Moses—?Laef Blong Hem i Gat Paoa Long Laef Blong Yu?

PLANTE man blong hae save we oli agensem Baebol oli ting se Moses i wan man long ol kastom stori nomo. Oli no bilivim stori blong Baebol from we oli talem se i no gat samting blong pruvum stori ya. Be sipos yumi skelem stori blong tufala man ya Plato mo Socrates folem ol rul we oli yusum blong skelem stori blong Moses, yumi mas talem se tufala tu i kastom stori.

Olsem yumi luk finis, i no gat wan gudfala risen blong sakemaot stori blong Baebol long saed blong Moses. Defren olgeta, ol man we oli gat bilif oli luk se i gat fulap samting blong pruvum se olgeta tok blong Baebol “hem i tok blong God stret.”a (1 Tesalonaeka 2⁠:13; Hibrus 11⁠:1) Taem ol man blong bilif oli stadi long laef blong Moses, hemia i no blong fulumap hed blong olgeta long save nomo, be i blong mekem bilif blong olgeta i kam strong moa.

Trufala Moses

Ol sinema oli tokbaot Moses se hem i wan strong man we i no save fraet long wan samting. Hemia nao ol fasin we ol man blong wajem sinema oli wantem luk. I tru, Moses i no wan man blong fraet. (Eksodas 2⁠:​16-19) Be nambawan fasin blong hem, hemia strong bilif. Long tingting blong Moses, God i wan trufala man. Taswe, biaen, aposol Pol i tokbaot Moses se “i stap gohed olwe nomo, olsem we i stap luk God ya we man i no save luk long ae blong hem.”​—⁠Hibrus 11⁠:​24-28.

Taswe, stori blong Moses i tijim yumi se yumi mas frengud wetem God. !Long laef blong yumi evri dei, yumi save mekem olsem we yumi stap luk God! Sipos yumi mekem olsemia, bambae yumi no save mekem wan samting we hem i harem nogud from. Mo tu, makemgud se mama blong Moses i stat tijim hem taem hem i bebi nomo, blong hem i gat bilif. Bilif blong Moses i strong gud, “waes blong ol man Ijip” i no save spolem bilif ya. (Ol Wok 7⁠:22) !Samting ya i mas leftemap tingting blong ol papa mama tede, blong oli stat tijim ol pikinini blong olgeta long saed blong God, taem oli bebi nomo!​—⁠Ol Proveb 22⁠:6; 2 Timoti 3⁠:15.

Moses i gat tingting daon, “i no gat wan narafala man long wol we tingting blong hem i stap daon olsem hem.” (Namba 12⁠:⁠3) Taswe, Moses i no haedem ol mastik blong hem. Hem i raetemdaon mastik blong hem blong no mekem sakomsaes long stret pikinini blong hem. (Eksodas 4⁠:​24-26) Hem i talemaot klia se wan taem hem i no leftemap God, nao God i givim wan bigfala panis long hem. (Namba 20⁠:​2-12; Dutronome 1⁠:37) Mo tu, Moses i lesin long advaes we narafala i givim long hem. (Eksodas 18⁠:​13-24) Ol hasban, papa, mo olgeta man we oli gat wok blong lidim ol narafala, oli waes blong folem fasin blong Moses.

Samfala oli tok agens long Moses, oli talem se hem i no rili gat tingting daon from we hem i bin kilim plante man i ded. (Eksodas 32⁠:​26-28) Man blong raetem buk, Jonathan Kirsch, i talem se: “Moses we Baebol i tokbaot, hem i gat tingting daon wanwan taem nomo, hem i no wan kwaet man nating, mo yumi no save talem se fasin blong hem i stret oltaem. Sam samtaem, . . . Moses i flas, i mekem plante blad i ron, mo i no gat sore.” Ol tok olsem i soem tingting agens nomo. Maet i luk olsem se Moses i no gat sore, be i no olsem. Fasin we i pulum Moses blong tekem aksin, hemia se hem i laekem tumas stret fasin mo hem i no laekem nating rabis fasin. Moses i wan gudfala eksampol long yumi tede, from we ol man raonabaot long yumi oli agri nomo long olkaen rabis fasin. Moses i soem se yumi mas strong blong folem klin mo stret fasin.​—⁠Ol Sam 97⁠:10.

Ol Hanraet Blong Moses We Oli Stap Yet Tede

Moses i mekem plante nambawan hanraet we hem i livim olgeta oli stap blong ol man we oli kamaot biaen long hem. Hem i raetem ol tok we oli olsem singsing (Job, Sam 90), histri (Jenesis, Eksodas, Namba), hem i raetemdaon ol famle laen (Jenesis, japta 5, 11, 19, 22, 25), mo fulap loa we yumi kolem Loa blong Moses (Eksodas, japta 20-40; Levitikas; Namba; Dutronome). Insaed long Loa ya, i gat ol tingting, ol loa, mo ol rul blong gavman, we ol man oli neva bin tingbaot bifo. Sipos God i no bin givim Loa ya, ating ol man bambae oli jes tingbaot ol samting ya plante handred yia biaen long taem blong Moses nomo.

Plante kantri we semfala man i hed blong gavman mo hed blong jos tu, oli agensem man we i gat narafala tingting, oli mekem i strong tumas long ol man blong narafala jos, mo oli yusum paoa blong olgeta long fasin we i no stret. Loa blong Moses i soem se jos i mas defren long gavman. King i no gat raet blong mekem wok blong pris.​—⁠2 Kronikel 26⁠:​16-18.

Mo tu, Loa blong Moses i talem olsem wanem man i save stap klin long bodi mo blokem sik. Wan loa i talem se oli mas putum ol sikman oli stap longwe long ol narafala man gogo oli kamgud bakegen. Wan narafala loa i talem se oli mas berem sitsit blong man. Ol save ya, ol dokta tede oli faenemaot se i tru nomo. (Levitikas 13⁠:​1-59; 14⁠:​38, 46; Dutronome 23⁠:13) Hemia i samting blong sapraes, from we bighaf blong ol dokta long Ijip oli no gat plante save, mo oli pulum ol man blong trastem ol giaman tingting long saed blong gudlak mo badlak. Sipos ol man long ol pua kantri tede oli folem ol rul blong klin fasin we Moses i tijim ol man long hem, maet samting ya i blokem plante sik mo sevem laef blong plante milian man.

Ol Kristin tede oli no stap aninit long Loa blong Moses. (Kolosi 2⁠:​13, 14) Be i gud tumas blong stadi long loa ya yet. Hem i talem long ol man Isrel se oli mas wosipim God nomo, mo oli mas sakemaot ol aedol. (Eksodas 20⁠:4; Dutronome 5⁠:9) Loa ya i talem long ol pikinini se oli mas ona long papa mama blong olgeta. (Eksodas 20⁠:12) Mo tu, Loa ya i talem se man i no mas kilim narafala i ded, i no mas slip wetem man no woman blong narafala, i no mas stil, i no mas giaman, mo i no mas kavetem samting blong narafala. (Eksodas 20⁠:​13-17) Ol Kristin tede tu oli tinghae long ol rul ya.

Wan Profet Olsem Moses

Taem we yumi stap long hem naoia, i fulap long trabol. Wol ya i nidim wan lida olsem Moses. Moses i gat paoa mo haenem be i no hemia nomo. Hem i leftemap stret fasin tu, mo hem i no fraet, hem i gat sore long man, mo hem i jajem man long stret fasin. Taem Moses i ded, ating ol man Isrel oli askem se: ‘?Bambae i gat wan man bakegen we i olsem Moses?’ Moses hem wan i ansarem kwestin ya.

Ol buk blong Moses oli talem olsem wanem sik mo ded i stat, mo from wanem God i letem rabis fasin i gohed longtaem. (Jenesis 3⁠:​1-19; Job, japta 1, 2) Jenesis 3⁠:15 i talem faswan profet tok we i kamaot long God. !Hem i promes se bambae ol nogud samting oli finis! ?Olsem wanem samting ya bambae i hapen? Profet tok ya i talem se wan man bambae i bon mo man ya nao bambae i sevem ol man. Promes ya i mekem se ol man longtaem bifo oli putum tingting blong olgeta i stap strong long Mesaea ya we bambae i kam blong sevem ol man. ?Hu bambae i kam olsem Mesaea? Moses i givhan long yumi blong save hu ya Mesaea ya.

Klosap long en blong laef blong Moses, hem i talem wan impoten profet tok i se: “Bambae [Jeova] i putumap wan profet blong yufala olsem mi, we man ya bambae i kamaot long yumi nomo mo bambae yufala i mas obei long hem.” (Dutronome 18⁠:15) Biaen, aposol Pita i talem se ol tok ya i stret long Jisas.​—⁠Ol Wok 3⁠:​20-26.

Plante man Jiu we oli talem mining blong Baebol, oli no agri nating se Jisas nao hem i profet ya. Oli talem se vas ya i stret long olgeta trufala profet we oli kamaot biaen long Moses. Be long buk ya Tanakh​—⁠The Holy Scriptures, we Jewish Publication Society i raetem, Dutronome 34⁠:10 i talem se: “Moses i wan nambawan profet, mo kam kasem tede, i no gat wan narafala Profet bakegen we i olsem hem, we Hae God i save toktok wetem hem, stret long fes blong hem.”

I tru se i gat plante trufala profet we oli kamaot biaen long Moses. Tu long olgeta ya, hemia Aesea mo Jeremaea. Be i no gat wan long olgeta we oli frengud wetem God olsem Moses. God i toktok wetem Moses “stret long fes blong hem.” !Taswe promes blong Moses long saed blong wan profet we i ‘olsem hem,’ i mas minim wan man nomo​—⁠hemia Mesaea! Yumi makemgud se bifo we Kristin skul i stat mo bifo we ol giaman Kristin oli girap agens long ol trufala Kristin, ol man Jiu we oli gat hae save oli bin ting se profet we i olsem Moses, hemia Mesaea. Yumi luk samting ya long ol buk blong ol man Jiu olsem buk ya Midrash Rabbah. Buk ya i tokbaot Moses se hem i laef fastaem long wan “Man blong sevem ol man,” hemia Mesaea.

Yumi luksave klia se long plante fasin, Jisas i olsem Moses. (Lukluk bokis ya “Jisas​—⁠Wan Profet Olsem Moses.”) Jisas i gat paoa mo haenem. (Matiu 28⁠:19) Jisas i ‘wan kwaet man, mo tingting blong hem i stap daon.’ (Matiu 11⁠:29) Jisas i agensem fasin we i nogud mo i no stret. (Hibrus 1⁠:9) !Taswe hem i stret blong kam lida ya we yumi nidim tumas! !Hem nao we i no longtaem bambae i finisim ol nogud fasin blong wol ya mo i mekem wol i kam wan Paradaes olsem Baebol i talem!b

[Futnot]

[Bokis blong pija long pej 12]

Moses​—⁠Trutok Mo Giaman Tok

Ol sinema long saed blong Moses oli givim plante giaman tingting long ol man. Hemia sam long olgeta ya:

Giaman: Moses i no save se hem i man Jiu.

Trutok: Blong plante yia lelebet, stret mama blong Moses we i woman Jiu i givim titi long hem. Ol Wok 7⁠:​23-25 i soem se Moses i tingbaot ol man Jiu we oli slef se oli “man ples blong hem.”

Giaman: Moses i wantem kam king blong Ijip.

Trutok: Baebol i no talem olsemia. Buk blong John Kitto (Daily Bible Illustrations), i talem se i no gat wan samting we i soem se taem gel blong king “i karemaot Moses, samting ya i givim raet long hem blong kam king. . . . I luk olsem se i gat plante narafala boe we oli save tekem ples blong king.”

Giaman: Moses i kambak long Ijip blong fesem enemi blong hem.

Trutok: Baebol i talem se taem hem i kambak, olgeta enemi blong hem oli ded finis.​—⁠Eksodas 4⁠:19.

Giaman: Fastaem we God i talemaot ol Tenkomanmen, hemia afta we Moses i go antap long hil ya Sinae.

Trutok: Enjel blong God i talemaot ol Tenkomanmen long ful nesen blong Isrel. Biaen, ol man Isrel oli fraet nao oli askem long Moses blong go antap long hil blong toktok wetem God from olgeta.​—⁠Eksodas 19⁠:​20–20:19; 24⁠:​12-14; Ol Wok 7⁠:53; Hibrus 12⁠:​18, 19.

Giaman: Fero i no ded taem ol ami blong hem oli draon long Red Si.

Trutok: “King blong Ijip wetem ol soldia blong hem” oli lus long Red Si.​—⁠Eksodas 14⁠:28; Ol Sam 136⁠:15.

[Bokis blong pija long pej 13]

Jisas—⁠Wan Profet Olsem Moses

Hemia sam samting long saed blong Jisas we oli olsem Moses:

▲ Moses mo Jisas tugeta i no ded taem rula i givim oda blong kilim ol pikinini boe i ded.​—⁠Eksodas 1⁠:22; 2⁠:​1-10; Matiu 2⁠:​13-18.

▲ Jeova i singaot Moses i kamaot long Ijip wetem ‘fasbon pikinini’ blong Hem, nesen blong Isrel. Jeova i singaot fasbon Pikinini blong hem Jisas i kamaot long Ijip.​—⁠Eksodas 4⁠:​22, 23; Hosea 11⁠:1; Matiu 2⁠:​15, 19-21.

▲ Moses mo Jisas tugeta i livim kakae blong 40 dei long draeples.​—⁠Eksodas 34⁠:28; Matiu 4⁠:​1, 2.

▲ Moses mo Jisas tugeta i gat kwaet fasin, tufala i no gat flas tingting.​—⁠Namba 12⁠:3; Matiu 11⁠:​28-30.

▲ Moses mo Jisas tugeta i mekem ol merikel.​—⁠Eksodas 14⁠:​21-31; Ol Sam 78⁠:​12-54; Matiu 11⁠:5; Mak 5⁠:​38-43; Luk 7⁠:​11-15, 18-23.

▲ Moses mo Jisas tugeta i mekem se kontrak i stanap bitwin long God mo ol man blong Hem.​—⁠Eksodas 24⁠:​3-8; 1 Timoti 2⁠:​5, 6; Hibrus 8⁠:​10-13; 12⁠:24.

[Tok blong pija long pej 11]

Jisas nomo i profet we i olsem Moses

[Tok blong pija long pej 12]

Ol rul blong klin fasin long Loa blong Moses oli givhan blong blokem sik