Ol Yangfala Oli Askem . . .

?Olsem Wanem Mi Save Mekem Trutok i Wan Haf Long Laef Blong Mi?

“!Mi gruap olsem wan Witnes blong Jeova, mo mi ting oltaem se sipos mi bon olsemia mi save Jeova finis. !Be tingting ya i giaman nomo!”—Antoinette.

“?WANEM ya trutok?” Ponjes Paelet, man we i letem Jisas i go long han blong ol enemi blong oli kilim hem i ded, i askem kwestin ya. (Jon 18:38) Be, i klia se Paelet i askem kwestin ya blong blokem toktok, i no blong storeyan gud. Hem i no intres nating long “trutok.” Be, ?olsem wanem long yu? ?Yu yu intres long trutok?

Long ol handred yia we oli pas, ol man blong hae save oli tingting dip blong faenem se wanem ya trutok. Nating se oli traehad, oli no kasem wan samting. Be, yu yu save faenem ansa long kwestin blong Paelet. Jisas Kraes i tijim se Tok blong God i trutok. Hem i talem tu, se hem wan i “trutok.” Mo aposol Jon i raetem se: “Trutok i kamtru long Jisas.” (Jon 1:17, NW; 14:6; 17:17) Taswe, olgeta Kristin tijing, we biaen oli kam wan haf blong Baebol, oli karem nem ya se “trutok,” no “trutok blong gud nius ya.” (Taetas 1:14; Galesia 2:14; 2 Jon 1, 2) Ol Kristin tijing ya oli eksplenem prapa nem blong God, olsem wanem Kingdom blong God i stanap, mo ransom blong Jisas.—Ol Sam 83:18; Matiu 6:9, 10; 20:28; Jon 5:28, 29.

Plante taosen yangfala oli lanem trutok blong Baebol wetem ol papa mama blong olgeta. Be, ?samting ya i minim se ol yangfala ya oli stap “folem ol tok we i tru”? (3 Jon 3, 4) I no oltaem. Eksampel, tingbaot Jennifer we i gat twanti yia nao. Hem i gruap olsem wan Witnes blong Jeova. Hem i rimemba se: “Mama blong mi i karem mi i go long ol asembli blong ol Witnes, mo hem i talem se mi mas tingbaot baptaes. Be mi tingting long mi wan se ‘Neva mi wantem kam wan Witnes. !Mi wantem pleplei nomo!’ ”

Sam yangfala oli bilif long ol tijing we oli lanem, be oli no rili kasem dip save long saed blong ol tijing ya. ?Wanem denja i save kamaot from? Jisas i talem se sam man “oli olsem gru we rus blong hem i no naf.” Ating “oli save stap blong smoltaem, be taem oli gat hadtaem, no taem sam man oli ronem olgeta from tok ya, bambae oli foldaon wantaem.” (Mak 4:17, NW) Sam narafala oli save eksplenem ol stamba tijing blong Baebol, be oli no lan blong frengud wetem God. Aneesa wan yangfala woman i talem se: “Taem mi smol yet, mi no ting se mi gat wan trufala fasin blong frengud wetem Jeova . . . Ating mi folem papa mama blong mi nomo, from we tufala i gat fasin frengud wetem Jeova.”

?Olsem wanem long yu? ?Jeova i God blong papa mo mama blong yu nomo? ?Yu yu naf blong talem olsem man we i raetem sam ya se: “Jeova, mi mi trastem yu. Mi talem se, ‘Yu yu God blong mi’ ”? (Ol Sam 31:14) I nidim strong tingting blong luksave samting ya. Alexander wan yangfala man, i talem se: “Faswan samting we mi mekem, hemia blong skelem laef blong mi.” Afta we yu skelem tingting blong yu wan, maet yu luksave we yu neva bin pruvum trutok (hemia ol Kristin tijing) long yu wan. Maet yu no gat strong tingting long wanem we yu lanem, taswe ating yu no putum sam mak blong kasem long laef blong yu, i no rili gat wan samting i stap lidim yu.

Long Kristin miting blong ol Witnes blong Jeova, oli singsing long sing ya se “Yumi Soem Rod Blong Trutok Long Ol Man.”a Ating tok blong singsing ya i stret long yu. Be, ?olsem wanem yu save mekem samting ya? ?Olsem wanem yu save stat blong pruvum trutok long yu wan?

Pruvum Trutok Long Yu Wan

Long Rom 12:2 (NW), yumi faenem advaes blong aposol Pol se: “Bambae yufala nomo i luksave ol samting we God i wantem, we ol samting ya oli gud, oli mekem man i glad, mo oli stret gud olgeta.” Be, ?olsem wanem yu save mekem olsem? Hemia taem yu kasem ‘ol stret save blong trutok.’ (Taetas 1:1) Ol man blong bifo we oli laef long taon ya blong Berea oli no akseptem trutok long isi rod nomo. Defren olgeta, “evri dei, oli stap ridimgud ol tok blong Baebol, blong faenemaot se ol tok blong tufala i tru no i no tru.”—Ol Wok 17:11.

Wan yangfala Kristin, we nem blong hem Erin, i luksave se hem i nidim blong mekem samting ya tu. Hem i tingtingbak se: “Mi mekem dip stadi. Mi askem long mi wan se, ‘?Olsem wanem mi save se hemia trufala skul? ?Olsem wanem mi save se i gat wan God we nem blong hem Jeova?’ ” ?From wanem yu no mekem wan program blong yu blong stadi yu wan? Maet yu save stat wetem buk ya Save Blong Lidim Yu Long Laef We i No Save Finis.b Ridimgud hem. Jekemap ol vas we oli stap, mo traem luksave olsem wanem oli joengud wetem ol tok blong buk ya. Taem yu ‘traehad long evri rod, blong kam prapa man blong wok we long fes blong God yu no gat sem long wok blong yu, mo yu kam wan man we yu stap tijim ol man long trutok blong God long fasin we i stret gud,’ ale, maet bambae yu sapraes blong luk se tingting we yu gat long saed blong trutok, i jenis.—2 Timoti 2:15.

Aposol Pita i talem se i gat sam samting long Baebol we “i strong blong save,” mo bambae yu luksave se samting ya i tru. (2 Pita 3:16) Be, tabu spirit blong God i save givhan long yu blong kasem save long ol tok, nating se oli dip olsem wanem. (1 Korin 2:11, 12) Taem i strong blong yu kasem save long wan samting, yu mas prea blong God i givhan long yu. (Ol Sam 119:10, 11, 27) Traem jekemap ol narafala buk blong Wajtaoa Sosaeti. Sipos yu no save olsem wanem blong mekem samting ya, yu save askem narafala blong i halpem yu. Ol papa mama blong yu no wan bigman long saed blong spirit long Kristin kongregesen,c oli save givhan long yu.

No fogetem se, stadi we yu mekem i no blong soem long narafala se yu gat save. Wan yangfala we nem blong hem Collin i talem se: “Yu lanem ol fasin blong Jeova.” Tekem taem blong tingting dip long samting we yu ridim blong bambae save ya i go dip insaed long hat blong yu.—Ol Sam 1:2, 3.

Joen long ol Kristin miting blong kongregesen. Yes, olsem aposol Pol i raetem, kongregesen i “bigfala pos blong mekem trutok i stap strong, mo i sapotem trutok.” (1 Timoti 3:15, NW) Sam yangfala oli talem se oli les long ol Kristin miting. Be yangfala Collin i mekem yumi tingbaot se: “Sipos yu no mekemrere ol miting, yu no save lanem plante from ol miting ya.” Taswe, rerem ol defren haf blong miting fastaem. Bambae yu save intres moa long ol miting sipos yu givim ansa—i no jes blong lesin.

?Yu No Gat Taem Blong Stadi?

I tru se yu gat plante skul wok mo yu gat sam wok long haos blong mekem tu, taswe ating yu harem se i had blong faenem taem blong stadi. Wan yangfala woman we nem blong hem Susan i raetem se: “Blong plante yia, mi traehad from we mi save se mi mas rerem ol miting mo mekem stadi blong mi wan, be neva mi naf blong mekem samting ya.”

Susan i lanem se hem i mas ‘pemaot taem’ mo lego ol samting we oli no impoten. (Efesas 5:15, 16) Fastaem, hem i raetemdaon olgeta samting we hem i nidim blong stadi. Biaen, hem i makemaot taem blong stadi ol samting ya. Be long program blong hem, hem i makem wan taem blong pleplei tu. Hem i givim advaes ya se: “I nogud blong makem wan taem blong evri samting we yu mas mekem. Yumi evriwan i nidim spel.” I sua se, sipos yu gat wan program, samting ya bambae i givhan long yu tu.

Serem Wanem We Yu Lanem

Sipos yu yusum ol samting we yu lanem, samting ya bambae i givhan long yu blong mekem save ya i stap insaed long yu. Traem tijim wan narafala man. Man we i raetem Ol Sam i talem se: “Maot blong mi bambae i tokbaot ol samting long waes fasin. Mo hat blong mi bambae i tingting dip long ol samting we mi kasem save.”—Ol Sam 49:3, NW.

Sipos yu no sem long gud nius, bambae yu no fraet blong serem gud nius ya wetem ol fren long skul blong yu mo ol narafala we yu joen wetem. (Rom 1:16) Sipos yu tekem jans ya blong tokbaot trutok long ol narafala, bambae yu yusum ol samting we yu lanem; long rod ya i olsem we yu planem trutok long prapa tingting mo hat blong yu.

Lukaot Long Ol Fren Blong Yu

Sam Kristin long faswan handred yia oli gru gud long saed long spirit. Be i no longtaem biaen, aposol Pol i mas raet long olgeta blong askem long olgeta se: “?Hu ya i blokem yufala, nao yufala i no moa save folem trutok?” (Galesia 5:7) Samting ya i hapen long wan yangfala we nem blong hem Alex. Hem i luksave se ol traehad blong hem blong stadi Baebol oli blong nating nomo from we hem i stap “joen plante wetem rabis fren.” Blong yu save gru long saed long spirit maet i nidim we yu mekem sam jenis long kampani blong yu tu.

Defren olgeta, ol gudfala fren oli save givhan long yu blong gru moa. Ol Proveb 27:17 i talem se: “Oltaem, ol man oli stap lanlan long olgeta bakegen, olsem we naef i save sapenem naef.” Faenem sam fren we oli soem gudfala eksampel—hemia olgeta we oli mekem trutok i wok long laef blong olgeta. Maet yu save faenem ol kaen man olsemia long prapa famle blong yu. Yangfala Jennifer i tingtingbak se: “Bubu man blong mi hem i beswan eksampel blong mi. Oltaem hem i spenem tri aoa blong mekemrere Baebol stadi blong kongregesen blong mifala long Sande. Hem i jekem olgeta vas we oli stap long ol defdefren translesen blong Baebol mo hem i traem faenem mining blong ol tok ya long diksonari. Hem i save gud plante smosmol samting long Baebol. Yu save askem enikaen kwestin long hem, mo hem i naf blong givim ansa.”

Taem yu mekem se trutok i wan haf blong laef blong yu, yu kasem wan sas samting, mo yu no save lego hem blong wan narafala samting. Taswe, neva tingbaot trutok olsem “skul blong papa mo mama blong mi.” Yu mas gat strong tingting olsem man we i raetem Ol Sam ya se: “Hae God. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” (Ol Sam 27:10) Sipos yu rili save wanem we Baebol i tijim, yu bilif long hem, mo yu serem bilif blong yu wetem ol narafala, mo antap long ol samting ya, sipos yu mekem laef blong yu i laenap wetem ol tijing ya, ale, bambae yu soem se yu trutok i wan haf blong laef blong yu.

[Futnot]

[Tok blong pija long pej 25]

Pruvum trutok long yu wan taem yu mekem dip stadi