Ol Yangfala Oli Askem . . .
?From Wanem i Gud Blong Rid?
“Mi mi no gat longfala tingting blong ridim buk. Mi laekem moa blong wajem televisin.”—Margarita, 13 yia, Rasia.
“Sipos oli letem mi mi jus se mi wantem ridim wan buk no plei basketbol, mbae mi jusum basketbol.”—Oscar, 19 yia, Yunaeted Stet.
SIPOS yu yu stap ridim ol tok ya, i min se yu luksave we riding i wan impoten samting blong lanem. Nating se i olsem, ating yu yu no laekem tumas blong ridim wan buk no wan magasin. Maet yu tingbaot riding olsem taem yu mas tekem meresin. Yu save se riding bambae i mekem i gud long yu, olsem meresin, be sipos i gat rod blong yu ronwe long riding, olsem we yu ronwe long meresin, ale bambae yu glad moa.
Wekap! i askem kwestin long sam yangfala long 11 kantri blong oli talem from wanem oli faenem i had blong rid mo wanem gudfala samting we oli kasem taem oli rid. Toktok blong olgeta i stap daon.
?From wanem yu faenem i had blong rid?
“Mi mi no gat taem blong rid.”—Semsihan, 19 yia, Jemani.
“Riding i hadwok. Mi ting se mi mi les lelebet.”—Ezekiel, 19 yia, Filipin.
“Mi no laekem taem oli fosem mi blong ridim sam samting we mi no intres nating long hem.”—Christian, 15 yia, Inglan.
“Sipos wan buk i smol nomo, maet mbae mi glad blong ridim. Be sipos hem i bigwan, ale mi harem se bambae i longwan tumas blong ridim.”—Eriko, 18 yia, Japan.
“I isi nomo blong narafala samting i pulum tingting blong mi. Mi no save putum tingting blong mi i stap long samting we mi stap ridim.”—Francisco, 13 yia, Saot Afrika.
I gud we ol yangfala Kristin oli ridim Baebol. (Ol Sam 1:1-3) ?Yu yu faenem i had blong ridim Baebol? ?From wanem i had?
“!Baebol i wan bigfala buk tumas! !Mi ting se long ful laef blong mi bambae mi neva save rid flatem buk ya!”—Anna, 13 yia, Rasia.
“Sam haf blong Baebol oli had tumas blong kasem save long hem mo oli no pulum intres blong mi tumas.”—Jezreel, 11 yia, India.
“I had long mi blong ridim Baebol evri dei from we mi no gat gudfala program.”—Elsa, 19 yia, Inglan.
“I had long mi from we mi gat plante wok mo homwok tu we oli tekem bighaf blong taem blong mi.”—Zurisadai, 14 yia, Meksiko.
“I had long mi blong ridim Baebol from we mi no save katemdaon taem we mi spenem long ol pleplei.”—Sho, 14 yia, Japan.
I klia se riding i had. ?Be yu ting se i gat gudfala samting i save kamaot taem yu rid? ?Taem yu rid, yu luk se samting ya i halpem yu?
“Riding i mekem mi mi gat moa save, mo i mekem mi mi harem se mi no fraet blong toktok wetem ol man.”—Monisha, 14 yia, India.
“Riding i mekem tingting blong mi i spel mo i halpem mi blong mi no tingting tumas long ol trabol.”—Alison, 17 yia, Ostrelia.
“Riding i mekem se long tingting blong mi mi save go long narafala kantri we maet bambae mi neva gat janis blong go wokbaot long hem.”—Duan, 19 yia, Saot Afrika.
“Riding i halpem mi blong mi faenemaot samting mi wan, bitim we mi stap dipen oltaem long narafala blong stap talem long mi.”—Abihú, 16 yia, Meksiko.
?Wanem i save halpem yu blong yu glad blong rid?
“Stat long taem we mi smol nomo, papa mama blong mi, tufala i pulum mi blong rid blong tufala i harem.”—Tanya, 18 yia, India.
“Papa mama blong mi, tufala i pulum mi blong pijarem samting we mi stap ridim, nao samting ya i kam olsem trufala samting.”—Daniel, 18 yia, Inglan.
“Papa i talem se i gud mi ridim ol buk blong Baebol we mi intres moa long olgeta, olsem buk blong Sam mo Proveb. Naoia, taem mi ridim Baebol, mi glad, mi no harem se hem i olsem wan baden.”—Charene, 16 yia, Saot Afrika.
“Taem mi gat fo yia nomo, papa mama blong mi, tufala i putum wan tebol mo wan buksef long rum blong mi. Long buksef ya, tufala i putum ol buk we mi kasem stat taem mi bebi yet i kam.”—Airi, 14 yia, Japan.
?From wanem yu ting se i impoten blong ridim Baebol?
“Ol man oli gat plante rong bilif long saed blong Baebol. I gud tumas sipos yu save jekemap ol samting ya yu wan.” (Ol Wok 17:11)—Matthew, 15 yia, Yunaeted Stet.
“I tru, taem mi ridim Baebol mi mas tingting plante. Be taem mi rid long hem, samting ya i halpem mi blong mi no fraet blong talemaot ol tingting blong mi mo blong mi talem samting i klia taem mi tokbaot ol bilif blong mi long narafala man.” (1 Timoti 4:13)—Jane, 19 yia, Inglan.
“Taem mi ridim Baebol, mi harem olsem se Jeova i stap toktok stret long mi. Samtaem ol tok blong hem i tajem ol filing blong mi.” (Hibrus 4:12)—Obadiah, 15 yia, India.
“Mi lanem blong laekem ridim Baebol from we hem i talem long mi tingting we Jeova i gat long saed blong mi mo i givim gudfala advaes long mi.” (Aesea 48:17, 18)—Viktoriya, 14 yia, Rasia.
?Wetaem yu stap ridim Baebol mo ol buk we oli tokbaot Baebol?
“Mi gat wan program. Mi ridim wan japta blong Baebol evri moning taem mi girap.”—Lais, 17 yia, Bresil.
“Mi ridim Baebol mo ol narafala buk blong Baebol long pablik transpot taem mi stap go long skul. Mi stap mekem olsem blong fo yia finis.”—Taichi, 19 yia, Japan.
“Mi ridim sam haf blong Baebol evri naet bifo we mi go slip.”—Maria, 15 yia, Rasia.
“Mi ridim fo pej blong ‘Wajtaoa’ no ‘Wekap!’ evri dei. Long rod ya mi stap ridim evri magasin fulwan bifo we niuwan i kam.”—Eriko, 18 yia, Japan.
“Mi ridim Baebol evri moning bifo we mi go long skul.”—James, 17 yia, Inglan.
Ol toktok ya oli soemaot se riding i save halpem yu blong yu sua moa long yu wan taem yu toktok, mo i save halpem yu tu blong yu kasem moa save. Taem yu ridim Baebol mo ol buk we oli tokbaot Baebol—olsem Wekap! ya—yu save kam “klosap long God.” (Jemes 4:8) !Taswe, nating sipos riding i hadwok long yu, yu no mas lego!
SAM SAMTING BLONG TINGBAOT
◼ ?From wanem i impoten we yu ridim Baebol?
◼ ?Olsem wanem yu save “yusum evri janis” blong ridim Baebol mo ol buk we oli tokbaot Baebol?—Efesas 5:15, 16.
[Bokis blong pija long pej 28]
JOENEM SAMTING WE YU RIDIM LONG SAMTING WE YU SAVE FINIS
Joenem ol save we yu ridim i go wetem ol save we yu gat finis long saed blong yu wan mo ol samting raonabaot long yu. Taem yu stap rid, yu save askem ol kwestin ya long yu wan:
◼ Joenem Save Blong Buk Ya Long Narafala Buk ?Ol samting we mi ridim long buk ya oli sem mak long samting we mi ridim finis long narafala buk, magasin, no stori? ?Ol man we buk ya i stap tokbaot, oli gat fasin we i sem mak long sam man we mi bin ridim stori blong olgeta long narafala buk?
◼ Joenem Save Ya Long Yu Wan ?Olsem wanem save we i stap long buk ya i laenap wetem laef blong mi, kalja blong mi, ol problem blong mi? ?Mi save yusum save ya blong mi winim ol problem blong mi mo mekem laef blong mi i kam gud moa?
◼ Joenem Save Ya Long Ol Samting Raonabaot Long Yu ?Buk ya i tijim wanem long mi long saed blong ol anamol, envaeronmen, ol defdefren kaen kalja, no ol problem we ol man long wol oli kasem? ?Save we i stap long buk ya i tijim wanem long mi long saed blong Bigman we i mekem olgeta samting?