Baebol i Talem Wanem
Fasin Blong Tingting Dip We i Save Givhan Long Yumi
“HAE GOD. YU YU STRONG PLES BLONG HAED BLONG MI, MO YU YU MEKEM MI MI FRI. PREA BLONG MI, WE OL TOK BLONG MI MO OL [“SAMTING LONG HAT BLONG MI WE MI TINGTING DIP LONG OLGETA,” NW ] BAMBAE OLI STRET GUD LONG FES BLONG YU.”—OL SAM 19:14.
?LONG tingting blong yu, i minim wanem blong “tingting dip”? Sipos yu stap folem wan skul blong ol kantri long Is, maet yu bilif se fasin ya i stap mekem ol tingting oli kam klia moa, no i stap givim spesel save. Ol Budis oli sakemaot olgeta samting long tingting blong olgeta blong tingting dip. Sam narafala, oli talem se blong tingting dip, yu mas fulumap tingting blong yu wetem “ol waes we i tru long evri ples long wol.”
Tingting blong Baebol long saed blong fasin ya i defren. ?Olsem wanem? Tingbaot man ya Aesak we Baebol i tokbaot. Taem hem i gat 40 yia, hem i gat plante samting blong tingting dip long olgeta. Jenesis 24:63 i talem se: “Wan dei, taem san i stap godaon, [Aesak] i stap wokbaot long open ples, [“i stap tingting dip,” NW ].” I no gat samting blong talem se Aesak i sakemaot olgeta samting long tingting blong hem, mo se hem i stap tingbaot ‘wan waes we i tru long evri ples long wol’ we i no klia long tingting blong hem. Ating Aesak i gat sam bigfala samting we hem i wantem tingbaot, maet ol yia blong laef blong hem we oli stap kam, ded blong mama blong hem, no hu bambae hem i jusum blong kam woman blong hem. Hem i yusum kwaet taem long sapa blong stap hem wan mo tingting dip, ating long ol impoten samting ya. Baebol i no tokbaot fasin ya blong tingting dip olsem we man i stap drim nomo.
Tingting Dip i Minim Moa
Tingbaot Deved we i raetem plante Sam. Hem i kasem plante bigfala trabol we i had blong winim. Hem i sinman nomo, taswe hem i save se i nidim God blong givhan long hem blong wokbaot stret. ?Wanem i givim paoa long Deved long ol hadtaem ya? Hem i talem long Ol Sam 19:14, se: “Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol [“samting long hat blong mi we mi tingting dip long olgeta,” NW ] bambae oli stret gud long fes blong yu.” Long lanwis Hibru, tok ya we oli tanem i kam “tingting dip,” i minim “toktok long yu wan.” Yes, Deved i ‘stap toktok long hem wan’ long saed blong Jeova, ol wok mo ol bigbigfala samting we hem i mekem, ol loa blong hem, mo stret fasin blong hem.—Ol Sam 143:5.
Long sem fasin, ol faswan Kristin oli makemaot taem blong tingting dip long ol samting long saed blong God. Hemia haf long wosip blong olgeta. Aposol Pol i talem se: “I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.” (Filipae 4:8) I tru, blong tingbaot ol gudfala samting, yumi mas putum ol “fasin” ya we Pol i tokbaot oli go long tingting blong yumi fastaem. ?Olsem wanem?
Man blong raetem Sam i givim ansa. Ol Sam 1:1, 2 i talem se: “Olgeta we oli no wantem folem toktok blong ol man nogud, mo we oli no wantem folem fasin blong olgeta, . . . oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet.” Yes, man we i raetem Sam ya, i ridim loa blong God oltaem. Biaen, hem i tingting dip long ol save mo tijing ya we i kamaot long Bigman We i Wokem hem.
Tingting Dip Tede
I nambawan blong ridim Baebol. Be afta we yumi ridim, yumi mas tingting dip long hem, no “toktok long yumi wan” long ol samting we yumi ridim finis. Blong kasem ol gudfala samting long ol prapa kakae we yumi tekem, bel i mas tantanem gud. Sem mak nao, blong kasem save long ol samting we yumi ridim long Baebol, yumi mas tingting dip long hem. Prapa fasin blong tingting dip i no jes tekemaot ol nogud tingting long hed blong yumi, nogat. Hem i pulum yumi blong tingbaot advaes blong Baebol we i save givhan long yumi blong winim trabol. Tingting dip olsem i save givhan long yumi blong winim ol trabol blong laef evri dei.—Matiu 6:25-32.
Deved i luksave se yumi mas tingting dip blong God i save glad long yumi. Hem i talem se: “Wan stret man i stap talem ol waes tok long smol voes.” (Ol Sam 37:30, NW ) Yes, wan man we i wosip wetem bilif hem i wan man we i stap tingting dip. Sipos God i luk yumi olsem stret man, hemia wan bigfala blesing, mo bambae samting ya i mekem i gud long yumi long saed blong bilif. Blong soemaot samting ya, Baebol i talem se, “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” (Ol Proveb 4:18) Taswe, Kristin ya we i obei mo “i stap talem ol waes tok long smol voes,” i save bilif se save blong hem long Baebol bambae i kam klia moa.
Baebol i talem long yumi blong tingting dip long ol Kristin wok we yumi mas mekem tu. Aposol Pol i talem long Timoti se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu. Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timoti 4:15, 16) Yes, samting we yumi talem mo mekem i save gat bigfala paoa long ol narafala.
I klia se, i gud tumas blong tingting strong mo dip long ol impoten samting. I gud blong tingtingbak long ol samting we oli hapen long yumi long ol yia we oli pas finis, tingbaot ol samting we oli stap kamaot naoia, mo tingting dip long ol yia we bambae oli kam. Be, samting we i moa impoten, i blong tingting dip long bigfala waes blong Man We i Wokem yumi, Jeova God. Olsem nao, tingting dip bambae i givim klia save mo waes long yumi.
[Tok blong pija long pej 26]
“The Thinker,” we Rodin i wokem