Kamaot Long Trap Ya Blong Dring Bitim Mak

“Papa blong mi i alkolik, mo mi mi folem fasin blong hem. Taem mi gat 12 yia, mi mi stap dring finis. Afta we mi mared, mi mi drong evri dei. Mi stat blong kilim woman blong mi, mo plante taem polis i mas kam long haos. Helt blong mi i kam nogud. Dring i mekem se mi kasem wan sik we blad i ron olbaot insaed long bel blong mi, nao klosap mi mi ded. Biaen, mi kasem sik ya cirrhosis, mo blad blong mi i sot tu. Mi joen long sam grup we oli stap traehad blong lego dring, be nogat. Mi harem olsem we mi fas long net blong spaeda, mo mi no save kamaot.”​—⁠VÍCTOR,a AJENTINA.

BAKEGEN mo bakegen, yumi harem ol stori olsem long saed blong ol man we oli dipen fulwan long dring. Olsem Víctor, oli harem se oli stap fas long trap ya mo oli no save kamaot. ?Olsem wanem? ?I gat rod blong winim ol trabol we i kamaot from dring, no blong blokem ol trabol ya i no kasem yumi? ?Sipos yes, wanem rod ya?

Luksave Problem

Faswan samting se, man we i stap dring mo ol famle blong hem oli mas luksave se hem i gat wan problem. Fasin blong hem blong nidim dring oltaem, hem i wan haf nomo blong problem blong hem. Problem ya i kamaot from we longtaem finis i kam, hem i dring. Be ating fastaem hem i dring smol nomo. Yumi sapraes blong save se ol man we oli aksiden long trak, mo ol man blong faet, mo ol man we oli rao wetem narafala taem oli dring, bighaf blong olgeta oli dipen fulwan long dring. Makemgud tok blong Wol Helt Ogenaesen (WHO) se: “Beswan rod blong daonem ol problem we oli kamaot from dring, i blong traem jenisim fasin blong ol man we oli dring smosmol oltaem, i no blong lukluk long ol man we oli dring tumas.” (Mifala nomo i putum italiks.) ?Olsem wanem long yu? ?Yu yu dring moa i bitim wanem we ol dokta oli talem se i stret? ?Yu yu dring taem yu mas mekem wan wok we yu nidim blong tingting gud long hem mo tekem aksen kwiktaem? ?Fasin blong yu blong dring i stap mekem trabol i kamaot insaed long famle blong yu no long wok? “Beswan rod” blong blokem ol bigfala trabol long fiuja, i blong luksave se yu yu stap long denja, mo katem namba blong ol dring we yu stap tekem. Sipos yu wet gogo yu dipen fulwan long dring, bambae i had tumas blong lego.

Plante man we oli dring oli no wantem luksave se oli gat wan problem. Oli talem se: “Mi mi dring sem mak long ol narafala,” no, “Mi mi save lego enitaem nomo.” Wan man Rasia we nem blong hem Konstantin, i talem se: “Klosap mi mi ded from dring, be mi neva ting se mi stap dipen long dring, ale mi neva traem blong lego.” Wan man Polan, nem blong hem Marek, i talem se: “Plante taem mi bin traem blong lego, be mi no wantem luksave se mi mi alkolik. Mi bin ting nating long ol trabol we dring i stap mekem long mi.”

?Olsem wanem blong givhan long wan man blong hem i luksave se hem i gat wan problem long saed blong dring, mo se hem i mas tekem aksen blong winim problem ya? Fastaem, hem i mas luksave se dring nao i stamba blong ol problem blong hem, mo se, sipos hem i lego dring, bambae laef blong hem i kamgud moa. Niuspepa ya, La Revue du Praticien​—⁠Médecine Générale, i talem se man olsem i mas jenisim tingting blong hem. Hem i no mas talem se: “Mi mi dring from we woman blong mi i ronwe long mi mo from we mi lusum wok blong mi.” Be hem i mas talem se: “Woman blong mi i ronwe long mi mo mi mi lusum wok blong mi, from we mi mi dring.”

Blong givhan long wan man olsem blong i jenisim tingting blong hem, yu save folem advaes ya: Lesingud long hem, askem ol kwestin we oli pulum hem blong talemaot klia ol filing blong hem. Soem se yu kasem save long filing blong hem, ale hem bambae i haremgud blong save se i gat wan man we i kea long hem. Taem yu luk se hem i kamgud lelebet, talem ol gudfala toktok long hem. Yu no mas jajem hem, mo yu no mas soemaot wan tingting we i save blokem hem blong i no moa talemaot ol filing blong hem mo i no moa wantem kasem help. Wan samting we i save givhan long hem: Askem long hem blong raetem tu lis, wan blong talem ol samting we bambae oli kamaot sipos hem i gohed blong dring, mo narawan blong talem ol samting we bambae oli kamaot sipos hem i lego dring.

Lukaot Help

Taem wan man no woman i stat dring bitim mak, hemia i no min se hem i nogud mo se i no save kamgud bakegen, nogat. I tru we samfala oli no nidim help blong lego dring, oli save mekem olgeta nomo. Be plante man we oli dipen fulwan long dring oli nidim help blong dokta.b Sam long olgeta, help we oli kasem taem oli pas long dokta, hemia nomo i naf blong oli lego. Be sam narafala we oli kasem bigfala trabol long bodi mo tingting taem oli traem lego, maet oli mas go slip long hospital. Plante taem ol trabol ya long bodi mo tingting bambae i finis long tu kasem faef dei. Nao dokta i save givim meresin we i daonem filing ya se oli nidim blong dring, mo blong halpem olgeta blong oli no moa dring nating.

Taem man i folem wan tritmen blong lego dring, hemia i no min se i winim trabol ya finis. Meresin i save givhan blong smoltaem, be i no finisim trabol ya blong olwe. Wan man Franis we nem blong hem Alain, i kasem tritmen plante taem. Hem i talem se: “Taem mi mi aot long hospital, mi stat blong dring bakegen, from we mi joen wetem ol fren blong mi we oli man blong dring. Stamba problem se, i no gat wan gudfala risen we i pusum mi blong lego dring.”

Fulumap Emti Ples

Taem man i lego dring, i olsem we hem i lusum wan gudfala fren, nao i gat wan emti ples long laef blong hem. From samting ya, plante man oli stat blong dring bakegen. Vasiliy blong Rasia i talem se: “Mi tingbaot dring oltaem nomo. Sipos wan dei i pas we mi no dring, mi harem se laef blong mi i blong nating nomo.” Long tingting blong man we i dipen long dring, samting we i impoten moa i bitim ol narafala samting, hemia blong kasem dring we hem i harem se i nidim. Jerzy blong Polan i talem se: “Mi mi stap laef blong dring nomo, mo blong faenem mane blong pem dring.” I klia se man we i lego dring i mas faenem wan narafala risen blong laef. Sipos no, bambae hem i gobak bakegen long dring.

Wan buk blong WHO, i givim advaes long olgeta we oli stap traehad blong lego dring, se i impoten we oli fulumap laef blong olgeta wetem ol gudfala wok. Sipos oli no mekem olsem, bambae oli gobak long dring bakegen. Wan wok we buk ya i talem, hemia wok long saed blong jos.

Sipos man i bisi long ol wok long saed blong spirit, samting ya i save givhan long hem blong kamaot long trap blong dring. Olsem Alain, we hem i go long kalabus tri taem from trabol we hem i mekem taem hem i drong. Afta long namba tri taem, hem i stat stadi Baebol wetem ol Witnes blong Jeova. Hem i se: “Taem mi stadi, mi luk se Baebol i givim wan niufala risen blong laef, mekem se mi no gobak long dring bakegen. Tingting we i pusum mi i blong mekem Jeova i glad, i no blong lego dring nomo.”

Taem Yu Foldaon Bakegen

Ol man blong givim advaes oli talem se i impoten tumas we ol narafala oli leftemap tingting blong alkolik we i stap traehad blong lego dring, mo we oli givhan long hem. Plante alkolik oli lusum ol famle mo fren blong olgeta from trabol ya. Taem oli no moa gat fren, tingting i save foldaon olgeta, mo samfala oli kilim olgeta i ded bakegen. Buk we yumi tokbaot antap, i givim advaes long olgeta we oli stap traehad blong halpem man we i dring tumas, i se: “Yu no mas tok agensem hem, nating se yu kros long hem mo yu harem nogud long fasin blong hem. Yu mas tingbaot se i no isi blong jenisim wan fasin blong laef. Bambae i mas gat sam wik we hem i gohed gud mo sam wik we hem i foldaon. Hem i nidim tumas we yu leftemap tingting blong hem, we yu givhan long hem blong no bitim limit we i stret long hem no blong no tajem dring nating, mo we yu givim sam gudfala tingting long wanem samting hem i save mekem blong winim trabol ya.”

Wan man we nem blong hem Hilario, i dring blong klosap 30 yia. Hem i se: “Samting we i givhan long mi, hemia lav mo kea we ol fren long kongregesen blong ol Witnes blong Jeova oli givim long mi. Plante taem mi foldaon bakegen long dring, be oltaem oli stap blong leftemap tingting blong mi, mo oli talem sam advaes blong Baebol long stret taem we mi mi nidim.”

Sipos yu yu stap traehad blong lego dring, rimemba se, ating sam samtaem bambae yu foldaon bakegen. Rod blong kamgud bakegen i strong. Yu mas tingbaot ol taem ya we yu foldaon bakegen olsem haf blong rod ya. !Yu mas gohed blong traehad! Tingtingbak long samting we i bin hapen blong mekem yu yu foldaon, mo no letem samting ya i hapen bakegen. Makemgud ol samting we i pulum yu blong dring. Ating yu dring taem yu harem se yu les, no taem tingting blong yu i foldaon, no taem yu harem se yu no gat fren, no taem yu rao long wan narafala, no taem yu wari, no maet taem yu stap wetem sam narafala we oli dring. !Yu mas stap longwe long ol samting ya we i save pulum yu! Jerzy i tekem tu yia blong lego dring fulwan. Hem i se: “Mi mi lanem blong makem mo kasem save long ol filing we oli pulum mi blong dring. Naoia mi stap longwe long evri samting we i mekem mi mi harem se mi wantem dring. Mi no go long ol ples we ol man oli stap dring. Mi no kakae samting we i gat alkol long hem. Mi no ravem ol oel long bodi blong mi we i gat alkol long hem mo mi no dring ol meresin we i gat alkol long hem. Mo tu, mi no lukluk ol pija mo lesin long ol toktok we ol bisnesman oli mekem blong pulum man blong pem dring.” Plante man oli prea long God blong i givim paoa blong hem ‘we i bigwan tumas, i no blong olgeta.’ Oli faenem se hemia nao bigfala samting we i givhan long olgeta blong bos long filing ya blong wantem dring.​—⁠2 Korin 4⁠:7; Filipae 4⁠:​6, 7.

!Kam Fri!

Yes, i gat rod blong kamaot long trap blong dring, nating se maet yu mas gohed olwe blong faet agensem traem ya. Olgeta man we yumi tokbaot long stori ya, oli winim dring finis. Naoia, helt blong olgeta i moagud, famle blong olgeta i haremgud, mo oli gohed gud long wok blong olgeta. Alain i talem se: “Naoia mi harem se mi fri, mi no moa fas long trap ya blong dring.” Konstantin i talem se: “Mi mi stadi blong kasem save gud long Jeova. Samting ya nao i mekem se mi no lusum famle blong mi. Naoia mi harem se laef blong mi i gat mining. Mi no dipen long dring blong haremgud.” Víctor i talem se: “Mi harem se mi mi wan friman. Naoia mi glad long mi wan, mo mi save rod we mi mas folem long laef blong mi.”

Maet man i stap long denja blong kasem kil long wan aksiden from we hem i dring tumas, no maet hem i gat sam problem from dring, no maet hem i stap dipen fulwan long dring. Nating se i olsem wanem, be hem i save jenisim fasin blong hem. Sipos yu luk se dring i stap spolem glad mo helt blong yu, yu mas mekem tingting blong yu i strong blong lego dring. Olsem nao, bambae yu mekem i gud long yu wan mo long olgeta we oli lavem yu.

[Futnot]

[Tok blong pija long pej 10]

Faswan samting, yu mas luksave se yu gat wan problem

[Tok blong pija long pej 11]

Plante oli nidim help blong dokta blong oli save lego dring

[Tok blong pija long pej 12]

Prea i save givhan long yu

[Tok blong pija long pej 12]

!Yu save kasem paoa blong stap longwe long dring!