Baebol i Talem Wanem
Ol Prea We God i Harem
“Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala. Man we i stap askem samting, oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.”—Luk 11:9, 10.
PLANTE Kristin oli prea long God long saed blong ol trabol mo wari blong olgeta from we oli save se hem i lavem olgeta mo hem i stap tingbaot olgeta. Taem oli mekem olsem, oli stap soemaot se oli bilif fulwan long tok ya blong Jisas Kraes. Be sam long olgeta oli harem nogud blong wet long ansa blong prea blong olgeta. ?Yu yu harem se ol prea blong yu oli no gat paoa? ?God i stap lesin long ol prea blong yu?
Maet i luk olsem se God i no stap ansa long ol prea blong yumi, be hemia i no min se hem i no harem ol prea ya. Baebol i promes long yumi se: “Ae blong Jeova i stap lukluk ol stret man mo sora blong hem i stap lesin long olgeta taem oli prea strong long hem.” (1 Pita 3:12, NW) Ale, Jeova God i harem prea blong ol stret man, nating se oli talem wetem voes no long hat blong olgeta nomo. (Jeremaea 17:10) Mo tu, Jeova i stap lukluk gud long ol tingting mo filing biaen long ol prea blong yumi, hemia ol samting we maet yumi wan yumi no kasem save long olgeta.—Rom 8:26, 27.
Be i gat sam rul we yumi mas folem blong God i agri long ol prea blong yumi. Fastaem, yumi mas prea i go long God nomo—i no long Jisas, no long wan “tabu man” no long wan pija. (Eksodas 20:4, 5) Mo tu, yumi mas talem ol prea long nem blong Pikinini Blong God, Jisas Kraes. (Jon 14:6) ?Hemia i min se Jisas i lesin fastaem long ol prea blong yumi, ale biaen hem i pasem i go long God? Nogat. Taem yumi prea long Jeova long nem blong Jisas, yumi soem se yumi wan disaepol blong Kraes, mo se yumi luksave we ransom blong Jisas nomo i mekem rod blong yumi save toktok long God.—Hibrus 4:14-16.
Yumi mas prea wetem bilif. Aposol Pol i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) ?Olsem wanem wan man i save se hem i gat bilif olsem? Jemes i raetem ansa long Baebol, i se: “Mi bambae mi soemaot long yu we mi mi bilif long God, long ol gudfala wok we mi stap mekem.” (Jemes 2:18) Yes, bilif i pulum man blong hem i wok, mo ol wok blong yumi oli soemaot se yumi lavem God mo se yumi stap traehad blong mekem hem i glad.
Mo tu, ol man blong wosip long God oli mas gohed blong askem, askem, askem long God. Jisas i mekem samting ya i klia long Luk 11:9, 10, we yumi tokbaot finis. Sipos wan man i prea wan taem nomo long saed blong wan bisnes, ating hem i no rili tinghevi long samting we hem i stap askem long God.
Promes Blong God
Nating se yumi prea oltaem mo yumi prea wetem fulhat blong yumi, be yumi stap laef yet long wan taem we ‘laef long wol ya i strong tumas.’ (2 Timoti 3:1) I tru, Jisas i talem long ol man blong hem se oli save harem gud, be hem i no talem se bambae oli no gat sam trabol long laef blong olgeta. (Matiu 5:3-11) Hem i talem se ol disaepol blong hem oli save harem gud nating se oli krae, oli hanggri, oli tosta, no ol man oli ronem olgeta.
Glad we Jisas i tokbaot i no dipen nomo long ol gudfala samting we oli hapen long laef blong yumi. Nogat. Hem i wan glad we i stap long hat blong yumi mo i kamaot from we yumi stap mekem wok blong God. Taswe, yumi save harem gud nating se ol nogud samting oli hapen long laef blong yumi.—2 Korin 12:7-10.
Ol Prapa Trabol Blong Yumi
?Olsem wanem? ?I blong nating nomo we yu yu prea long God long saed blong ol prapa trabol blong yu, olsem taem yu wantem faenem wan man no woman blong mared wetem yu, no taem yu yu gat trabol long famle, helt, no long saed blong wok? I no blong nating nomo we yu yu prea long saed ya. I tru, God i no promes blong mekem wan merikel blong jenisim ol samting long laef blong yumi, be bambae hem i givim waes long yumi blong yumi save stanap strong mo gohed gud. Long saed blong ol trabol we oli kasem yumi, Jemes i raetem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jemes 1:5) Taswe, Jeova bambae i givim tabu spirit long yumi blong i lidim yumi. Samting ya bambae i givhan long yumi blong kasem save long ol rul blong Baebol mo blong folem olgeta taem yumi mekem wan disisen.
I tru, tabu spirit blong God i no save mekem ol disisen blong yumi. Yumi wanwan i mas traehad. Wan eksampol, ating yu gat wan trabol naoia. ?Yu stap mekem wanem blong winim hem? ?Yu lukaot ol save we i save givhan long yu, mo yu tingtinggud long ol defren haf blong bisnes ya? Sipos yu mekem olsem, yu stap soem long God se yu yu gat bilif. (Jemes 2:18) ?Yu yu traem plante defren rod blong winim trabol ya, mo yu gohed oltaem blong askem God blong lidim yu? (Matiu 7:7, 8) ?Yu yu stadigud long ol tingting blong Baebol we oli stret long trabol blong yu? Tok Blong God i save mekem se yumi “kam waes long olgeta samting, nao bambae yumi savegud ol rod blong mekem ol gudfala wok.”—2 Timoti 3:16, 17.
Sipos God i wantem, hem i save kam insaed long bisnes blong yumi mo tekemaot ol trabol blong yumi. Be hem i letem yumi blong yumi jusum rod we yumi wantem folem. Sore tumas, plante man oli jusum rod we i spolem narafala. Taswe, maet sam trabol we yu yu tokbaot long ol prea blong yu, oli save gohed gogo niufala wol blong God i kamtru. (Ol Wok 17:30, 31) Maet hem i wan trabol we i kamaot long ples blong yu, olsem man i kilim man, man i stil, no wan bigfala faet long kantri. Maet hem i trabol we ol man oli mekem agensem yu, mo maet yu mas stanap strong tru long hadtaem ya. (1 Pita 4:4) Yu yu mas luksave se long rabis wol ya we plante man oli no obei long God, sam trabol oli no save kamgud.
Nating se i olsem, God i lavem ol man we oli wosip long hem, mo hem i wantem halpem olgeta. Taem Kingdom blong hem bambae i rul fulwan long wol ya mo i no gat wan narafala paoa we i save agensem rul ya, bambae God i tekemaot olgeta trabol we oli fulap long wol ya. (Revelesen 21:3, 4) Go kasem taem ya, yumi mas gohed blong askem long God blong lidim yumi blong winim ol trabol blong laef. Sipos yumi gohed blong prea, yumi save sua se Jeova bambae i holem promes blong hem long Aesea 41:10 se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala! !Mi bambae mi blokemgud yufala, mi sevem yufala!”