Ol Yangfala Oli Askem . . .

?From Wanem God i Letem Yumi Blong Yumi Safa?

“God i stap long heven we evri samting i gud. Yumi stap daon long wol ya we yumi safa.”​—⁠Mary.a

OL YANGFALA tede oli bon i kam long wol ya we i nogud tumas. Oltaem plante taosen man i stap ded long ol bigfala disasta mo taem we graon i seksek bigwan. Nius i fulap long ol faet mo trabol we ol teroris oli mekem. Yumi lusum olgeta we yumi lavem olgeta tumas, taem oli ded from sik, wan man i kilim olgeta i ded, no wan aksiden i tekemaot laef blong olgeta. Long saed blong Mary we yumi ridim tok blong hem antap, wan nogud samting i spolem filing blong hem. Mary i talem ol tok antap we i soem se hem i harem nogud tumas, taem papa blong hem i ded.

Taem wan we yumi lavem hem tumas i ded, yumi evriwan i harem nogud, yumi sad, mo yumi save kros tu. Maet yu tingbaot se: ‘?From wanem samting ya i hapen?’ no ‘?From wanem samting ya i hapen long mi?’ no ‘?From wanem samting ya i hapen naoia?’ I gud yumi traem faenem stret ansa long ol kwestin ya. Blong faenem stret ansa, yumi mas lukluk i go long stret ples. Be olsem yangfala Turrell i talem, samfala “oli no naf blong tingting mo skelem ol samting from we oli stap harem nogud bitim mak.” Taswe, maet yu mas faenem wan rod blong mekem tingting blong yu i kam kwaet lelebet, nao bambae yu yu naf blong tingting gud long samting ya mo faenem stret ansa.

Fesem Ol Nogud Samting We Oli Hapen

Yumi no glad blong tingbaot ded mo fasin blong safa. Be sore tumas, tufala samting ya i haf blong laef blong yumi tede. Job i eksplenem gud samting ya i se: “God. Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol.”​—⁠Job 14⁠:1.

Baebol i mekem promes blong wan niufala wol we “stret fasin nomo bambae i stap long hem.” (2 Pita 3⁠:13; Revelesen 21⁠:​3, 4) Be bifo we ol gudfala samting ya i save kamtru, yumi mas pastru long wan taem we i moa nogud i bitim ol narafala taem bifo. Baebol i talem se: “Yu mas save samting ya tu. Long taem ya we bambae i klosap long Lasdei, laef long wol ya bambae i kam strong tumas.”​—⁠2 Timoti 3⁠:1.

?Hadtaem ya bambae i longfala olsem wanem? Ol disaepol blong Jisas oli askem wan kwestin we i klosap sem mak. Jisas i no talem wan stret dei no taem we ol trabol blong wol ya bambae i finis. Hem i talem nomo se: “Man we i stanap strong gogo olgeta samting ya i finis, bambae God i sevem hem.” (Matiu 24⁠:​3, 13) Tok ya blong Jisas i pulum yumi blong tingting i go longwe long fiuja. Yumi mas rere blong stanap strong tru long plante trabol bifo we ol samting ya i finis.

?Fol Blong God?

?Olsem wanem? ?I stret we yumi kros long God from we hem i letem ol man oli safa? I no stret. Faswan risen from wanem i no stret, se God i promes finis blong tekemaot fasin safa. Mo i no stret tu blong ting se God nao i mekem ol nogud samting ya i hapen. Plante trabol i kamaot olsem nomo. Tingbaot sipos win i blu strong nao i mekem wan tri i foldaon long wan man. Maet samfala oli talem se hemia wok blong God. Be i no God we i mekem tri ya i foldaon. Baebol i givhan long yumi blong kasem save se “samting we yumi no tingbaot, i save kamaot long yumi enitaem nomo.”​—⁠Prija 9⁠:​11, NW.

Mo tu, yumi save safa from we yumi mekem wan krangke samting. Maet wan grup blong ol yangfala oli dring tumas nao oli draevem trak mo oli mekem wan bigfala aksiden. ?Hemia fol blong hu? ?Fol blong God? Nogat. Olgeta ya oli kasem nogud frut blong krangke samting we oli mekem.​—⁠Galesia 6⁠:7.

Maet yu talem se: ‘God i gat paoa. Hem i save finisim ol trabol ya naoia nomo.’ Sam gudfala man long Baebol oli gat semfala tingting. Profet Habakuk i askem long God se: “?From wanem yu stap lukluk nomo long olgeta [man nogud], we yu no panisim olgeta? ?Taem oli stap kilim ol man we fasin blong olgeta i stret lelebet, winim olgeta, be from wanem yu yu stap kwaet?” Be Habakuk i no hareap blong talemaot prapa tingting blong hem long ol kwestin ya. Hem i se: “Mi bambae mi klaem long wajhaos blong mi, nao mi stap wet long Hae God, blong hem i talemaot samting we bambae mi go talem long ol man.” Biaen, God i promes se ‘taem blong samting ya’ bambae i kamtru, nao Hem bambae i finisim fasin safa. (Habakuk 1⁠:13; 2⁠:​1-3) Taswe, yumi mas gat longfala tingting, yumi mas wet long God blong finisim ol trabol long taem we i stret long tingting blong hem.

Yumi no mas ting se God i wantem we yumi safa mo se hem nao i stap traem yumi wanwan. I tru, taem yumi winim plante trabol, samting ya i save soemaot ol gudfala fasin blong yumi. Baebol i talem se God i letem sam samting oli kam traem yumi blong mekem bilif blong yumi i kam stretgud olgeta. (Hibrus 5⁠:8; 1 Pita 1⁠:7) Yes, plante man we oli winim ol traem mo trabol oli lanem blong gat longfala tingting mo fasin sore. Be yumi no mas ting se God nao i mekem olgeta oli safa. Sipos yumi tingting olsemia, yumi stap fogetem se God i gat lav mo waes. Baebol i talem klia se: “Taem ol samting oli kam blong traem yufala, bambae yufala i no talem se ‘Ol samting ya blong traem mi oli kamaot long God.’ From we i no gat samting nogud we i save kam traem God. Mo i no fasin blong God blong traem man.” !God i gat defren fasin! Hem i givim “evri samting we oli gud mo evri presen we oli nambawan.”​—⁠Jemes 1⁠:​13, 17, Nyutesteman wetem Ol Sam long Bislama.

?From Wanem God i Letem Ol Trabol i Kamaot?

?Oraet, hu ya i stamba blong ol trabol we yumi kasem? Yu no mas fogetem se God i gat plante enemi. Bigfala enemi blong hem, hemia “ ‘Setan’ no ‘Man we i agensem man,’ we i stap giaman long olgeta man long wol, i lidim olgeta oli go krangke.” (Revelesen 12⁠:9) Taem God i putum faswan papa mama blong yumi, Adam mo Iv, long wol ya, i no gat trabol nating long ples ya. Be Setan i pulum Iv blong ting se hem i save haremgud moa sipos God i no rul long hem. (Jenesis 3⁠:​1-5) Sore tumas, Iv i bilivim giaman toktok ya blong Setan, nao hem i brekem loa blong God. Adam i folem hem. ?Wanem frut i kamaot? Baebol i talem se: “Ol man oli stap ded.”​—⁠Rom 5⁠:12.

God i save spolem stronghed Setan mo ol man blong hem wantaem nomo, be hem i no mekem olsem. Hem i luk se i stret blong letem taem i pas. ?Taem ya i save mekem wanem gudfala samting i kamaot? !Wan samting se, i save givim janis long ol man blong oli luksave se Setan i wan man blong giaman stret! Mo tu, plante samting i save hapen blong soemaot klia se fasin blong seraot long God i givim trabol nomo long yumi. ?Yu yu luksave samting ya long wol ya? “Olgeta man blong wol ya oli stap long paoa blong Setan.” (1 Jon 5⁠:19) Mo tu, “long wol ya, sam man oli gat paoa, mo ol narafala man oli stap aninit long olgeta, oli stap harem nogud.” (Prija 8⁠:9) Ol tijing blong ol jos oli defdefren mo oli mekem ol man oli konfius. Ol gudfala fasin oli stap lus naoia i bitim olgeta taem bifo. Ol gavman oli traem ol defdefren rod blong rul long ol man. Oli saenem ol kontrak mo putum ol loa, be oli no save givim ol samting we ol man oli nidim. Ol wo tu oli mekem ol man oli harem nogud.

!I klia nomo se yumi nidim we God i finisim ol trabol ya! Be samting ya bambae i kamtru long taem we God nomo i luk se i stret. Go kasem taem ya, yumi gat blesing ya blong leftemap rul blong God. Yumi save mekem olsemia sipos yumi obei long ol loa mo tok blong hem long Baebol. Taem ol nogud samting i hapen, yumi save putum tingting blong yumi i stap strong long promes ya se long fiuja bambae i no moa gat trabol long wol ya.

I No Yu Nomo

Nating se i olsem, taem wan trabol i kasem yu, maet yu askem yet se, ‘?From wanem trabol ya i kasem mi?’ Aposol Pol i talem se i no yu nomo we yu stap safa. Pol i talem se “olgeta samting ya we God i mekem oli stap krae, from we olgeta oli stap harem nogud.” (Rom 8⁠:22) Save ya i save givhan long yu blong no letem wan trabol i mekem tingting blong yu i foldaon. Woman ya Nicole, i harem nogud long filing blong hem from ol trabol we ol teroris oli mekem long New York mo Washington, D.C., long Septemba 11, 2001. Hem i se: “Mi mi fraet bitim mak mo mi seksek.” Be taem hem i ridim ol stori blong trabol we ol Kristin brata sista blong hem oli kasem long taem ya, tingting blong hem i jenis.b “Mi mi luksave se i no mi nomo we i kasem trabol. Sloslo mi kamgud bakegen, mi no moa krae mo harem nogud tumas.”

I gud yu lukaot wan man no woman we yu save toktok wetem hem, maet mama papa blong yu, wan fren we i olfala moa long yu, no wan Kristin elda. Taem yu talemaot filing blong yu long hemia we yu trastem hem, hem i save talem ol “gudfala tok” we i leftemap tingting blong yu. (Ol Proveb 12⁠:25) Wan yangfala Kristin long Brasil i talem se: “Naen yia finis mi lusum papa blong mi. Mi save se Jeova bambae i mekem hem i laef bakegen long fiuja. Be samting we i bin givhan bigwan long mi, hemia taem we mi raetemdaon ol filing blong mi. Mo tu, mi tokbaot trabol ya wetem ol Kristin fren blong mi.” ?Yu yu gat sam ‘fren we oli lavem yu’ we yu save talemaot trabol blong yu long olgeta? (Ol Proveb 17⁠:17) !Ale, letem lav blong olgeta i givhan long yu! Yu no mas fraet blong krae mo soemaot ol filing blong yu. !Jisas tu i “krae” taem fren blong hem i ded!​—⁠Jon 11⁠:35.

Baebol i talem se “naoia i olsem we olgeta samting ya we God i mekem oli stap panis, from we oli stap roten nomo.” Be Baebol i promes tu se wan dei, “panis ya bambae i finis” nao bambae yumi haremgud blong stap “fri olgeta, olsem ol pikinini blong [God].” (Rom 8⁠:21) Go kasem taem ya, plante gudfala man bambae oli safa. Be yu save haremgud blong save from wanem yumi stap safa, mo se i no longtaem, trabol we i mekem yumi safa bambae i finis.

[Futnot]

[Tok blong pija long pej 24]

Sipos yu soemaot filing blong yu mo krae maet samting ya i givhan long yu