Baebol i Talem Wanem
?Jisas i Rili Pikinini Ya Blong God?
WETEM strong bilif, aposol Pita i talem long Jisas se: “Yu yu Mesaea [“Kraes,” NW ] ya. Yu yu Pikinini blong God ya we i laef, i stap we i stap.” (Matiu 16:16) Vas ya i wan long plante narafala vas blong Baebol we i tokbaot Jisas olsem Pikinini blong God. Ol man we oli intres long skul oli givim plante defdefren tingting long tok ya se Jisas i Pikinini blong God.
Plante man we oli bilif se Jisas Kraes i God, oli faenem i had blong eksplenem from wanem Baebol i kolem Jisas se Pikinini blong God. Ol tingting we oli givim long saed ya oli soemaot se sipos Jisas i God be hem i no save stap olsem pikinini blong God long semtaem. Sam narafala oli tingbaot Jisas olsem wan impoten man long histri, wan waes man, maet wan trufala profet blong God. ?Baebol i rili tijim wanem? ?Bilif we yu gat long saed ya i rili impoten?
Fasbon Blong God
Baebol i soemaot se i gat wan taem we God i stap hem wan. From lav blong hem, hem i tekem desisen blong givim laef ya, olsem wan presen, i go long wan man we i save kam pikinini blong hem mo hem i save stap olsem papa blong hem. Be hem i no kam wan papa olsem ol papa blong wol ya. Defren olgeta, Jeova i yusum bigfala paoa ya blong hem blong wokem wan spirit man we i waes. Spirit man ya we i “faswan long olgeta samting we God i wokem,” hemia nao Jisas Kraes. (Revelesen 3:14, NW; Ol Proveb 8:22) From we God hem wan i wokem Jisas taem Hem i stap hem wan, i stret we Baebol i kolem Jisas ya se “stret Pikinini blong God” mo “fasbon long ol samting we God i wokem.”—Jon 1:14; Kolosi 1:15, NW.
I klia se from we Jisas i fasbon long olgeta samting we God i wokem taswe i no hem we i Wokem olgeta samting mo i no hem we Baebol i tokbaot taem i se “hem nomo i God, i no gat narafala.” (1 Timoti 1:17) Nating se i olsem, God i givim plante wok tu long Pikinini blong hem. Eksampol, tru long Jisas, God i wokem “olgeta narafala samting,” we hemia i minim tu olgeta enjel. Baebol i tokbaot ol enjel ya se oli “ol pikinini blong God” from we Jeova nomo i Man ya we i Givim Laef long olgeta.—Kolosi 1:16, NW; Job 1:6, NW; 38:7.
Afta we God i rerem wol ya blong ol man oli stap long hem, Hem i toktok long fasbon Pikinini blong hem se: “I gud yumi mekem man, mo i gud yumi mekem we hem i tekem fasin blong yumi, i olsem yumi.” (Jenesis 1:26; Ol Proveb 8:22-31) Taswe Jeova i wokem faswan man long wol ya, hemia Adam, we hem i man, tru long spirit man ya we biaen i karem nem ya Jisas.—Luk 3:38.
Jisas i Kam Wan Pikinini Blong God Long Wol
Aposol Jon i talem long yumi se long wan taem we God i makemaot finis, spirit Pikinini ya blong God “i kam man, nao i stap wetem yumi.” (Jon 1:14) Blong mekem jenis ya we Jisas we i wan spirit man i mas gat bodi olsem man, God i mekem wan merikel taem hem i tekem laef blong Jisas long heven mo i putum long bel blong wan yang woman Jiu, nem blong hem Meri. Long rod ya, Jisas i stap olsem pikinini blong God yet nating se hem i wan man olsem yumi. Antap moa, from we God nao i givim laef ya, be i no wan man, taswe Jisas i bon we i stretgud olgeta, hem i no gat sin. Enjel Gabriel i talem long Meri se: “Pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.”—Luk 1:35; Hibrus 7:26.
Papa blong Jisas hem wan i soemaot long Jisas se hem i pikinini blong God nating se hem i gat bodi olsem man. Long taem we Jisas i baptaes, Jon Baptaes i luk we heven i open mo i harem wan voes i kamaot we i talem se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:16, 17) Hemia nao from wanem Jon i talem long ol disaepol blong hem se: “Mi mi luk samting ya, mo mi talemaot se man ya, hem i Pikinini blong God.”—Jon 1:34.
Taem Jisas i mekem wok blong hem long wol ya, Jisas i no toktok flas mo talemaot se hem i Mesaea, Pikinini ya blong God. (Mak 8:29, 30) Plante taem, hem i letem ol man nomo oli luksave olgeta wan se hem i Mesaea taem oli lesin long ol tijing blong hem, oli lukluk fasin blong laef blong hem mo taem oli luk ol merikel we hem i mekem we plante long ol merikel ya oli hapen long ol pablik ples. Eksampol, hem i mekem olgeta we “oli sik, mo sam we oli harem bodi blong olgeta i soa” oli kamgud bakegen. (Matiu 4:24, 25; 7:28, 29; 12:15) Ol blaenman, ol man we leg blong olgeta i nogud, ol man we oli gat rabis sik blong skin, ol man we sora blong olgeta i fas, olgeta evriwan oli kam long Jisas mo hem i mekem olgeta oli kamgud bakegen. !Hem i mekem ol dedman oli laef long ded tu! (Matiu 11:4-6) Long fored blong ol disaepol blong hem, Jisas i wokbaot long wota mo i kwaetem win mo solwota long taem blong wan hariken. Paoa ya we Jisas i soem i pusum ol disaepol blong talem se: “Tru, yu yu Pikinini blong God.”—Matiu 14:24-33.
Olsem Wanem Pikinini Blong God i Save Givhan Long Yu
?From wanem God i sanem wan Pikinini ya nomo we hem i gat blong i kam long wol ya mo blong i ded long wan fasin we i nogud olgeta? Hem i mekem olsem blong ‘olgeta man we oli bilif long hem bambae oli no save lus, oli gat laef we i no save finis.’ (Jon 3:16) Yes, tru long ded blong hem nomo, Jisas i save ‘givim laef blong hem blong pem rod blong plante man oli go fri.’ (Matiu 20:28) Tru ya, long histri blong ol man, i no gat wan man we i soemaot bigfala lav long olgeta man olsem we Jeova mo fasbon Pikinini blong hem, tufala i mekem.—Rom 8:32.
Afta long ded blong Jisas, Baebol i tokbaot hem long wan spesel fasin se hem i ‘stret Pikinini blong God’ mo se “[God] i mekem hem i laef bakegen” olsem wan spirit Pikinini blong God. (Rom 1:4; 1 Pita 3:18) Blong klosap 1900 yia, Jisas i stap long saed blong papa blong hem, i stap wet wetem longfala tingting. Afta long taem ya, hem i kam King long Kingdom blong God—hemia wan gavman we i stap long heven we i no longtaem bambae i rul antap long fulwol.—Ol Sam 2:7, 8; Daniel 7:13, 14.
?Yu yu wantem we Pikinini ya blong God we i gat olgeta paoa i glad long yu? Sipos yes, yu mas gat strong tingting blong lanem ol tijing blong hem mo mekem ol tijing ya oli wok long laef blong yu. Jisas hem wan i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”(Jon 17:3) !Yes, i rili impoten blong gat bilif long Pikinini ya blong God!—Jon 3:18; 14:6; 1 Timoti 6:19.
?YU YU BIN TINGBAOT?
◼ ?Olsem wanem Jisas nomo i stret Pikinini ya blong God?—Jon 1:3, 14; Revelesen 3:14.
◼ ?From wanem yu save bilif se Jisas i Pikinini blong God?—Matiu 3:16, 17.
◼ Taem yu bilif long Jisas olsem Pikinini blong God, ?olsem wanem samting ya i save givhan long yu?—Jon 3:16; Jon 14:6; 17:3.
[Tok blong pija long pej 14]
Ol waes tijing blong Jisas mo ol bigfala merikel we hem i mekem oli pruvum se hem i no wan man olbaot nomo