Baebol i Talem Wanem

?Hu Ya Setan? ?Hem i Rili Stap?

SAM man blong stadi oli talem se Setan i no wan trufala man. Ol man nomo oli mekemap stori ya se Setan i wan man. Hemia i no wan niufala samting. Charles-Pierre Baudelaire, we i wan man blong raetem ol naesfala toktok long ol yia 1800, i talem se, “Devel Setan i traem blong trikim yumi blong yumi ting se hem i no stap.”

?Setan i wan trufala man? ?Sipos yes, hem i kam long weples? ?Hem nao i stap biaen long ol trabol we oli stap spolem wol long yumi? ?Olsem wanem yu save blokem rabis paoa blong hem?

?Baebol i Talem Wanem?

Baebol i tokbaot Setan se hem i wan trufala man we i stap long ples blong ol spirit man. (Job 1:6) Baebol i talem long yumi se ol fasin mo ol wok blong Setan oli nogud olgeta mo oli rabis. (Job 1:13-19; 2:7, 8; 2 Timoti 2:26) Mo tu, Baebol i tokbaot sam storian we Setan i gat wetem God mo wetem Jisas.—Job 1:7-12; Matiu 4:1-11.

?Rabis man ya Setan i kam long weples? Longtaem bifo we God i wokem man long wol ya, God i wokem “fasbon” Pikinini blong hem we biaen ol man oli save long hem se Jisas. (Kolosi 1:15, NW ) Smoltaem biaen, God i wokem ol narafala ‘pikinini blong hem’ tu we hemia ol enjel. (Job 38:4-7) Olgeta evriwan oli no gat sin, oli stretgud olgeta. Be, biaen wan long ol enjel ya i kam Setan.

Setan i no nem ya we God i givim long hem taem Hem i wokem hem. Nogat. Setan i wan nem we long Grik lanwis i minim “Enemi; Man we i agensem narafala.” Hem i karem nem ya Setan from we hem i jusum wan fasin blong laef we God i no glad long hem.

Filing blong flas mo blong agens i stap gru insaed long spirit man ya. Hem i wantem se ol narafala oli wosipim hem. Taem Jisas we i fasbon Pikinini blong God, i stap long wol, Setan i traem pulum Jisas blong i “mekem wosip” long hem tu.—Matiu 4:9.

Setan i neva “stap wetem olgeta we oli tok tru.” (Jon 8:44) Hem i talem se God i wan man blong giaman mo bakegen hem i talem long Iv se Iv i save kam olsem God. Be defren olgeta, Setan nao i man blong giaman mo hem nao i wantem kam olsem God. Ale, hem i kasem samting we hem wan i wantem tru long ol rod blong hem blong trikim man. Hem i mekem Iv i luk hem olsem we hem i hae moa long Jeova God. From we Iv i obei long Setan, i olsem we Iv i agri se Setan i god blong hem.—Jenesis 3:1-7.

Taem enjel ya we fastaem i wan gudfala enjel i rebel, hem i mekem hem wan i kam Setan, wan enemi blong God mo blong ol man. Long olfala hanraet, nem ya “Devel” i minim “Man we i giaman blong spolem nem blong narafala.” Nem ya i stret long rabis man ya Setan. Man ya we i lidim man blong mekem sin i pulum ol narafala enjel tu blong oli no moa obei long God mo oli joen wetem hem blong rebel agensem God. (Jenesis 6:1, 2; 1 Pita 3:19, 20) Ol enjel ya oli no mekem laef blong ol man i kam gud. Nogat. From we ol enjel ya oli folem rod blong Setan blong tingbaot hem wan nomo, ‘olbaot long evri ples, ol man oli stap faet mo oli stap kilim man i ded.’—Jenesis 6:11; Matiu 12:24.

?Olsem Wanem Setan i Gat Bigfala Paoa Long Man?

Wan rabis man i ravemaot mak blong fingga blong hem afta we hem i kilim wan man i ded blong mekem se ol polis oli no save faenem hem. Be, taem ol polis oli kam long ples we trabol i kamaot, oli save se i mas gat wan man we i mekem trabol ya from we trabol i no save hapen olsem nomo. Setan we i stamba blong fasin ya blong “kilim man,” i traem blong no lego eni mak long saed blong hem. (Jon 8:44; Hibrus 2:14) Taem hem i stap toktok wetem Iv, Setan i haed biaen long wan snek blong Iv i no save luksave hem. Tede, Setan i gohed blong mekem olsem. Hem “i satem tingting” blong ol man we oli no gat bilif blong oli no luksave se hem i stap holem plante man oli stap aninit long bigfala paoa blong hem.—2 Korin 4:4.

Be, Jisas i tokbaot Setan olsem wan man blong kilim man we i stap biaen long ol rabis fasin we oli stap hapen long wol we yumi stap long hem. Jisas i singaot hem se “masta blong wol ya.” (Jon 12:31; 16:11) Aposol Jon i raetem se, “olgeta man blong wol ya oli stap long paoa blong Setan.” (1 Jon 5:19) Setan i stap yusum fasin ya we “oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat” blong “giaman long olgeta man long wol, i lidim olgeta oli go krangke.” (1 Jon 2:16; Revelesen 12:9) Hem i man ya we bighaf blong ol man oli stap obei long hem.

Olsem Iv, olgeta we oli obei long Setan, oli mekem hem i kam god blong olgeta. Taswe, Setan i “rabis god blong wol ya.” (2 Korin 4:4) Ol nogud frut we oli kamaot from rul blong hem, hemia fasin tu fes mo fasin blong giaman; faet, kilim mo spolem man mo ol samting raonabaot; fasin blong brekem loa, griri fasin mo kruked fasin.

?Olsem Wanem Blong Blokem Paoa Blong Hem?

Baebol i givim woning ya se: “Yufala i mas lukaot gud. Yufala i mas rere.” ?From wanem? From “we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” (1 Pita 5:8) Vas ya i mekem yumi tingbaot se i gat denja. I gud blong save se olgeta we oli no lukaot gud mo oli no rere, olgeta ya nao we Setan bambae i “winim” olgeta.—2 Korin 2:11.

I impoten we yumi bilif se Setan i rili stap mo yumi letem God i ‘mekem yumi stret gud’ mo ‘yumi strong.’ Long rod ya, bambae yumi ‘stanap strong blong blokem [Setan]’ mo yumi stap long saed blong God.—1 Pita 5:9, 10.

?YU YU BIN TINGBAOT?

◼ ?Setan i kam long weples?—Job 38:4-7; Jon 8:44.

◼ ?Olsem wanem Setan i gat paoa long wol?—Jon 12:31; 1 Jon 5:19; Revelesen 12:9.

◼ ?Yumi save mekem wanem blong blokem ol rabis trik blong Setan blong oli no spolem yumi?—1 Pita 5:8-10.

[Tok blong pija long pej 14]

?Setan i paoa ya we i stap biaen long ol trabol we oli stap spolem wol blong yumi?