Baebol i Talem Wanem
Harem Nogud Taem Yumi Mekem Wan Rong—?Filing Ya i Stret?
TEDE, plante man oli ting se i no stret blong harem nogud taem yumi mekem wan rong. Oli gat sem tingting olsem man Jemani ya, Friedrich Nietzsche, we hem i savegud ol waes blong wol. Hem i talem se: “Filing blong harem nogud taem yumi mekem wan rong, i wan sik we i moa nogud i winim ol narafala sik we ol man oli bin kasem bifo.”
Be samfala we oli stap stadi long bisnes ya, oli no tingting olsem. Wan woman dokta we plante man oli save hem, Susan Forward, Ph.D., hem i raetem wan buk we i talem se: “I impoten we yumi gat filing ya blong harem nogud taem yumi mekem wan rong, from we samting ya i save givhan long yumi blong kam wan man we i sore long narafala, mo i save mekem se yumi no nidim narafala blong talem long yumi oltaem wanem fasin we yumi mas mekem. Filing ya i wan haf blong tingting we i jajem yumi.” ?Ale, olsem wanem? ?Filing ya blong harem nogud taem yumi mekem wan rong, hem i nogud? ?I gat sam taem we filing ya i save givhan long yumi?
?Wanem Ya Filing Blong Harem Nogud From Wan Rong?
Filing ya i kamaot taem yumi luksave se yumi spolem narafala we yumi laekem hem, no taem yumi brekem wan rul we yumi bilif se yumi mas folem long laef blong yumi. Wan buk i talem se taem yumi harem nogud from we yumi mekem wan rong, “yumi harem se yumi gat kaon from we yumi mestem, yumi spolem narafala, yumi brekem loa, no yumi mekem sin.”
Hibru haf blong Baebol i tokbaot filing ya taem ol man Isrel oli brekem Loa blong God. Bitim stret haf blong olgeta taem we Hibru haf blong Baebol i tokbaot filing ya, i stap long buk blong Levitikas mo Namba. Be klosap yumi no faenem tingting ya long Grik haf blong Baebol. Sam samtaem nomo i tokbaot, mo long ol taem ya, hem i joenem wetem ol bigfala sin we man i mekem agens long God.—Mak 3:29; 1 Korin 11:27.
Samting we i nogud se, samtaem man i save gat filing ya se hem i mekem wan rong nating se hem i no mekem wan rong. Tingbaot. Maet wan man i traem blong mekem evri samting long fasin we i gud bitim mak no i traem blong mekem ol samting we hem i no naf blong mekem. Evri taem we man ya i mestem mak blong hem, bambae hem i harem nogud, olsem we hem i mekem wan rong. Be hem i no nid blong harem olsemia. (Prija 7:16) Mo tu, tingbaot wan man we i rili mekem wan mastik no wan rong. Yes, i stret we hem i harem nogud from mastik ya. Be, sipos man ya i letem filing ya i kam olsem bigfala sem, maet hem i stap panisim hem wan bakegen long fasin we i strong tumas. ?Oraet, olsem wanem filing blong harem nogud from wan rong i save givhan long yumi?
Harem Nogud From Wan Rong i Save Mekem i Gud Long Yumi
Filing ya blong harem nogud from wan rong we yumi mekem, i save givhan long yumi long tri rod. Faswan, hem i wan saen se yumi save ol rul we yumi mas folem. Hem i soemaot se tingting blong yumi i stap jajem yumi taem yumi mekem i no stret. (Rom 2:15) Wan buk we American Psychiatric Association i raetem, i talem se man we i no harem nogud taem i mekem wan rong, i save mekem plante nogud fasin blong spolem ol narafala man. Ol man we tingting blong olgeta i no stikim no jajem olgeta, oli no stap luksave samting we i stret mo samting we i no stret. Hemia i wan denja.—Taetas 1:15, 16.
Seken samting se, filing ya blong harem nogud from wan rong we yumi mekem, i save givhan long yumi blong blokem ol fasin nogud. Taem yumi harem i soa long bodi blong yumi, samting ya i soemaot se yumi gat wan sik. Long sem fasin, taem filing blong yumi i harem nogud from wan rong we yumi mekem hemia i soemaot se yumi gat wan nogud fasin no wan trabol long saed blong spirit we yumi mas stretem. Taem yumi luksave slak fasin ya blong yumi, bambae yumi traehad blong no moa spolem yumi, olgeta we yumi laekem olgeta tumas, mo ol narafala.—Matiu 7:12.
Laswan samting se, sipos man i talemaot rong blong hem, samting ya i save givhan long hem wan mo long man we hem i spolem. Stori blong King Deved i soemaot samting ya. Hem i harem nogud bitim mak taem hem i mekem sin. Hem i raetem se: “Taem mi no talemaot ol sin blong mi long yu, mi mi slak we mi slak, from we evri dei nomo, mi stap krae kasem tudak.” Be taem Deved i talemaot sin blong hem long God, hem i singaot wetem glad se: “Mi mi stap sing bigwan from paoa blong yu we i sevem mi, from we yu yu stap blokem mi, yu stap lukaot gud long mi.” (Ol Sam 32:3, 7) Man we i talemaot sin blong hem i save mekem narafala we hem i spolem i harem gud tu, from we, taem hem i talem sore, narafala ya bambae i luk se hem i rili laekem hem.—2 Samuel 11:2-15.
No Bitim Mak
Blong gat stret tingting long saed blong filing blong harem nogud taem yumi mekem wan rong, i gud blong luk olsem wanem tingting blong Jisas long saed blong sin mo ol man we oli mekem sin, i defren olgeta long tingting blong ol Farisi. Long Luk 7:36-50, yumi ridim stori blong wan woman blong mekem rabis fasin, we hem i go long haos blong wan Farisi, taem Jisas i stap kakae long haos ya. Ale woman ya i kam klosap long Jisas, i wasem leg blong hem wetem wota blong ae blong hem, mo i ravem senta mo sas oel long hem.
Farisi ya we i ting se hem i stret man finis, i lukluk rabis long woman ya, olsem we woman ya i no naf blong man i lukluk hem no i toktok long hem. Farisi ya i tingting olsem se: “Man, sipos man ya [Jisas] i wan profet tru, bambae hem i savegud se woman ya we i stap tajem hem, hem i wan woman nogud.” (Luk 7:39) Jisas i stretem tingting blong hem kwiktaem, i se: “Yu yu no kafsaedem oel i go long hed blong mi, be hem i kafsaedem senta ya i go long leg blong mi. From ol samting ya, mi mi save talem long yu, se mi mi fogivim hem finis. Ol sin blong hem we i plante tumas, be mi mi tekemaot finis. Taswe hem i lavem mi tumas.” I sua se toktok ya we Jisas i talem wetem kaen fasin, i leftemap tingting blong woman ya mo i mekem hat blong hem i no moa hevi.—Luk 7:46, 47.
Jisas i no stap talem se hem i agri long rabis fasin blong woman ya. Nogat. Hem i stap tijim flas Farisi ya se lav nao i mas pusum man blong mekem wok blong God. (Matiu 22:36-40) Yes, i stret we woman ya i mas harem nogud from ol rabis fasin we hem i bin mekem. Be i klia se hem i sore we hem i bin mekem ol fasin ya, from we hem i krae, hem i no traem mekem eskius from rabis fasin blong hem, mo hem i ona long Jisas long fored blong ol man. Taem Jisas i luk ol samting ya, hem i talem long woman ya se: “Bilif blong yu i mekem yu yu gud bakegen. Yu go, yu no moa wari bakegen.”—Luk 7:50.
Be, Farisi ya i gohed blong lukluk rabis long woman ya, olsem we hem i nogud. Ating hem i wantem mekem woman ya i sem mo i gat tingting se God bambae i panisim hem strong. Sipos yumi traem mekem narafala i harem nogud no i sem taem hem i mekem samting we yumi ting se i no stret, hemia i min se yumi no gat lav, mo bambae i no gat wan gudfala samting i kamaot from. (2 Korin 9:7) Gudfala frut i stap kamaot taem yumi folem fasin blong Jisas—soemaot wan gudfala eksampol, talem gudfala toktok long narafala we i kamaot long hat blong yumi, mo soem se yumi trastem ol narafala nating se sam samtaem oli nidim advaes mo tok we i stretem olgeta.—Matiu 11:28-30; Rom 12:10; Efesas 4:29.
Taswe, filing blong harem nogud taem yumi mekem wan rong, hem i wan gudfala samting, mo yumi nidim blong harem olsemia. Ol Proveb 14:9 i talem se: “Ol man we oli no gat hed, taem oli mekem sin, oli no kea.” Tingting we i jajem yumi i mas pusum yumi blong talemaot sin blong yumi mo mekem samting blong stretem sin ya. Be i no filing ya blong sem we i mas pusum yumi blong mekem wok blong Jeova. Bigfala samting we i mas pusum yumi, hemia lav. (Job 1:9-11; 2:4, 5) Baebol i talem se ol gudfala tok we i leftemap tingting blong man mo mekem hem i haremgud, hemia nao samting we bambae i pulum hem blong mekem bes blong hem. Mo samting we i moa impoten se, bambae hem i glad blong mekem olsem.