!I Gat Rod Blong Sevem Wol Blong Yumi!
OL SAVE we yu yu ridim finis i soemaot klia se man i no save gohed blong yusum ol gudgudfala samting blong wol ya long spid we hem i stap mekem naoia. I tru se ol lida blong wol oli mekem sam gudfala samting blong traem stretem trabol ya we win mo wota i stap kam doti, mo oli blokem ol man blong oli no katemdaon plante tumas tri, mo oli traem mekem sam narafala trabol oli kamgud tu. Long yia 1972, Yunaeted Nesen i mekem Miting Blong Envaeronmen Blong Man, mo i mekem wanwan miting bakegen biaen. Long ol miting ya, klosap 163 kantri oli agri long ol plan we bambae oli folem blong traem winim trabol ya. ?Wanem i kamaot from? David Hunter we hem i daerekta blong Senta Blong Ol Loa Long Saed Blong Envaeronmen Blong Wol, i talem se: “Sore tumas, ol man oli mekem plante kontrak mo plan, oli saenem plante narafala pepa tu, be ol gudfala samting raonabaot long yumi oli stap lus yet. Klosap olgeta stadi we ol man oli mekem, oli soemaot se trabol ya i bigwan moa i bitim taem we Yunaeted Nesen i mekem miting blong hem long yia 1992.”
?From wanem wok blong olgeta blong bitim 30 yia i no mekem trabol ya i kamgud moa? Wan risen, hemia from we ol kantri oli traehad blong kasem moa mane. Evri kantri i kasem mane from olting we oli salem long ol man. Be blong wokem olting ya, ol faktri oli mas yusum ol gudfala samting raonabaot long yumi. Ale, trabol ya we ol gudfala samting blong wol ya i stap lus, i kam moa nogud. ?Wanem nao rod blong stretem trabol ya?
Man i No Save Bos Long Laef Blong Hem
Baebol i talem from wanem man i no save rulumgud wol ya. Profet Jeremaea i se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) !Tok ya i tru tumas!
Taem yu stap wokbaot long wan gudfala garen, ating yu yu glad tumas blong luk ol naesfala tri, flaoa, mo kakae we i stap gru. Be gudfala garen ya i no kamaot hem wan nomo. Sam man oli spenem plante aoa blong planem, wokem, mo klinim garen ya. Tingbaot olsem wanem wol blong yumi bambae i naes sipos ol man long evri ples oli lukaotgud long hem olsem oli lukaot long garen blong olgeta.
Faswan plan blong God we i Wokem olgeta samting, se ol man bambae oli lukaotgud long wol. Baebol i tokbaot taem ya we God i wokem ol samting, i se: “Hae God i tekem man ya, i putum hem i stap long gudfala ples ya, blong i lukaot long ol samting we i stap long hem.” (Jenesis 2:15) Antap long wok ya blong lukaot long Iden, God i talem long faswan man mo woman se tufala i mas mekem Paradaes i kam bigwan gogo i kavremap olgeta ples blong wol.—Jenesis 1:28.
Sore tumas, Adam mo Iv tufala i no obei long God, ale tufala i kam sinman, nao tufala i lusum janis ya blong lukaotgud long Paradaes mo mekem i kam bigwan. (Jenesis 3:1-6, 23) Yumi ya, yumi ol pikinini blong tufala ya, ale yumi tu yumi sinman. (Rom 5:12) Trabol ya we ol gudfala samting blong wol ya i stap lus, hem i wan nomo long plante trabol we oli stap soemaot se ol man oli no save bos long laef blong olgeta. I klia se ol man oli no naf blong stretem ol trabol ya. Oli nidim help blong wan Man we i bigwan moa long olgeta.
Rod Blong Stretem Trabol Ya
Taem Jisas i stap long wol, hem i tijim ol disaepol blong hem blong oli prea se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:10, NW ) Baebol i talem se Kingdom ya blong God long heven, hem nao i rod blong mekem wol i kam paradaes. (Ol Sam 37:10, 11) Taem Kingdom ya i rul, wol bambae i kam klin mo graon bambae i karem fulap kakae. (Ol Sam 72:16) God bambae i meksua se win mo wota tu, tufala i kam klin, mo ol man bambae oli lanem blong lukaotgud long ples blong olgeta. ?Olsem wanem yumi save sua long samting ya?
Baebol i talem se wol ya ‘bambae i no save muf nating.’ (Ol Sam 104:5) Long stret taem we God i jusum, olgeta man bambae oli kasem ol nambawan blesing we oli save stap olwe, olsem gudfala helt, plante kakae, mo ol strong haos. ?Yu yu wantem lanem moa long saed blong ol plan ya blong God? Sipos yes, yu save toktok wetem ol Witnes blong Jeova. !Bambae oli glad blong soem ol tok blong Baebol long yu, blong pruvum se i gat rod blong sevem Wol blong yumi!
[Tok blong pija long pej 10]
God bambae i meksua se ol man oli lukaotgud long ples blong olgeta
[Credit Line]
Girl and farmer: © Jeremy Horner/ Panos Pictures