Ol Yangfala Oli Askem . . .
?Bambae Boe Ya i Wan Gudfala Hasban Blong Mi?
Tekem smol taem blong ansarem ol kwestin ya:
?Long tingting blong yu naoia, sipos yu wantem mared long wan man, i impoten we hem i gat wanem kaen fasin? Long lis ya, putum wan ✔ long saed blong fo fasin we yu ting se oli impoten tumas.
․․․․ naes bodi mo fes
․․․․ kaen long narafala
․․․․ gat plante fren
․․․․ hem i tok plei oltaem
․․․․ strong blong stadi Baebol mo folem ol advaes blong hem
․․․․ yu save trastem hem
․․․․ klin fasin blong laef
․․․․ hem i traehad blong kasem ol mak
?Taem yu yu yangfala nomo, yu bin laekem tumas wan boe? Long lis ya antap, putum wan X long saed blong fasin ya we i bin pulum yu blong laekem boe ya.
LONG ol fasin we i stap antap ya, olgeta evriwan oli stret. Ol fasin ya wanwan i save pulum yumi. ?Be, maet yu agri se taem yu yangfala nomo mo yu laekem tumas wan boe, plante taem yu tingbaot ol fasin long lef saed blong lis ya nomo?a Be ol fasin ya, oli no rili impoten tumas.
Taem yu stap kam bigman long tingting blong yu, bambae yu stat blong yusum fasin luksave blong skelem ol fasin we oli moa impoten, olsem ol fasin we oli stap long raet saed blong lis ya. Nao bambae yu stat blong kasem save se, nating se boe ya we yu laekem i gat plante moa fren bitim ol narafala yangfala long klas blong yu, be hem i no folem ol klin fasin blong laef. No sipos yu wan boe maet bambae i kam klia long yu se nating we gel ya we yu laekem i naes moa bitim ol narafala gel long ples blong yu, be yu no save trastem hem. Sipos yu “pastru long yangtaem” blong yu finis—hemia taem we ol filing blong seks oli stat blong kam strong—ating bambae yu no tingting tumas long ol fasin we oli no rili impoten. Be, bambae yu tingting moa dip blong faenemaot sipos boe ya bambae i kam wan gudfala hasban blong yu.—1 Korin 7:36, NW.
?Bambae Enikaen Boe Nomo i Oraet?
Long ol yia blong yangtaem blong yu, bambae i gat plante boe we yu laekem olgeta. Be yu no save jusum enikaen boe nomo. Yu mas tingbaot se, yu wantem wan fren blong ful laef blong yu, wan we bambae i givhan long yu blong kam gud moa long ol fasin mo wok blong yu, mo yu tu bambae yu givhan long hem long sem fasin. (Matiu 19:4-6) ?Hu ya man ya? Bifo we yu save ansarem kwestin ya, yu nidim blong ‘lukluk long glas’ mo skelem yu wan.—Jemes 1:23-25.
Blong kasem save moa long yu wan, ansarem ol kwestin ya:
?Wanem ol gudfala fasin blong mi?
․․․․․
?Wanem ol slak fasin blong mi?
․․․․․
?Wanem ol nid blong mi long saed blong filing mo spirit?
․․․․․
I no isi blong kasem save long yu wan, be ol kwestin olsem oli save givhan long yu blong stat blong save yu wan.b Moa we yu kasem save long yu wan, moa we bambae yu naf blong faenem wan man we bambae i givhan blong mekem ol gudfala fasin blong yu oli kam antap moa, bitim we hem i mekem ol slak fasin blong yu i kam antap moa. ?Be, olsem wanem sipos yu ting se yu faenem finis wan boe we i stret long yu?
?Bambae Mitufala i Stapgud Blong Olwe?
Blong ansarem kwestin ya, luklukgud long boe ya we yu laekem. !Be, lukaot! Maet yu stap lukluk long ol samting we yu yu wantem lukluk nomo. From samting ya, yu mas tekem taem. Traehad blong luksave se fren blong yu i rili olsem wanem.
Plante boe mo gel we oli fren tugeta, oli no tingbaot ol impoten samting. Oli kwik blong lukluk ol samting we tufala tugeta i laekem no ol fasin blong tufala we i sem mak. Maet oli talem se: ‘Mitufala i laekem sem kaen miusik.’ ‘Mitufala i laekem blong mekem ol semfala samting.’ ‘!Mitufala i gat sem tingting long evri samting!’ Be, olsem yumi tokbaot finis, sipos yu rili pastru long yangtaem blong yu finis, bambae yu lukaot ol fasin we oli moa impoten. Yu mas traem luksave “ol fasin we oli stap haed long hat” blong boefren blong yu.—1 Pita 3:4, NW; Efesas 3:16, NW.
Olsem nao, traem makem wanem samting i hapen taem yutufala i no agri, i bitim we yu stap tingbaot nomo se yutufala i gat sem tingting long evri samting. I min se: ?Boefren blong yu i mekem wanem taem yutufala i no gat sem tingting long wan samting? ?Hem i fosem yu blong folem tingting blong hem? ?Hem i kam “kros” no i “tok agens” long yu? (Galesia 5:19, 20; Kolosi 3:8) ?No hem i soemaot se hem i wan man we i no stap mekem i strong tumas long narafala? ?Sipos yu no brekem wan loa blong God, hem i rere blong jenisim tingting blong hem blong holem pis wetem yu?—Jemes 3:17.
Wan narafala samting we yu mas tingbaot se: ?Boe ya i pulum yu oltaem blong mekem samting we hem nomo i wantem? ?Hem i mas bos long evri samting we yu mekem? ?Hem i jalus? ?Hem i mas save evri samting we yu yu mekem? Wan yangfala woman, nem blong hem Nicole, i talem se: “Fasin ya we man i jalus mo i mas bos long evri samting we yu mekem i olsem wan woning se man ya i gat wan problem. Mi harem stori blong sam boe mo gel we oli faet from we wan long tufala i kros long narawan we i no ring i kam oltaem blong talem weples hem i stap long hem. Mi ting se samting ya i olsem wan saen we i mas givim woning.”
?Ol narafala oli gat wanem tingting long saed blong boefren blong yu? I gud blong storian wetem samfala we oli save boefren blong yu longtaem finis. Maet yu save storian wetem sam brata sista long kongregesen blong hem we oli bigman finis long saed blong spirit. Oli save givhan long yu blong save sipos hem i wan “gudfala man.”—Ol Wok 16:1, 2.c
?I Moa Gud Yutufala i No Moa Fren?
?Olsem wanem sipos yu luksave se boefren blong yu bambae i no wan gudfala hasban? Sipos i olsem, i waes we yutufala i no moa fren. Baebol i talem se: “Man we i gat gudfala tingting i save luksave we trabol i stap kam, nao i save ronwe long hem.”—Ol Proveb 22:3.d
Afta we sam taem i pas, maet yu stat blong fren wetem wan narafala boe. Sipos yes, bambae yu gat wan tingting we i klia moa long saed ya, from we yu lanem plante samting finis. Maet long taem ya nao bambae yu save talem yes long kwestin ya se: “?Bambae man ya i wan gudfala hasban blong mi?”
[Ol futnot]
a Long ol haf ya yumi tokbaot gel we i skelem boe, be semfala advaes i stret long boe we i skelem gel.
b Blong faenem sam moa kwestin blong askem long yu wan, lukluk long Wekap! Jenuware-Maj 2007, pej 30.
c Lukluk tu long ol kwestin we oli stap long bokis long pej 19-20.
d Blong faenem moa save long saed blong finisim wan fasin fren, lukluk Wekap! blong Oktoba-Disemba, 2001, pej 20-22.
SAM SAMTING BLONG TINGBAOT
◼ ?Wanem ol gudfala fasin blong yu we bambae oli givhan long mared blong yu?
◼ ?Wanem sam fasin we yu wantem se man we bambae yu mared long hem i mas gat?
◼ ?Yu save mekem wanem blong kasem save moa long tingting mo fasin blong boefren blong yu mo long tingting we ol narafala oli gat long saed blong hem?
[Bokis blong pija long pej 21]
?Bambae boe ya i wan gudfala hasban?
OL STAMBA SAMTING
▪ ?Olsem wanem long fasin blong hem taem hem i gat paoa antap long narafala?—Matiu 20:25, 26.
▪ ?Wanem ol mak we hem i wantem kasem?—1 Timoti 4:15.
▪ ?Hem i stap traehad naoia blong kasem ol mak ya?—1 Korin 9:26, 27.
▪ ?Ol fren blong hem oli hu?—Ol Proveb 13:20.
▪ ?Hem i gat wanem tingting long saed blong mane?—Hibrus 13:5, 6.
▪ ?Hem i laekem wanem kaen pleplei?—Ol Sam 97:10.
▪ ?Ol klos we hem i werem oli soemaot wanem long saed blong hem?—2 Korin 6:3.
▪ ?Olsem wanem hem i stap soemaot se hem i lavem Jeova?—1 Jon 5:3.
SAM MOA GUDFALA FASIN
▪ ?Hem i wokhad?—Ol Proveb 6:9-11.
▪ ?Hem i yusumgud mane blong hem?—Luk 14:28.
▪ ?Ol man raonabaot long hem oli talem se hem i wan gudfala man?—Ol Wok 16:1, 2.
▪ ?Hem i ona long papa mama blong hem?—Eksodas 20:12.
▪ ?Hem i stap tingbaot narafala?—Filipae 2:4.
OL WONING
▪ ?Hem i save kros kwik?—Ol Proveb 22:24.
▪ ?Hem i traem blong pulum yu blong mekem i nogud long saed blong seks?—Galesia 5:19.
▪ ?Hem i man blong faet no i stap tok nogud long narafala?—Efesas 4:31.
▪ ?Hem i mas dring bia no waen blong i save haremgud mo glad?—Ol Proveb 20:1.
▪ ?Hem i jalus mo i tingbaot hem wan nomo?—1 Korin 13:4, 5.
[Bokis blong pija long pej 22]
?Bambae gel ya i wan gudfala waef?
OL STAMBA SAMTING
▪ ?Olsem wanem hem i soemaot fasin obei insaed long famle blong hem mo kongregesen?—Efesas 5:21, 22.
▪ ?Ol klos we hem i werem oli soemaot wanem long saed blong hem?—1 Pita 3:3, 4.
▪ ?Ol fren blong hem oli hu?—Ol Proveb 13:20.
▪ ?Hem i gat wanem tingting long saed blong mane?—1 Jon 2:15-17.
▪ ?Wanem ol mak we hem i wantem kasem?—1 Timoti 4:15.
▪ ?Hem i stap traehad naoia blong kasem ol mak ya?—1 Korin 9:26, 27.
▪ ?Hem i laekem wanem kaen pleplei?—Ol Sam 97:10.
▪ ?Olsem wanem hem i stap soemaot se hem i lavem Jeova?—1 Jon 5:3.
SAM MOA GUDFALA FASIN
▪ ?Hem i wokhad?—Ol Proveb 31:17, 19, 21, 22, 27.
▪ ?Hem i yusumgud mane blong hem?—Ol Proveb 31:16, 18.
▪ ?Ol man raonabaot long hem oli talem se hem i wan gudfala woman?—Rut 4:11.
▪ ?Hem i ona long papa mama blong hem?—Eksodas 20:12.
▪ ?Hem i stap tingbaot narafala?—Ol Proveb 31:20.
OL WONING
▪ ?Hem i raorao oltaem?—Ol Proveb 21:19.
▪ ?Hem i traem blong pulum yu blong mekem i nogud long saed blong seks?—Galesia 5:19.
▪ ?Hem i woman blong faet no i stap tok nogud long narafala?—Efesas 4:31.
▪ ?Hem i mas dring bia no waen blong i save haremgud mo glad?—Ol Proveb 20:1.
▪ ?Hem i jalus mo i tingbaot hem wan nomo?—1 Korin 13:4, 5.