Wan Kaen Pijin Long Inglan i Stap Lus

MAN BLONG WEKAP! LONG INGLAN I RAETEM STORI YA

LONGTAEM finis i kam, i gat wan kaen pijin long Inglan we i stap fulap olbaot, i stap singsing oltaem long voes we i smol nomo. Oli kolem pijin ya se ‘spara.’ Be naoia, pijin ya i stap lus long ol taon. Long sam ples, hem i lus wantaem nomo, be ol man oli no save from wanem. Niuspepa ya Independent, long London i wantem givim £5,000 (70,000 vatu) long eniman we i givim stret save blong soemaot from wanem pijin ya i stap lus. Ol man blong Royal Society for the Protection of Birds mo British Trust for Ornithology bambae oli skelem ol save ya. Oli ting se bambae i tekem tu yia blong stadi gud long bisnes ya.

Ol stadi we oli mekem kasem naoia, oli soemaot se pijin ya i lus bigwan long olgeta taon long kantri ya. Long sam ples, i no moa gat pijin ya nating. Be, long plante narafala taon long Yurop, olsem Paris mo Madrid, i gat fulap i stap yet. Dokta Denis Summers-Smith, we i gat bigfala save long pijin ya ‘spara,’ i talem se: ‘Hemia i bitim olgeta narafala trabol we i bin kamaot long ol pijin mo anamol long 50 yia we i pas. Mifala i no kasem save long hem.’

Afsaed long ol taon, 65 pesen blong ol pijin ya oli lus. Oli ting se hemia from we ol man oli katemaot plante bus blong planem garen. Plante narafala pijin tu oli lus long ol ples ya afsaed long taon. Be hemia i no givhan long olgeta blong kasem save from wanem 92 pesen blong ol pijin oli lus long ol taon. Wan man we i stadi long ol samting raonabaot long yumi, nem blong hem Michael McCarthy, hem i talem se pijin ya i lus “from we wan bigfala samting i gorong long ples we hem i laef long hem, mo maet, long ples we yumi laef long hem tu.” Oli no save yet wanem samting stret i gorong, mo se trabol ya i bigwan olsem wanem.