Baebol i Talem Wanem
?Olsem Wanem Blong Yusumgud Fasin Ya We Yumi Fri Blong Jus?
GOD i wokem faswan man mo woman, Adam mo Iv, we tufala i naf blong mekem ol prapa jus blong tufala. Hem i givim wok long Adam blong lukaot long garen blong Iden. Wan long ol wok blong Adam i blong jusum nem blong ol anamol. (Jenesis 2:15, 19) Antap moa, Adam mo Iv tufala i save jusum blong obei long God no nogat.—Jenesis 2:17, 18.
Stat long taem ya kam kasem naoia, ol man oli mekem plante bilian disisen. Plante long ol disisen ya oli gud, sam oli no stret tumas, mo sam oli nogud olgeta. Sam nogud jus we ol man oli bin mekem, oli karem frut we i nogud tumas. Nating se i olsem, neva God i tekemaot raet we yumi gat blong jus. From we God i olsem wan Papa we i lavem yumi tumas, hem i givim ol tok blong Baebol blong halpem yumi blong mekem ol gudfala disisen. Hem i givim woning tu se sipos yumi mekem ol nogud jus, bambae yumi kasem ol nogud frut. Baebol i talem se sid we yumi planem, be bambae yumi mas kakae frut blong hem nomo.—Galesia 6:7.
Ol Disisen Long Laef Blong Yumi Wan
Long sam samting, God i talemaot klia mo stret wanem we hem i wantem. Be long plante samting, Baebol i no talem wan rul we yumi mas folem long ol disisen blong yumi wan. Baebol i givim advaes, be advaes ya i no blokem yumi blong jusum samting we yumi wanwan i laekem mo i wantem. Blong soemaot samting ya, yumi save makem tok blong Baebol long saed blong ol pleplei.
Baebol i talem se Jeova i “stap harem gud oltaem.” (1 Timoti 1:11) Tok blong hem i talem se i gat wan stret “taem blong man i harem gud” mo “taem blong man i danis.” (Prija 3:1, 4) Baebol i talem se King Deved i plei miusik nao ol man we oli lesin oli harem gud long hem. (1 Samuel 16:16-18, 23) Jisas i bin go long wan lafet blong mared, mo hem i mekem wan bigfala samting long taem ya, hem i jenisim wota i kam waen.—Jon 2:1-10.
Be Baebol i talem ol tok we i givim woning tu i se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) God i no glad long “ol tok plei we i nogud” mo rabis fasin long saed blong seks. Sipos yumi joen long ol samting ya, bambae hem i no moa wantem stap olsem fren blong yumi. (Efesas 5:3-5) Taem ol man oli dring bitim mak long ol lafet, bigfala trabol i save kamaot. (Ol Proveb 23:29-35; Aesea 5:11, 12) Mo tu, Jeova God i agensem ol man we oli laekem blong faet.—Ol Sam 11:5; Ol Proveb 3:31.
Ol vas ya blong Baebol oli givhan long yumi blong luk ol pleplei olsem we God i stap luk olgeta. Taem ol Kristin oli mekem ol jus blong olgeta, oli lesin long ol advaes blong Baebol. Yumi evriwan bambae yumi mas kasem gudfala frut no nogud frut from ol jus we yumi mekem.—Galesia 6:7-10.
Long sem fasin, i gud we ol Kristin oli folem advaes blong Baebol taem oli mekem ol disisen long saed blong klos, mared, fasin blong gat pikinini, mo bisnes. Maet ol disisen ya, Baebol i no tokbaot olgeta stret, be ol tingting blong Baebol oli save givhan long ol Kristin blong mekem disisen we tingting blong olgeta bambae i no jajem olgeta from. (Rom 2:14, 15) Long olgeta disisen long saed blong laef blong ol Kristin, oli mas letem tingting ya i lidim olgeta: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.”—1 Korin 10:31.
Long saed ya, i gud blong tingbaot advaes blong Baebol blong ‘lukaot long ol bisnes blong yumi nomo.’ (1 Tesalonaeka 4:11) Long wan bisnes, maet i gat plante jus we Kristin i save mekem, mo maet olgeta evriwan oli no agensem wil blong God. Sipos i olsem, maet jus blong wan Kristin i defren long jus blong narafala Kristin. Long taem olsem, bambae God i no glad sipos wan man blong hem i jajem narafala man blong hem from jus we hem i mekem. (Jemes 4:11, 12) Baebol i givim waes advaes ya se: “Man we i . . . stap go insaed long ol bisnes blong narafala man, hem bambae i kasem panis. Be i no stret sipos wan long yufala i kasem panis from ol fasin olsem.”—1 Pita 4:15.
Disisen Blong Mekem Wok Blong God
Baebol i soemaot klia se yumi kasem gudfala frut taem yumi obei long God. Nating se i olsem, God i no fosem ol man blong oli mekem wosip long hem. Be i tru se hem i singaot ol man blong askem olgeta blong mekem wosip long hem. Olsem nao, Baebol i talem se: “Hae God, hem i mekem yumi. Yufala i kam, yumi bodaon, yumi nildaon long fes blong hem, yumi mekem wosip long hem.”—Ol Sam 95:6.
Hem i talem tok olsem blong singaot ol man Isrel tu. Bitim 3,500 yia bifo, nesen blong Isrel i stanap fored long Hil ya Sinae, nao God i mekem ol milian man ya oli save long niufala fasin blong wosip folem Loa blong Moses. Ale, ol man Isrel oli mas jus. ?Bambae oli mekem wok blong God no nogat? ?Olgeta ya oli mekem wanem jus? Long wan voes, oli talem se: “Bambae mifala i obei long Hae God, mifala i [“glad blong,” NW] mekem evri samting we hem i talem.” (Eksodas 24:7) Long saed blong wosip blong Jeova, olgeta wanwan oli mas tekem prapa disisen blong olgeta.
Long faswan handred yia, Jisas i statem wok ya blong talemaot gud nius blong Kingdom blong God. (Matiu 4:17; 24:14) Be hem i no fosem ol man blong joen long wok ya. Defren olgeta, hem i singaot ol man long kaen fasin i se: “Yu biaen long mi, yu kam man blong mi.” (Mak 2:14; 10:21) Plante oli harem tok ya we i singaot olgeta nao oli joen wetem hem long wok blong prij. (Luk 10:1-9) Afta we sam taem i pas, samfala oli jusum blong lego Jisas. Judas i jusum blong putum Jisas long han blong ol enemi blong hem. (Jon 6:66; Ol Wok 1:25) Biaen, ol aposol oli givhan long plante moa man blong oli kam disaepol. Be oli no poenem naef blong faet long olgeta blong fosem olgeta. Olgeta ya oli fri blong jus. Oli “stret blong kasem laef ” taswe “oli bilif.” (Ol Wok 13:48, NW; 17:34) Tede tu, ol trufala Kristin oli glad blong obei long Tok blong God mo folem ol tijing blong Jisas.
I klia se God i wantem we yumi yusum fasin ya we yumi fri blong jus. Hem i givim plante toktok long Baebol tu blong halpem yumi blong mekem ol waes disisen. (Ol Sam 25:12) Long saed blong ol disisen we ol Kristin oli mekem long laef blong olgeta wanwan, oli mas tingtinggud long ol tok we God i givim blong lidim olgeta. Long rod ya nomo, yumi save mekem wok blong God wetem ‘paoa blong tingting blong yumi.’—Rom 12:1, NW.