Baebol i Talem Wanem
?Hu Ya Mikael Hif Blong Ol Enjel?
BAEBOL i talem se i gat plante milian enjel long heven. (Daniel 7:9, 10; Revelesen 5:11) Long stat blong Baebol go kasem en blong hem, i gat plante handred vas we oli tokbaot ol gudfala enjel blong God. Be Baebol i talem nem blong tu enjel nomo. Wan, hem i enjel Gabriel, we i bin karem mesej blong God i go long tri man. Trifala wok ya, Gabriel i mekem insaed long wan taem we i kavremap 600 yia. (Daniel 9:20-22; Luk 1:8-19, 26-28) Namba tu enjel we Baebol i talem nem blong hem, hemia Mikael.
I klia se Mikael i wan enjel we i gat paoa. Buk blong Daniel i talem se hem i faetem sam rabis enjel we oli stap agensem ol man blong Jeova. (Daniel 10:13; 12:1) Leta blong Jud i tokbaot Mikael se hem i rao wetem Setan from bodi blong Moses. (Jud 9) Buk blong Revelesen i talem se hem i faetem Setan mo ol rabis enjel long heven, mo hem i sakemaot olgeta. (Revelesen 12:7-9) Baebol i no tokbaot wan narafala enjel we i gat haenem mo bigfala paoa antap long ol enemi blong God, olsem we Mikael i gat. Taswe, yumi no sapraes we Baebol i singaot Mikael se “jif blong ol enjel.” Tok ya “jif,” i min se hem i “hae moa” long ol narafala enjel.
Oli Rao Se Mikael Hem i Hu
Ol skul we oli stap talem se oli Kristin wetem skul Islam mo skul blong ol man Jiu tu, oli gat ol defdefren tingting long saed blong ol enjel. Sam tingting oli no klia. Buk ya The Anchor Bible Dictionary, i tokbaot wan tingting olsem i se: “Maet i gat wan enjel nomo we i hae no maet i gat wan smol grup we oli olsem jif blong ol enjel (ating oli fo no seven long grup ya).” Buk ya The Imperial Bible-Dictionary, i talem se Mikael i “nem blong wan enjel, be i gat tu defren tingting long saed blong hem. Samfala oli ting se hem i Masta Jisas Kraes we i Pikinini blong God. Samfala oli ting se hem i wan long ol seven jif blong ol enjel.”
Long kastom blong ol man Isrel, ol seven jif blong ol enjel ya oli Gabriel, Jeremiel, Mikael, Raguel, Raphael, Sariel, mo Uriel. Skul Islam i bilif long fo jif blong ol enjel, hemia, Jibril, Mikal, Izrail, mo Israfil. Skul Katolik tu i bilif long fo jif blong ol enjel: Mikael, Gabriel, Raphael, mo Uriel. ?Baebol i talem wanem? ?I gat plante jif blong ol enjel?
Ansa Blong Baebol
Baebol i tokbaot Mikael nomo olsem jif blong ol enjel, i no tokbaot wan narafala jif. Mo tu, Baebol i no yusum tok ya “jif blong ol enjel” long fasin we i save minim plante enjel. Baebol i talem se Mikael nao i jif blong ol enjel, olsem we hem nomo i karem nem ya. Taswe, i stret blong bilif se Jeova God i givim paoa blong rul antap long ol narafala enjel i go long wan nomo long ol pikinini blong hem long heven.
Bigman we i Wokem olgeta samting, hem i antap long olgeta enjel. Mo Baebol i tokbaot wan narafala man blong God we i antap long olgeta tu, hemia Jisas Kraes. (Matiu 13:41; 16:27; 24:31) Aposol Pol i tokbaot “Jisas, Masta blong yumi,” mo “ol strong enjel blong hem.” (2 Tesalonaeka 1:7) Mo Pita i tokbaot Jisas we i laef bakegen i se: “Jisas ya, hem i go antap long heven, nao hem i stap sidaon long raet saed blong God. Mo God i mekem ol enjel, mo ol haeman, mo ol lida blong heven, oli stap ona long hem.”—1 Pita 3:22.
I tru se i no gat wan vas long Baebol we i talem stret se Jisas nao hem i Mikael, jif blong ol enjel. Be i gat wan vas we i tokbaot Jisas se hem i mekem wok blong jif blong ol enjel. Long leta we aposol Pol i raetem i go long ol man Tesalonaeka, hem i talem wan profet tok, i se: “Masta bambae i aot long heven i kamdaon. Bambae hem i singaot wetem voes blong jif blong ol enjel mo wetem pupu blong God, nao olgeta we oli joen long Kraes gogo oli ded, bambae oli girap bakegen fastaem.” (1 Tesalonaeka 4:16, NW ) Vas ya i tokbaot Jisas olsem we hem i tekem paoa blong hem finis, hem i Mesaea we God i putumap hem olsem King. Be, hem i toktok “wetem voes blong jif blong ol enjel” tu. Makemgud se hem i gat paoa blong mekem ol dedman oli laef bakegen.
Taem Jisas i stap long wol, hem i mekem sam man oli laef bakegen. Taem hem i mekem olsem, hem i yusum voes blong hem blong singaot olgeta. Olsem, taem hem i mekem boe blong wan wido long taon ya Naen i laef bakegen, hem i singaot long hem se: “!Yang man! !Mi mi talem long yu, yu girap!” (Luk 7:14, 15) Biaen, taem Jisas i mekem fren blong hem Lasaros i laef bakegen, “hem i singaot bigwan i talem se, ‘!Lasaros! !Yu kamaot!’ ” (Jon 11:43) Be long tufala taem ya, voes blong Jisas i voes blong wan stret man long wol ya.
Afta we Jisas i laef bakegen long ded, mo i go long heven olsem wan spirit man, God i leftemap nem blong hem “i go antap olgeta.” (Filipae 2:9) From we hem i no moa wan man long wol ya, hem i gat voes blong jif blong ol enjel. Taswe, taem pupu blong God i krae blong “olgeta we oli joen long Kraes gogo oli ded,” oli girap blong go antap long heven, Jisas i “singaot” olgeta. Be long taem ya, hem i singaot “wetem voes blong jif blong ol enjel.” I stret blong ting se jif blong ol enjel nomo i gat raet blong singaot “wetem voes blong jif blong ol enjel.”
Yes, i gat ol narafala enjel we oli hae tu, olsem ol seraf mo ol jerubim. (Jenesis 3:24; Aesea 6:2) Be, Baebol i tokbaot Jisas we i laef bakegen olsem Mikael, jif blong ol enjel.