi. Tu i holem han blong mi, mo ol narafala oli holem leg blong mi. Mi harem i soa tumas taem oli karem mi olsemia, antap moa taem oli stap glis long sofmad. Smoltaem biaen, oli stop, wan long olgeta i go tekem wan bed mo oli putum mi long hem. Oli tekem mi mi go long ples we helikopta blong ami i stap, blong hem i save karem mi i go antap long hil. Nao, trak blong hospital i save tekem mi.

!Mi Luk Waef Blong Mi!

Mi kamtru long hospital long haf pas faef long moning. Ol dokta oli no letem mi mi yusum telefon from we ol kil blong mi oli bigwan tumas. Taswe, long haf pas ten long moning ya, waef blong mi i jes faenemaot se mi mi laef i stap tru long trabol ya, hemia kolosap naen haoa afta we plen i foldaon. Hem i lanem se mi stap laef from wan fren i bin luk nem blong mi long lis we i soem nem blong ol man we oli laef i stap.

Taem oli letem waef blong mi i kam luk mi long 4 klok long aftenun, mi no luksave hem fastaem. Tingting blong mi i no kliagud from ol meresin we mi tekem blong mekem soa i godaon. Ol fas tok blong hem se, “Tangkyu blong stap laef.” Mi no rimemba storeyan blong mitufala, be biaen oli talem we mi bin ansa se: “Yu no mas talem tangkyu long mi. Yu mas tangkyu long Jeova.”

Holem Ol Impoten Samting Long Stret Ples Blong Olgeta

Taem mi stap kamgud bakegen long hospital, soa blong mi i sem mak long wan samting we mi bin kasem finis bifo. Long 1987, wan yia bifo we mi lego Koria blong go long Guam, mi gat wan akseden. Mi foldaon long wan platfom we i hae olsem fo store mekem se tufala leg blong mi i brok. Samting ya i jenisim laef blong mi. Plante taem, fasbon sista blong mi we i wan Wetnes blong Jeova, i bin talem long mi blong stadi Baebol. Mi gat jans blong mekem samting ya long sikis manis we mi spel blong kamgud bakegen. From samting ya, long sem yia ya, mi naf blong givim laef blong mi i go long Jeova God mo soemaot samting ya taem mi tekem baptaes long wora.

Afta long akseden ya blong plen, mi stap tingbaot wan vas we mi laekem tumas, se: “Fastaem yufala i mas lukaot kingdom blong God mo stret fasin. Nao biaen, hem i save givim olgeta samting ya tu long yufala.” (Matyu 6:33, NW) Taem mi kamgud bakegen afta we plen i akseden, mi gat jans blong tingting bakegen long laef blong mi.

Akseden blong Plen 801 i makemgud long tingting blong mi se laef i sas tumas. !Mi save ded isi nomo! (Eklesiastis 9:11) Blong fiksimap bodi blong mi, oli katem mi plante taem, mekem se mi stap bitim wan manis long hospital blong kam strong bakegen.

Naoia, mi wantem soem long Man we i Wokem yumi se mi tangkyu tumas long nambawan presen blong laef we hem i givim long yumi. Mo tu, mi gat tangkyu se hem i mekem plan blong sam man oli save kasem laef blong olwe long wan paradaes long wol. (Ol Sam 37:9-11, 29; Revelesen 21:3, 4) Mi luksave se beswan rod blong soem fasin tangkyu, hemia blong gohed blong lukaot Kingdom blong God fastaem long laef blong mi.—Wan man i raetem store ya.

[Foto Credit Line blong pija long pej 15]

US Navy/Sipa Press