Ol Yangfala Oli Askem . . .

?Wetaem Mi Save Gat Wan Boefren No Gelfren?

“!Long skul, yu mas gat boefren no gelfren, nomata wanem kaen boe no gel, be yu mas frenem wan. Sipos no, ol narafala oli luk yu se yu narakaen!”​—Brittany.

“Tingting ya se yu mas gat boefren i fulap tumas raonabaot long mi. Antap long hemia i gat fulap boe we oli naes tumas.”​—Whitney.

◼ Yu luk wan boe mo gel long skul tufala i stap holholem han blong tufala taem tufala i wokbaot sloslo i go long ol klasrum blong tufala. ?Yu harem olsem wanem?

□ Yu no harem wan samting

□ Yu jalus smol

□ Yu jalus bigwan

◼ !Yu stap long sinema wetem ol fren blong yu, nao yu luksave se olgeta evriwan oli stap wetem boefren no gelfren blong olgeta​—!yu nomo yu nogat! ?Yu harem olsem wanem?

□ Yu no harem wan samting

□ Yu jalus smol

□ Yu jalus bigwan

◼ I no longtaem, bes fren blong yu i stat blong soem sam saen se hem i laekem wan boe no gel mo naoia tufala i stap fren tugeta olsem boefren mo gelfren. ?Yu harem olsem wanem?

□ Yu no harem wan samting

□ Yu jalus smol

□ Yu jalus bigwan

SIPOS ansa blong yu long sam long ol kwestin ya antap i soemaot se yu “jalus smol” no yu “jalus bigwan,” i no yu nomo. Long ol kantri we hem i kastom blong gat boefren mo gelfren, plante yangfala maet oli givim ol semfala ansa. Yvette we i gat 14 yia blong hem i talem se: “Samtaem yu harem olsem yu stap mestem wan gudfala samting from ol narafala gel raonabaot oli gat ol boefren blong olgeta be yu yu no gat.”

Filing ya blong wantem stap wetem narafala we hem i spesel​—mo blong stap wetem wan we hem i ting se yu yu spesel—​i save kam strong tumas. Wan yangfala boe we i gat 16 yia i talem se: “!Filing ya blong wantem gat wan gelfren i stap kam moa strong evridei, mo i no isi nating blong faetem!” Sam oli stat blong gat boefren no gelfren taem oli yang tumas. Ol man blong Time magasin oli bin askem kwestin long sam yangfala mo oli faenemaot we 25 pesen blong ol yangfala we oli gat 13 yia, “oli gat boefren no gelfren” finis. ?Yu ting se oli rere? ?Yu yu rere blong gat wan boefren no gelfren? Blong ansarem hemia yumi nidim fastaem blong tingbaot wan narafala kwestin.

?I Minim Wanem “Blong Gat Boefren Mo Gelfren”?

◼ Yu stap goaot oltaem wetem semfala boe no semfala gel.

?Olsem wanem? ?Hemia boefren mo gelfren?

□ Yes □ No

◼ Tu no tri taem long wan dei, yu stap sanem sam mesej no toktok long telefon long semfala boe no gel.

?Olsem wanem? ?Hemia boefren mo gelfren?

□ Yes □ No

◼ Yu stap haedem fasin fren blong yu wetem wan boe no wan gel. Papa mama blong yu i no save. Yu no wantem talem long tufala from we yu save se bambae tufala i no glad.

?Olsem wanem? ?Hemia boefren mo gelfren?

□ Yes □ No

◼ Taem yu kampani wetem ol fren blong yu, oltaem yu stap wetem semfala boe no gel ya.

?Olsem wanem? ?Hemia boefren mo gelfren?

□ Yes □ No

Ating i isi long yu blong ansarem faswan kwestin be taem yu kam long ol narawan maet yu bin nidim blong tingting fastaem. ?I minim wanem blong gat wan boefren no gelfren? Long haf ya bambae yumi yusum tok ya boefren mo gelfren blong minim fasin we yu spenem taem blong spel no storian wetem semfala boe no gel from we yu intres long hem mo yu gat filing we yu laekem hem, mo hem tu i gat semfala intres mo filing long yu. Nating se yu stap long wan grup wetem ol narafala no yu stap long wan kwaet ples, nating se yu stap toktok tru long telefon no stret long hem, nating se fasin fren blong yu i stap long klia ples no yutufala i haedem, be sipos yu mo narafala ya we yu stap fren wetem i kasem save se yutufala i gat spesel filing ya we yutufala i laeklaekem yutufala, i min se yutufala i stap fren tugeta olsem boefren mo gelfren.

?Be olsem wanem? ?Yu yu rere blong gat boefren no gelfren? Bambae yumi tokbaot tri kwestin we oli save givhan long yu blong tekem wan desisen.

?From Wanem Yu Wantem Gat Boefren No Gelfren?

Long plante kalja i gat tingting ya se i stret sipos wan boe mo gel tufala i fren blong tufala i save gud tufala. Be fasin blong fren tugeta olsem boefren mo gelfren i blong kasem wan gudfala mak​—i blong halpem wan yangfala man mo woman blong luksave sipos tufala i stret long tufala, blong tufala i save mared. ?From wanem?

Baebol i yusum tok ya “yang taem” blong eksplenem wan taem long laef we ol filing blong seks mo filing blong laekem narafala i kam strong. (1 Korin 7:​36, NW ) Taem yu kampani oltaem wetem semfala boe no gel mo yu stap yet long “yang taem” blong yu, samting ya i save mekem ol filing blong seks oli kam moa strong, i olsem we yu laetem wan faea. Nao filing ya i save lidim yu blong lanem long wan rod we i had se tok long Galesia 6:7 i waes tumas. Vas ya i talem se: “Wanem sid we man i planem fastaem long garen blong hem, be frut blong hem nomo, man ya bambae i mas kakae.”

Ating i tru we sam yangfala raonabaot long yu oli stap frenem narafala nating se oli no gat tingting blong mared wetem hem. Maet oli tingbaot boefren no gelfren blong olgeta olsem wan praes no wan samting blong flasem olgeta nomo taem ol narafala i stap luk olgeta. Oli ting se samting ya i save givhan long olgeta blong tinghae long olgeta wan. I nogud blong pleplei wetem filing blong narafala olsem, mo yumi no sapraes we ol fasin fren olsem i blong sot taem nomo. Wan yangfala we nem blong hem Heather i talem se: “Plante yangfala i stap olsem boefren mo gelfren blong wan no tu wik nomo afta i finis. Oli lan blong tingbaot fasin fren olsem wan samting we i blong sot taem nomo​—long rod ya oli no stap rerem olgeta blong mared be oli stap rerem olgeta blong divos nomo.”

Samfala oli gat boefren mo gelfren olsem wan pleplei nomo, no oli jenjenisim boefren no gelfren blong olgeta oltaem, jes blong talem se oli gat wan boefren no gelfren. Be fasin olsem i save lidim yu isi nomo blong yu spolem filing blong narafala. Tingbaot eksampol ya blong Eric. Taem hem i gat 18 yia, hem i frengud wetem wan gel, mo hem i ting se tufala i gudfala fren nomo. Be, hem i faenemaot se long lukluk blong gel ya fasin fren blong tufala i minim wan samting. Eric i talem se: “!Man! Mi mi sapraes se kwiktaem nomo hem i ting se mitufala i boefren mo gelfren. !Mi mi ting se mi fren wetem hem nomo, olsem we mi mi mekem wetem ol narafala fren blong mi!”

I stret nomo blong joen wetem ol narafala boe mo gel taem yumi stap kampani long wan grup we i gat bigman blong lukaot long hem. Be taem yumi stap tingbaot blong fren olsem boefren mo gelfren, i waes we yumi wet gogo yumi pastru long yang taem blong yumi, nao yumi rere blong tingbaot mared. Hemia wanem we Chelsea i lanem. Hem i talem se: “Samtaem mi ting se i oraet blong fren olsem boefren mo gelfren jes blong gat gudtaem. Be, i no gudtaem sipos wan i stap pleplei nomo be narafala i gat filing.”

?Yu Yu Gat Hamas Yia?

◼ ?Yu ting se wan yangfala i mas gat hamas yia bifo we i stret blong hem i gat wan boefren no gelfren? ․․․․․

◼ Naoia askem semfala kwestin ya long papa mama, mo raetemdaon ansa blong tufala. ․․․․․

Ating faswan namba we yu yu raetemdaon, i smol moa long seken wan. !No maet i no olsem! Maet yu wan yangfala we i gat waes fasin blong letem taem i pas fastaem, blong yu savegud yu wan. Wan yangfala Kristin we nem blong hem Sondra i jus blong wet fastaem, nating se hem i bitim yia finis we loa i talem se yangfala i mas gat blong i naf blong mared. Hem i talem se: “Taem yu stap fren wetem wan boe no gel, yu wantem we hem i save yu. ?Be sipos yu no save yu wan fastaem, olsem wanem bambae narafala i kasem save long yu?”

Danielle, we i gat 17 yia blong hem, i gat sem tingting. Hem i talem se: “Taem mi tingtingbak long tu yia we i pas, mi luk se ol fasin we mi bin ting se i impoten blong wan hasban i gat, naoia oli defren olgeta. Blong talem stret, naoia tu mi no trastem mi wan blong tekem disisen ya. Bambae mi tingbaot blong gat boefren taem mi harem se mi savegud mi wan.”

?Yu Yu Rere Blong Mared?

Fasin ya blong fren tugeta olsem boefren mo gelfren i blong givhan long yumi blong mared. From samting ya i gud we yu tingbaot sipos yu rere blong mekem wok we wan hasban no wan waef i mas mekem​—antap long hemia wok blong wan papa no mama. ?Olsem wanem yumi save sipos yumi rere blong mekem samting ya? Tingting gud long ol haf we oli kam biaen.

◼ Fasin Fren Blong Yu Wetem Narafala ?Yu stap soemaot wanem kaen fasin long papa mama blong yu mo ol brata sista blong yu? ?Plante taem yu stap kros kwik? ?Taem yu talemaot tingting blong yu, yu stap tok strong long olgeta no yu yusum sam kaen toktok blong spolem olgeta? ?Bambae oli talem wanem long saed blong yu long ol kwestin ya? Ol fasin we yu mekem long famle blong yu i soemaot ol fasin we bambae yu mekem tu long hasban no waef blong yu.​—Efesas 4:​31, 32.

◼ Mane ?Olsem wanem? ?Yu stap lukaotgud long mane blong yu, no oltaem yu gat kaon? ?Yu save holem wan wok? ?Sipos no, from wanem? ?Hem i from we wok ya i no stret long yu, no hem i from bos blong yu, no i from we yu gat sam slak fasin we oli no gud tumas? ?Sipos yu no save lukaotgud long mane blong yu naoia, olsem wanem bambae yu lukaot long wan famle?​—1 Timoti 5:8.

◼ Long Saed Blong Spirit ?Sipos yu yu wan Witnes blong Jeova, wanem ol gudfala fasin blong yu long saed blong spirit? ?Yu yu wantem ridim Tok blong God, joen long wok blong prij mo ansa long ol miting, no yu nidim narafala blong pulum yu? ?Sipos yu no stap lukaotgud long yu wan long saed blong spirit, olsem wanem bambae yu leftemap tingting blong hasban no waef blong yu blong mekem olsem?​—2 Korin 13:5.

Sipos yu stap tingting blong fren wetem wan boe no gel blong biaen yu mared, hemia sam nomo long ol samting we yu nidim blong tingbaot. Go kasem taem ya we yu rere blong mared, yu save kampani wetem ol boe no gel taem yu joen tugeta long wan grup. Ale, biaen, sipos yu jus blong gat wan boefren no gelfren be bambae yu yu save gud yu wan finis mo bambae yu save wanem we yu nidim long wan fren we bambae yu spenem ful laef blong yu wetem.

SAM SAMTING BLONG TINGBAOT

◼ ?Long wanem ples mo taem i stret blong yu kampani wetem ol narafala boe no gel?

◼ ?Wanem wan fasin blong yu we yu mas traehad blong kam gud moa long hem blong yu save kam wan gudfala hasban no waef?

[Bokis/Foto blong pija long pej 28]

Toktok Blong Sam Nara Yangfala

“Samtaem mi harem se mi jalus long olgeta we oli gat boefren no gelfren​—samtaem mi jalus tu long olgeta we oli mared finis. Be yumi no mas gat boefren no gelfren jes blong gat gudtaem. Sipos yu mekem olsem, yu stap pleplei wetem filing blong narafala. Mi ting se fasin ya blong fren olsem boefren mo gelfren i blong givhan long yu blong luksave sipos hemia nao wan we yu yu rili wantem mared wetem.”​—Blaine, 17.

“Mi no ting se i stret blong gat boefren jes from we yu ting se fasin ya i stap “trenem” yu blong save olsem wanem bambae yu mekem taem yu faenem boe ya we yu rili laekem. Bambae fasin ya i lidim yu blong spolem filing blong narafala.”​—Chelsea, 17.

“Bifo yu stat blong gat boefren no gelfren, mi rili ting se yu mas gat naf yia blong mared. Sipos no, i olsem we yu go luk wan masta blong askem wok long hem long wik, be yu stap skul yet. Yu westem taem nomo blong toktok wetem masta ya from we yu save se bambae yu no save mekem wok ya.”​—Sondra, 21.

[Bokis blong pija long pej 30]

ADVAES I GO LONG OL PAPA MAMA

Sipos tingting ya blong gat boefren no gelfren i no kasem pikinini blong yu yet bambae i mas kasem hem samtaem. Phillip i talem se: “!Mi mi no mekem wan samting nating! Be ol gel oli kam askem mi blong fren wetem olgeta. Mi stap stanap nomo mo mi stap tingting se, ‘?Ei, mbae mi mekem wanem nao?’ !I had blong talem no long olgeta from sam long olgeta oli naes tumas!”

Beswan samting we yufala ol papa mama i save mekem hemia blong storian wetem pikinini blong yufala long saed blong fasin ya blong gat boefren no gelfren. ?Olsem wanem? ?Yu ting se yu save yusum haf ya we i tokbaot boefren mo gelfren olsem stamba blong storian blong yu? Traem kasem save olsem wanem boe no gel blong yu i stap tingbaot ol traem ya we hem i fesem long skul mo maet insaed long Kristin kongregesen tu. Maet yu no nid blong putum wan stret taem blong storian wetem hem long ol samting olsem. Samtaem maet janis blong tokbaot samting ya i save kamaot taem “yufala i stap long haos, no yufala i stap wokbaot” long rod. (Dutronome 6:​6, 7) Nomata wanem taem no ples we yu stap long hem, yu no mas foget blong stap “rere oltaem blong lesin,” mo yu “no mas hareap blong toktok.”​—Jemes 1:19.

Sipos boe no gel blong yu i soemaot we hem i gat intres long wan narafala boe no gel yu no mas hareap blong wari. Wan yangfala gel i talem se: “!Papa blong mi i kros tumas taem hem i faenemaot we mi gat wan boefren! Hem i traehad blong mekem mi mi fraet. Hem i askem fulap kwestin long mi blong traem pulum mi blong tingbaot sipos mi rere blong mared​—!be taem yu yang, samting ya i save pusum yu blong wantem fren longtaem moa wetem boe ya jes blong traem pruvum se papa mama i rong!”

Wan samting we i nogud tumas i save kamaot sipos pikinini blong yu i ting se hem i no save toktok nating wetem yu long saed blong ol boefren no gelfren. Wan gel i talem se: “Taem papa mama i kwik blong kam kros mo faerap, samting ya i pulum ol pikinini blong wantem haedem fasin fren blong olgeta moa. Bambae oli no stop. Be bambae oli kam moa gud long fasin blong haedem.”

Bambae pikinini blong yu i faenem i moa isi blong toktok wetem yu sipos yufala evriwan i save talemaot long klia ples tingting mo filing blong yufala. Wan yangfala woman we i gat 20 yia blong hem i talem se: “Oltaem papa mama blong mi oli tok stret nomo long saed blong fasin blong fren wetem boe. Tufala i ting se i impoten blong tufala i save hu ya boe we mi mi intres long hem. !Mo mi ting se i gud tumas we tufala i wantem save olsem! Papa blong mi i go storian wetem boe ya. Sipos papa mama i no sua long hem from wan samting, tufala i talemaot wari blong tufala long mi. Plante taem, mi tekem desisen se mi no intres long wan boe bifo we hem i kam boefren blong mi.”

[Foto blong pija long pej 29]

Yumi save harem gud tumas taem yumi joen wetem ol narafala boe no gel long wan taem mo ples we i stret