Baebol i Talem Wanem
?Man Blong Mekem Pis i Save Kasem Gudfala Samting?
TAEM Jisas Kraes i givim bigfala toktok blong hem antap long hil, hem i talem se: “Olgeta we oli man blong mekem pis oli save harem gud.” Mo hem i talem tu se: “Olgeta we oli kwaet man oli save harem gud, from we God bambae i givim wol ya long olgeta.” (Matiu 5:5, 9, lukluk futnot) Wan man blong mekem pis i no mekem faet wetem narafala mo tingting blong hem i kwaet. Be i no hemia nomo. Wan man blong mekem pis i lukaot rod blong mekem i gud long narafala mo hem i wok blong leftemap pis.
?Ol tok blong Jisas long vas antap, oli gud yet blong man i folem tede? Sam man oli ting se long wol tede, yu no mas fraet long narafala, yu no mas letem narafala i win, mo samtaem tu, yu mas faet no tok strong sipos yu wantem winim samting. ?I stret blong givimbak long man we i spolem yu, mo faet bak long man we i faetem yu? ?I moagud blong stap kwaet mo mekem pis? Bambae yumi tokbaot tri risen from wanem yumi mas tinghevi long ol tok ya blong Jisas we i se: “Olgeta we oli man blong mekem pis oli save harem gud.”
◼ HAT NO TINGTING WE I KWAET Ol Proveb 14:30 i talem se: “Sipos tingting blong man i stap kwaet oltaem, hemia bambae i mekem bodi blong hem i stap gud.” Plante dokta oli talem se fasin blong kros mo blong wantem faet oltaem, i save mekem hat blong man i wik nao maet man i kasem strok no hat atak. I no longtaem i pas, wan niuspepa long saed blong meresin mo helt i tokbaot ol man we oli gat sik blong hat, mo hem i talem se fasin blong faerap long kros i olsem wan posen. Niuspepa ya i talem tu se “man we i letem kros blong hem i kam antap hem i save mekem sik tu i kam antap.” Be ol man we oli lukaot rod blong stap long pis oltaem, oli save gat wan hat no tingting we i kwaet mo samting ya i mekem i gud long olgeta.
Tingbaot stori blong man ya Jim. Hem i gat 61 yia blong hem mo hem i stap tijim Baebol long ol man Vietnam long Yunaeted Stet. Jim i talem se: “Taem mi yangfala mi spenem sikis yia long ami mo oli sanem mi tri taem blong faet long Vietnam. Mi savegud wanem ya raf fasin, kros, mo filing blong harem nogud taem yu no naf blong stretem wan problem. Ol samting ya we oli bin hapen long laef blong mi, oli stap kambak oltaem long tingting blong mi, mekem se mi no save slipgud long naet. Ol tingting ya oli kam hevi tumas long mi ale mi stap siksik, bel blong mi i soa mo ol fasin blong mi oli jenis.” ?Wanem i halpem Jim? Hem i ansa se: “Stadi blong Baebol we mi mekem wetem ol Witnes blong Jeova i sevem laef blong mi. Mi lanem se God i gat plan blong mekem wan niufala wol we pis nomo i stap long hem, mi lanem olsem wanem blong kam wan ‘niufala man’, ale ol samting ya oli karem pis i kam long hat mo tingting blong mi. From samting ya tu, ol trabol mo sik we mi stap kasem oli godaon bigwan.” (Efesas 4:22-24; Aesea 65:17; Maeka 4:1-4) Plante narafala man tu oli faenemaot se taem oli traehad blong kam kwaet man, samting ya i halpem olgeta blong kamgud moa long filing, bodi, mo long saed blong spirit.—Ol Proveb 15:13.
◼ YUMI FRENGUD WETEM OL MAN Taem yumi man blong mekem pis, yumi save frengud moa wetem ol narafala. Baebol i talem se yumi mas lego fasin blong ‘holem kros, kros kwik, fasin blong sakem tok i go antap, mo fasin blong tok nogud long yumi,’ yes yumi ‘mas finis long fasin ya we yumi stap badfren long yumi.’ (Efesas 4:31) Ol man oli no wantem joen wetem wan man we i lukaot faet mo rao oltaem, ale plante taem, man ya i stap hem wan nomo, i no gat fren we i save halpem hem. Ol Proveb 15:18 i talem se: “Fasin ya we man i stap kros kwik, hem i stap pulum rao i kam, be fasin we man i gat longfala tingting, hem i stap mekem ol man oli kam kwaet.”
Andy i wan Kristin elda long New York City, hem i gat 42 yia. Taem hem i smol nomo hem i lanem faet. Hem i stori se: “Taem mi gat eit yia nomo oli trenem mi long boksing. Taem mi boksing wetem narafala man, mi no tingbaot se hem i man. Tingting blong mi hemia nomo se ‘mi mas givim kil sipos no mi nao mbae mi kasem kil.’ Ale biaen, mi stat folem wan grup blong ol stronghed yangfala. Mifala i faet wetem ol narafala grup blong yangfala mo mifala i mekem bigfala noes long rod. Plante taem i gat man i poenem masket long hed blong mi mo i wantem stikim mi long naef. Ol fren blong mi oli no ol trufala fren mo mifala i stap fraet oltaem long mifala.”
?Wanem i halpem Andy blong lukaot pis? Hem i se: “Wan dei, mi go long miting blong ol Witnes blong Jeova long Haos Kingdom. Wantaem nomo mi filim se ol man long miting ya oli gat trufala lav. Stat long taem ya, mi joen wetem ol man ya we oli gat kwaet fasin mo lav ale kampani blong olgeta i halpem mi blong wokem wan hat no tingting we i kwaet. Sloslo samting ya i ronemaot ol tingting blong mi blong bifo. Naoia mi gat ol trufala fren.”
◼ HOP LONG FIUJA Yumi man blong mekem pis from wan risen we i moa impoten. Taem yumi gat fasin ya yumi respektem mo obei long wanem we God i wantem. Tok blong God, Baebol, i talem long yumi se: “Long olgeta tingting blong yufala, yufala i mas wok had blong mekem pis.” (Ol Sam 34:14) Sipos yumi bilif se Jeova God i rili stap mo yumi lanem mo obei long ol tijing blong hem we oli givim laef, ale samting ya i save openem rod long yumi blong yumi frengud wetem hem. Taem yumi frengud wetem hem olsem, ale bambae yumi save kasem ‘pis we God i givim.’ Pis ya i save stap long yumi nomata wanem traem no trabol we yumi kasem long laef.—Filipae 4:6, 7.
Mo tu, taem yumi man blong mekem pis, yumi soemaot long Jeova se yumi naf blong go long niufala wol we pis nomo bambae i stap long hem. Ale, taem God i finisim rabis fasin mo i “givim wol ya” long olgeta we oli kwaet man, bambae yumi save stap blong luk samting ya. !Hemia wan nambawan blesing ya!—Ol Sam 37:10, 11; Ol Proveb 2:20-22.
Yes, yumi luksave klia nomo se tok ya blong Jisas i impoten tumas se ‘olgeta we oli man blong mekem pis oli save harem gud.’ Yumi save gat wan tingting no hat we i kwaet, yumi save gat ol gudfala fren, mo wan strongfala hop long saed blong fiuja. Olgeta blesing ya oli blong yumi taem yumi traem bes blong yumi blong ‘faenem rod blong gat pis wetem olgeta man.’—Rom 12:18.
[Tok blong pija long pej 20]
“Ol trabol mo sik we mi stap kasem oli godaon bigwan.”—Jim
[Tok blong pija long pej 21]
“Naoia mi gat plante trufala fren.”—Andy