?Olsem Wanem Yumi Evriwan i Save Givhan Blong Mekem—Haos i Stap Klin?

Man blong Wekap! long Meksiko i raetem stori ya

!I GUD tumas blong stap laef long wan ples we i klin! Be long ol bigfala taon naoia, i had moa blong mekem ples blong yumi i stap klin mo i gat oda, from we i gat plante tumas doti i stap olbaot.

Munisipol i traehad blong mekem ol rod oli klin, taem oli sanem ol trak blong doti i goraon. Nating se oli mekem olsem, long sam ples, doti i stap hivap bigwan, i no luk naes nating, mo i givim sik long ol man. Ol bigfala hip doti oli save givim ples long ol rat, kakros, mo plante narafala bebet we oli karem sik. ?Yu yu save mekem wan samting blong blokem trabol ya? Yes, yu save mekem se haos mo yad blong yu i stap klin mo i gat oda.

Stret Tingting

Samfala oli gat tingting se ol haos mo yad we oli doti, oli blong ol puaman nomo. Be samting ya i no tru. Taem man i no gat mane, ating i hadwok moa blong mekem ples i stap klin. Be wan waes tok blong ol man Spen i talem se: “Fasin pua mo fasin klin, tufala i no badfren.” Samfala we oli gat mane, be ples blong olgeta tu i no klin.

Blong mekem se haos mo yad blong yumi i stap klin, yumi mas gat wan tingting we i pusum yumi long rod ya. Yes, wan klin haos i dipen bigwan long tingting blong evriwan long famle. From samting ya, i gud blong tingting long samting we yumi evriwan i save mekem, blong givhan blong mekem haos mo eria blong yumi i stap klin.

Wan Program Blong Klinim Haos

I luk olsem we wok blong mama long haos i no save finis samtaem. Hem i mas rerem kakae, rerem ol pikinini blong oli go long skul, mo antap long ol samting ya, hem i mas klinim haos mo yad. ?Yu yu makem se plante taem mama nao i pikimap ol doti klos mo ol narafala samting we ol pikinini oli livim olbaot long rum blong olgeta? Wan gudfala program blong klinim haos we evriwan long famle oli joen long hem, i save givhan blong mekem se wok blong mama i no hevi tumas.

I gat sam samting we samfala woman oli ting se i gud blong klinim evri dei, be sam narafala samting oli klinim evri wik no evri manis nomo. I gat sam samting bakegen we oli mekem plan blong klinim wan taem long wan yia nomo. Long ol haos Betel long ol hedkwota blong ol Witnes blong Jeova long ol wanwan kantri, oli klinimgud ol kabod wan taem long wan yia. Hemia i givim janis long olgeta blong sakemaot ol samting we oli no moa yusum, mo blong stretem ol samting long kabod. Mo tu, oli folem wan program blong waepem ol wol long ol rum.

Sam ples long haos, olsem ples blong swim, i impoten we yumi klinim oltaem. Samting ya i lukaotgud long helt blong famle. I gud blong klinim ples blong swim smosmol evri dei, be sipos yumi klinimgud wan taem long wan wik, bambae yumi kilim ol bebet we oli karem sik. Samfala oli ting se i no gat rod blong klinimgud tolet, bambae i doti lelebet oltaem. ?Be yu yu luk sam haos we tolet i klingud oltaem? Yes, hemia from we ol man blong haos ya oli klinim oltaem, mo oli yusum stret sop no meresin blong klinim.

Yu mas klinimgud kijin tu. Nating se yu wasem ol plet mo waepem oven mo tebol evri dei, be maet wan taem long wan manis i nidim we yu klinimgud. Yu save klinim oven, aesbokis, mo ples blong wasem plet tu. Sipos oltaem yu klinim ol kabod we yu putum kakae long olgeta, bambae i no gat kakros mo ol narafala bebet insaed long olgeta.

Famle i Mas Wok Tugeta

Sam papa mama oli putum sam rul we ol pikinini oli mas folem, mo oli tijim pikinini blong stretem rum blong olgeta long moning bifo we oli go long skul. Ol pikinini oli stretem bedsit mo blangket long bed, oli karem ol doti klos blong olgeta oli go long ples blong was, mo oli putum ol samting i gobak long stret ples blong hem. Wan gudfala rul blong evriwan, hemia: “I gat wan stret ples blong evri samting, mo evri samting oli mas stap long stret ples blong olgeta.”

Maet sam memba blong famle oli gat wan spesel wok we oli mekem oltaem, no wan haf blong haos we oli klinim oltaem. Ating papa i meksua se ol tul blong hem oli stap long stret ples oltaem, mo maet i klinim ples ya fulwan evri yia. Ating wan pikinini i save givhan long hem blong mekem wok ya. ?Hu i save klinim ol flaoa long fored blong haos mo katem gras? ?Oli mas mekem samting ya hamas taem long wan manis blong mekem se haos mo yad i klin mo i naes? Maet i gat wan rum klosap long haos no kijin we i blong putum ol samting we yumi no yusum oltaem. Ating i nidim blong jekem rum ya sam samtaem mo sakemaot sam samting blong mekem i klin. ?Ale, hu bambae i mekem wok ya? Sam papa mama oli givim ol wok olsem long ol pikinini blong olgeta. Oli mekem se wanwan pikinini i tekem taem blong hem blong mekem wok ya, nao long rod ya, olgeta pikinini oli serem wok ya.

Ale, yufala i mas mekem wan gudfala program blong lukaot long haos blong yufala. Nating se yu wan yu klinim ples, no yu joen wetem famle blong yu blong klinim, no yu pem narafala blong givhan long yu, be yu mas gat wan gudfala program. Wan mama we haos blong hem i klin oltaem, hem i talem se evriwan long famle oli wok tugeta blong mekem haos i stap klin. Hem i se: “Mi wetem trifala gel blong mi, mifala i serem ol wok ya. Norma Adriana i klinim ples blong sidaon, tufala rum blong slip, vranda mo fored blong haos. Ana Joaquina i klinim kijin. Mi mi wasem ol klos mo mekem sam narafala wok, mo María del Carmen i wasem ol plet.”

Yad i Mas Klin

?Olsem wanem long yad? Nating sipos yu stap long wan flas haos no long wan rafraf haos nomo, be yu nidim wan program blong klinim mo fiksimap ol samting long yad. Maet wan hinsis long get i brok. Yu save se sipos i stap olsem, get bambae i kamaot fulwan, mo bambae i mekem ples i luk doti. Sem mak long ol plastik we oli fulap long doti. Oli mekem ples i doti taem oli hivap jes afsaed long doa blong haos no long saed blong rod. Mo tu, sipos yumi sakem ol tin, ol tul, mo sam narafala samting, oli go long wan hip afsaed long haos, hemia tu i save kam ples blong ol bebet mo rat.

Sam famle oli folem plan se wan dei evri wik oli brum afsaed long haos, klinim yad mo saed blong rod, mo maet rod tu long fored blong haos blong olgeta. I tru se long sam ples, gavman i gat wan gudfala plan blong mekem ol eria oli stap klin. Be long sam narafala ples, munisipol i no folem wan program nating. Tru ya, eria blong yumi bambae i naes moa mo bambae i gud moa long helt blong yumi, sipos yumi givhan blong mekem i stap klin.

Sam famle oli gat wan program olsem yumi talem finis. Be oli raetem program ya long pepa tu, mo oli fasem long wol blong haos, blong evriwan long famle oli save ridim mo folem. Hemia i save givhan bigwan. Yumi no tokbaot evri samting we yu mas save long saed blong klinim haos mo yad. Wan samting we yumi no tokbaot yet se, yu mas jusum sop mo ol narafala meresin we oli stret long ples blong yu, mo yu mas save wanem tul we yufala i nidim blong pem taem yufala i gat smol vatu.

Ol smosmol advaes ya i soem se wok ya blong lukaot long haos mo yad, i wok blong olgeta evriwan long famle. Rimemba se, klin haos mo yad i no dipen long mane, be i dipen long stret tingting blong yu.

[Bokis blong pija long pej 16]

Wan Gudfala Program Blong Klinim Haos

Yusum ol klia ples long lis ya blong ademap sam moa samting we yu wantem mekem

Impoten: Yu no mas miksimap ol meresin blong klinim haos, antap moa, yu no mas miksim losavel wetem amonia. Samting ya i denja tumas

✔ Evri Dei

❏ Rum blong slip: Stretem ol bedsit mo putum ol samting oli gobak long stret ples blong olgeta

❏ Kijin: Wasem ol plet mo klinim dis we yu yusum blong wasem plet. Meksua se i no gat plante tumas samting long ol tebol mo antap long ol kabod. Brum mo pasem mop, sipos yu luk se i nidim.

❏ Ples blong swim: Klinim ples blong wasem han mo tolet. Putum ol samting oli gobak long stret ples blong olgeta

❏ Ples blong sidaon mo ol narafala rum: Putum ol samting oli go long stret ples blong olgeta. Waepem ol tebol mo jea. Brum mo pasem mop, sipos yu luk se i nidim

❏ Evri ples long haos: Karemaot ol doti mo sakem i go long tin doti

✔ Evri Wik

❏ Rum blong slip: Jenisim ol bedsit. Brum mo pasem mop, sipos yu luk se i nidim. Waepem ol tebol mo jea

❏ Kijin: Klinim ples blong faea no oven, waepem ol samting we oli wok wetem lektrik, mo ol tap. Pasem mop

❏ Ples blong swim: Brasem ples blong swim mo ol tap. Yusum meresin blong klinim tolet, mo waepem ol kabod. Putum ol klin tawel. Brum mo pasem mop

✔ Evri Manis

❏ Ples blong swim: Klinimgud ol wol

❏ Evri ples long haos: Waepem ol wud we oli goraon long ol doa. Klinimgud ol pilo blong ol jea

❏ Yad, vranda, mo ples blong putum trak: Brum, mo klinim sipos i nidim. Meksua se i no gat doti i stap hivap, mo ol narafala samting we yu no moa nidim

✔ Evri Sikis Manis

❏ Rum blong slip: Wasem ol kaliko blong kavremap bed

❏ Kijin: Tekemaot ol samting long aesbokis mo klinimgud

❏ Ples blong swim: Tekemaot ol samting long ol kabod mo klinim. Sakemaot ol samting we yu no moa nidim, mo ol samting we oli no moa gud

❏ Evri ples long haos: Waepem ol laet mo ol fan. Waepem ol doa. Wasem ol net waea long ol windo, waepem ol windo mo ol wud we i goraon long ol windo

✔ Evri Yia

❏ Rum blong slip: Tekemaot ol samting long ol kabod mo klinimgud. Sakemaot ol samting we yu no moa nidim. Wasem ol blangket. Wasem ol matres mo pilo mo draemap long san

❏ Kijin: Tekemaot evri samting long ol kabod mo antap long ol kabod, mo klinimgud. Sakemaot ol samting we yu no moa nidim. Muvum evri samting blong yu save klinim floa aninit

❏ Evri ples long haos: Waepem ol wol. Wasem ol pilo long ol jea mo ol kaliko blong windo

❏ Ples blong putum trak, mo blong kipim ol samting long yad: Brumgud. Putumgud ol samting, mo sakemaot ol samting we yu no moa nidim

[Tok blong pija long pej 18]

“I gat wan stret ples blong evri samting, mo evri samting oli mas stap long stret ples blong olgeta”

[Tok blong pija long pej 18]

I gud blong givim ol samting we yu no moa yusum i go long ol narafala