Ol Yangfala Oli Askem . . .
?Olsem Wanem Mi Save Pruvum Bilif Blong Mi Se God i Wokem Evri Samting?
“Taem klas blong mifala i tokbaot evolusen, mi luk se tijing ya i agensem evri samting we mi bin lanem. Oli tokbaot evolusen olsem se i wan samting we oli pruvum finis, mo hemia i mekem se mi fraet blong talemaot tingting blong mi.”—Ryan, we i gat 18 yia blong hem.
“Taem mi mi gat samwe long 12 yia blong mi, tija blong mifala i bilif strong long evolusen. !Hem i putum wan saen blong man ya Darwin long trak blong hem! From samting ya, mi mi fraet blong tokbaot bilif blong mi se God nao i wokem evri samting.”—Tyler, we i gat 19 yia blong hem.
“Wan dei, tija blong mifala i talem se nekis taem bambae mifala i tokbaot evolusen. Mi mi fraet bigwan. Mi save se bambae mi mas pruvum bilif blong mi long fored blong klas, mo rao i save kamaot from.”—Raquel, we i gat 14 yia blong hem.
ATING yu yu olsem Ryan, Tyler, mo Raquel. Yu yu wari taem klas blong yu i storian long evolusen,a from we yu yu bilif se God nao i “mekem olgeta samting.” (Revelesen 4:11) Taem yu luk ol samting raonabaot long yu, yu luk plante pruf se Man we i mekem ol samting ya i waes we i waes. Be ol buk we yufala i yusum long skul oli talem se yumi kamaot long evolusen, mo tija blong yu tu i talem olsem. Maet yu harem se yu no gat raet blong agensem ol man ya we oli gat moa save i winim yu. Mo tu, ating yu wari se ol yangfala long klas blong yu bambae oli agensem yu kwiktaem sipos yu stat blong tokbaot God.
!Be yu no mas fraet! I no yu nomo we i bilif se God i wokem evri samting. Plante narafala man, wetem sam saentis mo plante tija tu, oli no bilif long evolusen. !Long Yunaeted Stet, klosap 4 long evri 5 studen oli bilif se God i wokem evri samting, nating se ol buk we oli yusum long skul oli talem defren samting!
Be maet yu stap wari yet se: ‘?Bambae mi talem wanem sipos mi mas pruvum bilif blong mi se God i wokem evri samting?’ Nating se yu sem mo yu fraet, be yu save gat strong tingting se yu yu naf blong pruvum bilif blong yu. Be fastaem, yu mas reregud.
!Skelemgud Bilif Blong Yu!
Sipos papa mama blong yu i folem Kristin bilif, maet yu yu bilif se God i wokem evri samting from we tufala i bin tijim yu olsem. Be naoia yu stap kam bigwan, ale yu wantem mekem wosip long God we i kamaot long ‘tingting blong yu’ wan, mo yu wantem se bilif blong yu i stanap long wan strong fandesen. (Rom 12:1, NW ) Long faswan handred yia, Pol i leftemap tingting blong ol Kristin blong oli “traem olgeta samting fastaem.” (1 Tesalonaeka 5:21) ?Olsem wanem yu save mekem olsem long saed blong bilif blong yu se God i wokem evri samting?
Fastaem, tingbaot tok we Pol i raetem long saed blong God. Hem i se: “[God] i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” (Rom 1:20) Nao tingbaot bodi blong yumi, wol ya, skae mo ol sta, mo ol samting long solwota. Lukluk gud long ol bebet, ol flaoa, ol tri, ol anamol, mo ol narafala samting we yu yu intres long olgeta. Nao, yusum “tingting blong yu” blong traem faenem ansa long kwestin ya, ‘?From wanem mi mi bilif se God i wokem evri samting?
Blong ansa long kwestin ya, Sam we i gat 14 yia blong hem, i tingbaot bodi blong yumi. Hem i se: “Bodi i gat fulap defdefren haf blong hem, we i had blong kasem save long wok blong olgeta, mo oli wokgud tugeta. !Samting ya i no save kamaot olsem nomo!” Holly we i gat 16 yia blong hem, i gat semfala tingting. Hem i se: “Stat long taem we dokta i faenemaot se mi mi gat sik blong suga, mi kasem plante save long saed blong wok we ol haf blong bodi oli mekem. Mi mi sapraes long wok blong smol haf ya pancreas we i stap long bel blong yumi, biaen long gat. Hem i mekem wan bigfala wok blong givhan long blad mo ol narafala haf blong bodi blong oli wokgud.”
Sam yangfala oli tingbaot narafala samting we i pruvum se God i wokem evri samting. Jared we i gat 19 yia blong hem, i talem se: “Bigfala samting we i pruvum long mi se God i wokem man, hemia se yumi evriwan i harem se yumi wantem wosipim wan samting, mo yumi naf blong mekem wosip ya. Mo tu, yumi laekem ol samting we oli naes, mo yumi wantem lanem moa long saed blong evri samting. Tijing blong evolusen i talem se yumi nidim ol fasin ya blong yumi save laef. Be samting ya i no tru, yumi save stap laef yet sipos yumi no gat ol fasin ya. Wan bilif nomo we mi luk se i stret, hemia se wan Man i putum yumi long wol ya, mo hem i wantem se yumi haremgud long laef.” Tyler, we yumi tokbaot fastaem finis, hem i gat semfala tingting. Hem i se: “Mi tingbaot wok we ol tri mo flaoa oli mekem blong givhan long ol laef samting, mo ol smosmol samting insaed long olgeta we oli joen blong mekem wok ya. Ol samting ya i bitim tingting blong mi, mo i pruvum long mi se i gat wan God we i Wokem evri samting.”
Sipos yu tingting gud long wanem samting we i pruvum long yu se God i wokem evri samting, mo sipos yu rili sua long samting ya long tingting blong yu, bambae i isi moa blong yu pruvum bilif blong yu long ol narafala. Taswe, yu mas mekem olsem Sam, Holly, Jared, mo Tyler. Yu mas tektaem blong lukluk mo tingting dip long ol nambawan samting we God i wokem. Afta, yu mas “lesin” long ol save we ol wok ya blong God oli stap “talem” long yu. Bambae yu kasem sem tingting olsem aposol Pol. Hem i luksave se God i stap, from “ol samting blong wol ya we [God] i bin mekem.” Mo tu, ol samting ya ‘oli mekem ol fasin blong God oli klia, blong yumi luk.’b
Yu Mas Save Samting We Baebol i Rili Tijim
Yes, blong pruvum bilif blong yu se God i wokem evri samting, yu mas lukluk gud long ol samting we God i wokem. Antap long hemia, yu mas save wanem we Baebol i rili tijim long saed ya. I no nid blong yu rao from sam kwestin we Baebol i no talem stret ansa blong olgeta. Tingbaot sam long olgeta.
◼ Buk blong saens we mifala i yusum long skul i talem se wol ya mo ol narafala planet long skae oli bin stap plante taosen milian yia. Baebol i no talem hamas yia stret we wol ya mo ol narafala planet oli bin stap. Taswe hem i no agensem tingting ya se olgeta planet long skae wetem wol ya tu, maet oli bin stap plante taosen milian yia bifo we God i stat wokem ol samting long faswan “dei.”—Jenesis 1:1, 2.
◼ Tija blong mi i talem se God i no save wokem wol ya long sikis dei nomo. Long saed blong ol sikis “dei” we God i wokem evri samting long olgeta, Baebol i no talem se wanwan long olgeta oli gat 24 aoa nomo. Blong kasem moa save long saed ya, ridim pej 24-27 blong buk ya.
◼ Klas blong mifala i givim plante save we i soem se ol anamol mo ol man oli stap jenis long ol yia we oli pas. Baebol i talem se God i wokem ol samting ‘folem ol wanwan kaen’ blong olgeta. (Jenesis 1:20, 21, NW ) Baebol i no givim tingting ya se laef i kamaot from samting we i no laef, nogat. Mo Baebol i no talem se God i mekem wan selc nomo, nao sel ya i jenis i kam ol narafala samting, olsem evolusen i talem. Be i tru se olgeta we oli blong wan ‘kaen,’ oli no sem mak evriwan. Taswe Baebol i no agensem tingting ya se maet i gat sam jenis i kamaot long ol anamol we oli sem ‘kaen,’ be oli no save jenis i kam wan defren kaen olgeta.
!Yu Mas Sua Long Bilif Blong Yu!
Yu no nid blong harem se yu sem no yu narakaen from we yu bilif long God. Taem yu luk ol pruf, i stret nomo blong bilif se wan man we i gat bigfala save mo waes i wokem yumi. Mo tingting ya i agri wetem save blong ol saentis tu. Blong bilif long evolusen, man i mas trastem tok we i no gat pruf blong hem mo ol merikel we i no gat man i wokem olgeta. Be i no olsem long saed blong bilif long God. Afta we yu kasem moa save long saed ya, ating bambae yu luksave se i gat plante pruf blong soem se God i wokem evri samting. Mo taem yu yusum tingting blong yu blong pruvum samting ya, bambae yu no moa fraet blong talemaot bilif blong yu long ol yangfala long klas blong yu.
Samting olsemia i kamtru long Raquel, we yumi tokbaot hem long fashaf blong stori ya. Hem i se: “Mi tingting gud blong tu dei, nao mi luksave se mi no mas haedem bilif blong mi. Ale mi makem sam haf blong buk ya Life—How Did It Get Here? By Evolution or by Creation? mo mi givim long tija blong mi. !Biaen, hem i talem long mi se buk ya i jenisim tingting blong hem bigwan long saed blong evolusen, mo se bambae hem i no fogetem ol save ya taem hem i mas tijim ol yangfala bakegen long evolusen!
[Ol futnot]
a Bilif ya se laef i stat long wan smol samting mo i stap jenis gogo i kam olgeta laef samting.
b Ol save long tufala buk ya Life—How Did It Get Here? By Evolution or by Creation? mo Is There a Creator Who Cares About You? i givhan long plante yangfala. Ol Witnes blong Jeova oli wokem tufala buk ya.
c Ol smosmol samting insaed long bodi blong man we ol man blong saens oli save luk wetem glas nomo.
SAM SAMTING BLONG TINGBAOT
◼ ?Wanem sam isi rod blong eksplenem bilif blong yu long ol yangfala long skul, se God i wokem evri samting?
◼ ?Olsem wanem yu save soemaot tangkiu long God ya we i Wokem evri samting?—Ol Wok 17:26, 27.
[Bokis blong pija long pej 13]
“FULAP PRUF”
“?Bambae yu talem wanem long wan yangfala we papa mama blong hem i tijim hem se God i Wokem evri samting, be long skul hem i lanem evolusen?” Oli askem kwestin ya long wan Witnes blong Jeova we hem i stap stadi dip long ol smosmol laef samting we man i save luk wetem wan strong glas nomo. Ale, hem i ansa olsem: “Yu mas yusum janis ya blong pruvum long yu wan se God i rili stap. Ating yu bilif long God from we papa mama blong yu i tijim yu olsem, be yu wan yu mas faenem ol pruf tu, nao bambae yu yu luksave se laef i kamaot long God. Sam tija oli no save ‘pruvum’ evolusen taem ol yangfala oli askem long olgeta blong mekem olsem. Long taem ya oli jes luksave se oli bilif long evolusen from we oli bin kasem tijing long saed ya. Yu yu save foldaon long semfala trap ya, yu save bilif long God from we narafala i tijim yu olsem. Taswe, i impoten we yu pruvum long yu wan se God i stap. I gat fulap pruf we i no had blong faenem.”
[Bokis/Foto blong pija long pej 14]
?FROM WANEM YU YU BILIF LONG GOD?
Raetemdaon tri samting we oli pruvum long yu se i gat wan God we i Wokem evri samting:
1. ․․․․․
2. ․․․․․
3. ․․․․․