?Olsem Wanem Blong Wokem Wan Hapi Mared?
“Man . . . i mas go joen wetem woman blong hem, nao tufala bambae i kam olsem wan bodi nomo.”—JENESIS 2:24.
JEOVA, God ya we i Wokem yumi, hem i statem fasin ya blong mared, we i joenem man mo woman blong olwe. Jenesis 2:18, 22-24 i talem se: “Nao Hae God i talem se, ‘I nogud we man ya i stap hem wan. I moa gud mi mekem wan fren blong hem we i olsem hem, blong i givhan long hem.’ Nao hem i tekem rib ya, i mekem wan woman long hem, mo i tekem hem i kam pas long man ya. Mo taem man ya i luk hem, hem i talem se, ‘Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi. Bambae nem blong hem Woman, from we hem i kamaot long man.’ Taswe oltaem, man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.”
I tru, i no isi blong wokem wan mared we i stap longtaem mo we i hapi, be yumi save mekem samting ya. Plante mared man mo woman oli stap tugeta blong 50 yia, 60 yia, no longtaem moa, mo oli hapi nomo. ?Wanem nao i mekem se oli hapi? Olgeta ya oli wok oltaem blong mekem mared blong olgeta i stapgud mo oli no tingbaot olgeta nomo be oli “stap lukaot rod blong mekem [hasban no waef] blong [olgeta] i glad.” (1 Korin 7:33, 34) Hemia wan wok, i tru. Be sipos yu yu rere blong spenem taem mo paoa blong yu long mared blong yu, bambae yu save wokem wan mared we i hapi. Kaen mared olsemia i save stap longtaem.
Folem Ol Advaes
Wan man blong bildim haos we i mekem gud wok blong hem oltaem i lukluk plan blong haos bifo we hem i stat bildim haos ya. Long sem fasin, blong wokem wan hapi mared, yumi mas tingting gud fastaem long ol advaes we God i givim long saed blong plan blong mared. Ol advaes ya oli stap long Baebol. Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong . . . stretem ol krangke fasin.”—2 Timoti 3:16.
Ol hasban mo ol waef oli save lanem plante samting long saed blong mared sipos oli tingbaot fasin we Jisas i mekem long ol disaepol blong hem. ?From wanem? Baebol i tokbaot fasin fren blong Jisas mo ol man we bambae oli rul wetem hem long heven, se i olsem wan man mo woman we i mared. (2 Korin 11:2) Jisas i stap tru long ol disaepol blong hem, nomata wanem trabol we i kamaot. “Hem i stap lavem olgeta olwe.” (Jon 13:1) Jisas i wan lida we i gat sore. Hem i tingbaot wanem we ol man blong hem oli no naf blong mekem mo i tingbaot ol slak fasin blong olgeta. Neva hem i askem olgeta blong mekem no givim samting we oli no naf blong mekem mo we oli no naf blong givim.—Jon 16:12.
Nating se ol gudfala fren blong hem oli mekem hem i harem nogud tumas, be hem i no faerap long kros. Hem i no talem ol tok blong daonem olgeta. Hem i soem tingting daon olsem God, mo kaengud fasin, taem hem i stretem olgeta. (Matiu 11:28-30; Mak 14:34-38; Jon 13:5-17) Sipos yu ridim mo tingting dip long ol fasin we Jisas i mekem long ol man blong hem mo fasin we olgeta tu oli mekem we i soem lav long Jisas, bambae yu save lanem plante gudfala rod blong wokem wan mared we i hapi.—1 Pita 2:21.
Wokem Wan Fandesen We i Strong
Ol trabol bambae oli mas kamaot insaed long mared blong yu. Yu no save blokem samting ya. Taem ol trabol ya oli kamaot bambae oli soemaot sipos fandesen blong mared blong yu i strong no nogat. Bambae oli traem fasin joen we yu yu gat wetem hasban no waef blong yu. Beswan fandesen we i save holem wan mared i stap hapi hemia fasin blong stap tru mo lav. Jisas i soemaot se i impoten tumas we hasban mo waef i tinghae long promes blong mared: “From we God i joenem tufala olsem, man i no mas brekem mared blong tufala.” (Matiu 19:6) “Man” we i no mas brekem mared ya i minim hasban mo waef tu, we tufala i promes blong stap tru long tufala.
Sam man maet oli no laekem blong tingbaot se oli mas holem wan promes long narafala. Oli harem se samting ya i olsem wan baden. Tede, ol man oli laekem mekem samting we olgeta nomo i wantem. Ale i had long olgeta blong lego ol samting ya we oli wantem mo mekem i gud long narafala mo holem wan promes long narafala.
?Wanem i save givhan long hasban mo waef blong tinghae long promes blong mared? Aposol Pol i raetem se: “Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.” (Efesas 5:28, 29) Taswe tok ya se mared i “joenem tufala” i minim se yu yu wantem tumas we hasban no waef blong yu i harem gud olsem we yu wan yu wantem harem gud. Ol mared man mo woman oli mas jenisim tingting blong olgeta se oli no moa mekem samting blong olgeta wan nomo be oli mekem samting blong tufala tugeta.
Evri taem yu winim wan trabol we i kamaot insaed long mared blong yu, yu kam moa waes. Waes ya we yu kasem bambae i mekem yu yu glad. Ol Proveb 3:13 i talem se: “Man we i stap kasem save, mo we i stap kam waes, hem bambae i save harem gud.”
Wokem Mared Blong i Save Stap Longtaem
Sipos yu wantem we wan haos i stap longtaem mo i sefgud blong famle blong yu i stap long hem, yu mas bildim haos ya i strong. Long sem fasin, taem yu wokem mared blong yu, tingbaot se yu wantem we mared ya i stap longtaem. Taswe, wokem ol fasin insaed long mared blong yu we oli save mekem mared i stanap strong nomata wanem trabol i kam kasem yu olsem faea. Waes we God i givim, fasin blong givim samting wetem gladhat, fasin luksave, fasin blong fraetgud long God, gat filing long narafala, tinghae long ol loa blong God, mo wan bilif we i strong, hemia ol nambawan fasin we yu mas tingbaot olgeta olsem gol we i sas tumas.
Fasin glad mo fasin blong haremgud insaed long mared oli no stanap long hamas samting we yutufala i gat no long wok no edukesen blong yutufala. Fasin glad mo fasin blong haremgud oli kamaot long hat mo tingting blong yutufala. Mo trutok we i stap long Baebol i save mekem ol fasin ya oli kam strong moa. Advaes ya se “ol man oli mas lukaot gud long fasin blong wok blong olgeta,” i stret tu long saed blong mared.—1 Korin 3:10.
Taem Ol Problem Oli Kam Antap
Blong wan haos i stanap longtaem, man i mas lukaotgud mo fiksimap ol samting long haos ya. Long mared i sem mak. Taem yutufala i givgivhan long yutufala blong kasem ol mak we yutufala i wantem kasem, mo taem yutufala i soem ona mo respek long yutufala, mared blong yutufala i save stap strong. Yutufala i no mas letem fasin we wan i tingbaot hem wan nomo i kam insaed long mared, mo yutufala i mas bos long fasin blong kros.
Taem man i holem kros i stap long hat blong hem mo i no traem winim, no taem hem i harem nogud long wan samting we hem i no stretem, hem i save lusum lav mo filing insaed long mared. Aposol Pol i givim advaes ya i go long ol hasban i se: “Yufala ol man we i mared, yufala i mas lavem ol woman blong yufala. Yufala i no mas mekem i strong long olgeta, oltaem yufala i mas mekem i gud long olgeta.” (Kolosi 3:19) Semfala advaes ya i go long ol waef. Taem hasban mo waef tufala i kea, i kaengud, mo i traem kasem save long filing mo tingting blong tufala, samting ya i karem glad mo i mekem tufala i haremgud insaed long mared. Blokem fasin blong stap kroskros mo blong wantem rao mo faet. Samting ya i save blokem trabol tu blong i no kam moawas. Pol i pulum tingting blong yumi se: ‘Yufala i mas mekem i gud long yufala, mo yufala i mas kaen gud long yufala. Mo yufala i mas fofogivim yufala.’—Efesas 4:32.
?Olsem wanem sipos i gat sam samting we yu no save kontrolem, no sam samting oli mekem tingting blong yu i hevi, no yu harem we hasban no waef blong yu i no gat respek long yu? I gud yu tokbaot samting ya long fasin we i klia, long hasban no waef blong yu. Be, taem i gat mastik we oli no rili impoten, i moagud yu letem lav nomo i kavremap ol mastik ya.—1 Pita 4:8.
Wan hasban we i kasem plante traem lelebet long mared blong hem blong 35 yia, i talem se yu save kros hamas long patna blong yu, be “yu neva mas stop blong storian tugeta.” Hem i ademap waes advaes ya tu se: “Yu neva mas stop blong lavem hem.”
!Yu Save Wokem Wan Hapi Mared!
I tru, i no isi blong wokem wan mared we i hapi. Be taem tufala we i mared, tufala i gat strong tingting blong tingbaot God long mared blong tufala, tufala i save hapi mo harem gud long mared blong tufala. Taswe, skelem laef insaed long famle blong yu. ?Yutufala i stap mekem ol wok blong God tugeta? ?Yutufala i tinghevi long promes we yutufala i mekem long mared? Mo tingbaot toktok blong Jisas se mared we i hapi i no stanap long hasban no waef nomo. Be hemia i stanap long Jeova God we hem nao i Stamba blong mared. Hem i se: “From we God i joenem tufala olsem, man i no mas brekem mared blong tufala.”—Matiu 19:6.
SAM SAMTING MOA BLONG RIDIM
Buk ya Spesel Rod Blong Mekem Famle i Hapi, we ol Witnes blong Jeova i printim, i givim sam gudfala advaes blong wokem wan mared we i hapi mo i strong. Plante taosen mared man mo woman raon long wol oli glad tumas from ol advaes blong Baebol we oli kamaot long buk ya. Samting ya i halpem olgeta blong kamgud moa long mared blong olgeta.
[Bokis blong pija long pej 9]
?Wanem i Save Halpem Yu Blong Wokem Wan Mared We i Hapi?
◼ Stadi Baebol oltaem tugeta, mo prea long God blong i halpem yutufala mo i lidim yutufala blong winim ol trabol.—Ol Proveb 3:5, 6; Filipae 4:6, 7; 2 Timoti 3:16, 17.
◼ Ol filing blong yu long saed blong seks oli mas go long patna blong yu nomo.—Ol Proveb 5:15-21; Hibrus 13:4.
◼ Taem yutufala i toktok long saed blong ol problem no samting we i mekem yutufala i harem nogud, yutufala i no mas sem blong talemaot ol tingting blong yutufala, yutufala i no mas giaman, mo yutufala i mas toktok wetem lav.—Ol Proveb 15:22; 20:5; 25:11.
◼ Toktok tugeta long fasin we i kaengud, tingbaot filing blong narawan; blokem fasin blong faerap long kros, fasin blong komplen tumas, mo fasin blong sakem ol strong tok blong spolem narawan.—Ol Proveb 15:1; 20:3; 21:9; 31:26, 28; Efesas 4:31, 32.
◼ Yu mas gat tingting daon blong folem ol advaes blong Baebol nating sipos maet long tingting blong yu hasban no waef blong yu i no stap traehad blong folem ol advaes ya.—Rom 14:12; 1 Pita 3:1, 2.
◼ Wokhad blong kam gud moa long ol Kristin fasin we Baebol i tokbaot.—Galesia 5:22, 23; Kolosi 3:12-14; 1 Pita 3:3-6.
[Tok blong pija long pej 7]
Folem plan we God i putum long Baebol blong wokem wan gudfala mared
[Tok blong pija long pej 7]
Fandesen blong mekem mared blong yu i strong hemia lav mo fasin blong stap tru
[Tok blong pija long pej 8]
Wokem ol gudfala fasin we i kamaot long God blong winim ol traem we oli olsem faea
[Tok blong pija long pej 8]
Mared i save stap longtaem sipos yu lukaotgud long hem mo fiksimap oltaem, olsem man i mekem long wan haos