Baebol i Talem Wanem

?Hu Ya Enemi Blong Kraes?

“OLGETA OLI TALEM FINIS LONG YUFALA, SE BAMBAE ENEMI BLONG KRAES I KAMTRU.”—1 JON 2:18.

?SIPOS yu harem nius se wan rabis man blong kilim man i stap kam long ples blong yufala, bambae yu mekem wanem? Ating bambae yu traem save se hem i olsem wanem, mo hem i stap wok olsem wanem. Bambae yu lukaotgud.

Samting olsem i stap hapen tede. Aposol Jon i givim woning long yumi se: ‘Man we i stap talem se taem Jisas i kam long wol, bodi blong hem i narafala, man ya i no gat spirit ya we i kamaot long God i stap long hem. Spirit we i stap long ol man olsem, hem i Enemi blong Kraes. Yufala i harem nius blong spirit ya finis, se bambae hem i kam, mo naoia hem i stap long wol ya finis. (1 Jon 4:3) ?I tru se i gat wan enemi blong Kraes olsem, we i enemi blong God tu mo i stap giaman long ol man blong spolem olgeta?

Jon i yusum tok ya “Enemi blong Kraes” faef taem long tu leta blong hem. Tok ya i minim wan man we i agensem tok blong Baebol long saed blong Jisas Kraes. Hem i minim tu, eni man we i stap giaman se hem nao i Kraes, no Kraes i sanem hem. Baebol i givim ol trufala save long saed blong Enemi ya blong Kraes. Long saed blong ol man nogud, ol man oli lesin moa long ol giaman ripot i bitim we oli lesin long trutok. Oli mekem sem samting long saed blong Enemi ya blong Kraes.

Oli Mestem Mining Blong Hem

Stat long taem blong aposol Jon, plante man oli stap talem se Enemi blong Kraes we Jon i tokbaot i minim wan man nomo. Oli stap talem plante defdefren man. Plante handred yia bifo, samfala oli ting se Nero we i Hedgavman blong Rom, hem nao i Enemi blong Kraes. Mo tu, plante man oli bilif se Adolf Hitler i Enemi blong Kraes from fasin blong hem blong agensem ol man mo mekem nogud long olgeta. Samfala oli bin talem se man Jemani ya Friedrich Nietzsche we hem i savegud ol waes blong wol, hem nao i Enemi blong Kraes. Sam narafala bakegen oli bilif se Enemi ya i no kamtru yet, mo se bambae hem i wan man blong politik we i no gat sore mo i yusum ol waes trik blong traem kam rula blong wol ya. Oli ting se wael anamol we Revelesen japta 13 i tokbaot, hem i sem mak long Enemi blong Kraes we Jon i tokbaot. Oli talem se nem blong hem, 666, bambae i soemaot hu nao rabis man ya long fiuja.

Olgeta we oli stap leftemap ol tingting ya oli bilif se Jon i minim wan man nomo we i Enemi blong Kraes. ?Be tok blong Jon i soemaot wanem? Tingbaot 1 Jon 2:18: “Olgeta oli talem finis long yufala, se bambae Enemi blong Kraes i kamtru. Mo naoia, plante enemi blong Kraes oli kamtru finis.” Yes, “plante enemi blong Kraes,” i no wan nomo, we oli spolem Kristin skul long faswan handred yia. Tede tu, i no wan man, be plante, we oli mekemap grup ya we i enemi blong Kraes. Olsem wan grup, oli spolem Kristin fasin blong fulap man. (2 Timoti 3:1-5, 13) ?Oraet, hu olgeta we oli stap long grup ya we i Enemi blong Kraes?

Yumi traem luk sipos wael anamol blong Revelesen japta 13 i sem mak long Enemi ya. Aposol Jon i raetem se: “Anamol ya we mi luk, i samting olsem bigfala puskat ya leped. Leg blong hem i samting olsem leg blong bigfala anamol ya bea. Mo maot blong hem i olsem maot blong laeon.” (Revelesen 13:2) ?Ol fasin blong ol anamol ya oli minim wanem?

Ol man blong stadi long Baebol oli luk se Revelesen japta 13 i joen wetem Daniel japta 7. God i givim wan vison long Daniel we i soemaot ol anamol olsem leped, bea, mo laeon. (Daniel 7:2-6) ?Profet ya i talem wanem mining blong ol anamol ya? Hem i raetemdaon se ol wael anamol ya oli pija blong ol king no gavman blong wol. (Daniel 7:17) Ale yumi luksave se wael anamol blong Revelesen i minim ol gavman blong man. Ol gavman ya oli agensem Kingdom blong God, ale oli Enemi blong Kraes.

?Hu Bakegen i Enemi Blong Kraes?

Taem Pikinini blong God i wokbaot long wol ya, i gat plante man we oli olsem enemi blong hem. Tede tu, i gat ol enemi blong hem yet, be oli no moa save tajem hem. Makem sam long olgeta ya.

Aposol Jon i talem se: “?Oraet, be hu i man blong giaman? Man we i stap talem se Jisas i no Mesaea, hem nao i man blong giaman. Man olsem, hem i enemi blong Kraes. Hem, i tanem baksaed long Papa blong yumi, mo long Pikinini blong hem tu.” (1 Jon 2:22) Ol man we oli lego mo agensem trutok, mo ol lida blong ol giaman skul, olgeta ya oli twistim ol klia tijing blong Jisas. Olgeta ya oli sakemaot trutok blong Baebol mo oli talemaot ol giaman tok long nem blong God mo Kraes. Oli tijim Triniti we i agensem trutok ya se God i Papa mo Jisas i Pikinini blong hem. From samting ya, olgeta tu oli Enemi blong Kraes.

Long Luk 21:12, Jisas i givim woning long ol disaepol blong hem se: “Bambae ol man oli save holem yufala, oli save mekem i strong long yufala, oli save putum yufala long han blong ol lida blong haos blong prea, mo oli save putum yufala long kalabus. . . . From we nem blong mi i stap long yufala.” Stat long faswan handred yia, ol trufala Kristin oli bin kasem hadtaem from ol man we oli ronem mo kilim olgeta. (2 Timoti 3:12) Ol man we oli mekem olsemia, oli wok agensem Kraes. Olgeta ya tu oli Enemi blong Kraes.

“Man we i no biaen long mi, hem i agens long mi. Mo man we i no joen long mi blong tekem ol man oli kam wanples, hem i stap ronem ol man oli go wanwan.” (Luk 11:23) Long vas ya, Jisas i talem se olgeta we oli agens long hem mo agens long ol plan blong God, oli Enemi blong Kraes. ?Wanem fiuja blong olgeta ya?

?Wanem Fiuja Blong Ol Enemi Blong Kraes?

Ol Sam 5:6 i talem se: “Yu [“Jeova,” NW ] yu stap flatemgud ol man blong giaman, mo yu no laekem nating ol man blong faet mo ol man blong trikim man, yu stap agens long olgeta.” ?Hemia i minim ol enemi blong Kraes? Yes. Aposol Jon i raetem se: “I gat plante man blong giaman we oli go olbaot long wol finis. Olgeta ya oli no bilif se taem Jisas Kraes i kam long wol, bodi blong hem i bodi blong man stret. Ol man olsem oli prapa man blong giaman, oli enemi blong Kraes.” (2 Jon 7) Hae God bambae i spolem ol enemi ya blong Kraes, from we oli man blong giaman mo oli stap trikim man.

Taem blong God blong givim panis long olgeta i klosap nao. Taswe, ol trufala Kristin oli no mas letem ol giaman tok mo fasin blong ol enemi ya, antap moa olgeta we oli lego trutok mo oli stap agens long hem, i pulum olgeta blong kam slak long bilif. I impoten we yumi lesin long woning blong Jon se: “Yufala i mas lukaot gud long yufala. Sipos no, bambae yufala i lusum ol samting ya we mifala i hadwok from, mo bambae yufala i no save kasem ful pei blong yufala tu.”—2 Jon 8.

[Foto Credit Line blong pija long pej 18]

Nero on pages 2 and 18: Courtesy of the Visitors of the Ashmolean Museum, Oxford