Sip Blong Noa Mo Fasin Blong Wokem Ol Sip

BLONG bitim 40 yia, wok blong mi i blong mekem plan blong ol sip mo wokem olgeta. Mi mekem plan blong ol defren kaen sip, wetem ol enjin blong olgeta mo ol narafala samting we oli nidim blong ron long solwota. Long yia 1963, mi stap long British Columbia, Kanada, nao wan Witnes blong Jeova i kam, i soemaot long mi ol tok blong Baebol long saed blong sip blong Noa. Buk blong Jenesis i talem se sip ya i olsem wan longfala bokis nomo. Tok ya i pulum tingting blong mi, ale mi wantem faenem moa save long saed ya.

Jenesis i soemaot se God i mekemap tingting blong hem blong finisim ol rabis fasin long wol ya. Bambae hem i mekem ren i foldaon gogo wota i kavremap wol. Hem i talem long Noa blong wokem wan sip blong sevem laef blong hem, famle blong hem, mo ol defren kaen anamol. Longfala blong sip ya bambae i 134 meta, bigfala blong hem bambae i 22 meta, mo hae blong hem bambae i 13 meta. (Jenesis 6:15) Spes we i stap insaed long hem, hem i 40,000 kiubik meta.

Plan Blong Sip Blong Noa

Sip blong Noa i gat tri dek blong hem. Hemia i mekem sip ya i strong moa, mo i mekem se ol floa evriwan oli 8,900 skwea meta. Noa i wokem sip ya long strong timba we i blokemgud wota, maet wud ya saepras, mo i pentem insaed mo afsaed long kolta. (Jenesis 6:​14-16) Yumi no save olsem wanem Noa i fasem ol timba. Be Baebol i tokbaot ol man bifo long taem blong Noa, we oli wokem ol tul long aean mo bras. (Jenesis 4:22) Mo stat long taem bifo kasem tede, ol man oli yusum ol pis wud we oli sapenem olsem nil, blong holemtaet ol timba long sip.

Sip blong Noa i gat ol rum blong hem mo wan doa long saed blong hem. Hem i gat wan tsoʹhar we hae blong hem i wan kiubit. Maet hemia i minim ruf blong hem we i no flat, be i hae moa long medel i bitim long tufala saed blong sip, maet samting olsem haf meta antap. Tufala saed blong sip ya oli no blokem kasem antap, oli livim i open nomo antap blong letem win mo laet i kam insaed. Buk blong Jenesis i no talem se sip ya i gat kil blong hem, fored blong hem, ol sel, parel, mo stia blong hem. Yumi makem se Hibru tok we oli yusum blong talem sip ya i minim “ak” (NW ) mo oli yusum semfala tok ya blong talem basket we mama blong Moses i putum Moses long hem long Nael Reva.​—Eksodas 2:​3, 10.

Sip Ya i Gud Long Solwota

Longfala blong sip blong Noa i sikis taem moa long bigfala blong hem mo i ten taem moa long hae blong hem. Hemia i sem mak long plante sip tede, be long saed blong longfala mo bigfala blong ol sip tede, oli jenjenisim blong mekem i laenap wetem paoa we sip i nidim blong ron long solwota. Sip blong Noa i no ron, hem i flot nomo. ?Olsem wanem? ?Hem i flot gud?

Ol man oli save sipos wan sip i gud long solwota taem oli luk sip ya long win mo bigsi. Hemia tu i dipen long longfala mo bigfala blong hem. Baebol i talem se wota i ron bigwan long taem blong Noa, mo i talem tu se God i mekem wan win i blu. (Jenesis 7:​11, 12, 17-20; 8:1) Baebol i no talem se ol wef oli bigwan olsem wanem mo win i strong olsem wanem. Be ating win ya mo ol wef ya oli bigwan mo oli olbaot, olsem tede. Sipos win i blu strong blong longtaem, ol wef oli hae moa mo wan wef i longwe moa long narafala wef. Mo tu, sipos graon i bin seksek long taem blong Noa, ol wef oli mas gat moa paoa.

Bigfala mo hae blong sip blong Noa i stret long longfala blong hem. Hemia i mekem se win mo ol wef oli no save kapsaetem sip ya. Plan blong sip ya i stretgud, mekem se hem i save stap kwaet long bigsi we i stap saksakem fored mo as blong ol sip. Sipos fored blong sip ya i klaem long ol wef mo i foldaon bakegen wantaem nomo, ol man mo ol anamol insaed oli mas kasem kil mo harem nogud. Mo tu, sip we i no strong, ol wef olsem oli save brekem. Sipos sip i no strong, wef i save leftemap tufala en blong hem wantaem, ale sip bambae i ben long medel. Sipos wef i leftemap medel blong sip nomo, maet fored mo as blong hem i ben. God i talem long Noa blong mekem longfala blong sip i 10 taem moa long hae blong hem. Biaen, ol man blong wokem ol sip oli faenemaot se sip we longfala blong hem i 10 taem moa long hae blong hem, i no save brok long ol wef olsem.

Oli Stap Gud Mo Sef Insaed Long Sip Ya

From we sip blong Noa i olsem wan bigfala bokis nomo, evri haf blong sip ya i flot gud, stat long wan en blong hem go kasem narafala en. Hevi blong hem tu i stret, i no gat wan haf blong hem we i hevi moa. Ating Noa i putumgud ol kago long sip ya, hemia ol anamol mo ol kakae, blong i level gud. Olsem nao, kago i no hevi tumas long sam haf blong sip. Taswe i gat tu bigfala samting we i mekem se sip blong Noa wetem ol pasenja blong hem oli stap sef taem Bigfala Wota i kavremap wol​—hemia gudfala plan we Jeova i givim long Noa, mo han blong Jeova we i protektem olgeta. I klia se taem wota i godaon, God i meksua se sip ya i fas long wan ples we i sef mo we i save sidaon gud long hem.

Taem mi jekemgud ol save ya long saed blong sip blong Noa, mi luksave se ol tok blong Baebol i stretgud mo i laenap wetem save blong ol man blong wokem ol sip tede. I tru, buk blong Jenesis i no talem evri samting long saed blong sip ya mo Bigfala Wota we i ron. Mi glad tumas sipos mi gat janis blong toktok wetem Noa taem bambae hem i laef bakegen long wol. Long taem ya, bambae hem i stap wetem ol man mo anamol we oli laef i stap from we hem i bin wokhad longtaem blong bildim sip ya we i sevem laef blong olgeta. (Ol Wok 24:15; Hibrus 11:7) Fastaem, bambae mi talem tangkiu long hem mo famle blong hem. Biaen, bambae mi askem fulap kwestin long hem.​—Wan man i sanem stori ya i kam long Wekap!

[Bokis/Foto blong pija long pej 26]

WAN SMOL SIP OLSEM HEMIA BLONG NOA

Yu save yusum plan we i stap ya blong mekem wan smol sip olsem hemia blong Noa, mo yu save luk sipos hem i flot. (Blong mekem wan sip we i bigwan moa, yu mas mekem evri haf blong plan ya i kam bigwan moa, we bigfala mo hae blong hem i stret long longfala blong hem.) Tekem sam pepa mo ravem wetem gris blong kandel, samting ya i blong blokem wota. Nao benem pepa ya mo fasem ol kona blong hem wetem skoj no glu. Fasem sam smol ston no mane olbaot long botom blong sip ya insaed. Taem yu mekem i flot, wota i mas kam antap long saed blong hem kasem klosap stret haf blong hem.

Blong luk olsem wanem sip blong Noa i gud long solwota, mekem smol sip blong yu i flot long wan dram wota, we longfala blong sip i folem longfala blong dram. Nao tekem wan pis wud, holem i gokros long dram mo pusum i godaon mo i kam antap plante taem, blong mekem ol wef.

[Tok blong pija long pej 25]

Longfala blong “ak” ya blong Noa i 134 meta. Hemia stret haf blong longfala blong “Titanic”

[Credit Line]

Titanic plan: Courtesy Dr. Robert Hahn/www.titanic-plan.com; photo: Courtesy of The Mariners’ Museum, Newport News, VA

[Foto blong pija long pej 26]

Bigfala mo hae blong sip blong Noa i stret long longfala blong hem, olsem ol bigfala sip tede