Hem i Lego Fasin Ya Blong Dring Bitim Mak

Smol waen i save mekem se kakae i tes gud mo i save mekem man i glad long taem blong wan lafet. Be, sam man oli dring bitim mak nao oli kasem plante trabol. Ridim stori ya we i kam biaen long saed blong wan man we hem i naf blong winim fasin ya blong dring bitim mak.

NAOIA yet, mi stap harem nogud taem mi tingbaot ol trabol we oli bin hapen long haos blong mifala bifo. Papa mo mama blong mi tufala i dring. Nao papa i faetem mama. Plante taem, hem i mi nao we papa i slavem mi. Mi mi gat fo yia nomo taem papa mo mama i tekem desisen blong no moa stap wanples. Mi rimemba taem ya we oli tekem mi mi go stap long haos blong bubu woman blong mi.

Mi harem olsem we i no gat wan man i laekem mi. Taem mi gat 7 yia, mi stap go kwaet nomo long rum we i stap aninit long graon blong dring waen we bubu i mekem. Waen ya i mekem se mi no moa harem nogud tumas. Taem mi gat 12 yia, mama mo bubu blong mi tufala i rao bigwan long saed blong mi. Mama i kros tumas nao i stonem mi wetem wan tul we i olsem wan bigfala fok. !Mi jyam i go long saed nao tul ya i no kasem mi! Hemia i no faswan taem we laef blong mi i stap long denja. Ol mak blong ol kil long bodi blong mi oli no bigwan tumas taem mi skelem wetem tingting blong mi we i trabol bigwan.

Taem mi gat 14 yia, mi stap dring oltaem. Biaen, taem mi gat seventin yia, mi ronwe long haos. Taem mi dring, mi harem se mi bos long mi wan. Dring i mekem se mi wantem faet, mo mi mekem trabol long ol ba. Dring nomo i mekem mi mi haremgud long laef. Long wan dei nomo, mi save dring kasem 5 lita blong waen, sam tin bia mo sam strong dring tu.

Taem mi mared, fasin blong mi blong dring i mekem plante trabol long waef blong mi. Taem mi kam kros mo fasin agens i kam strong moa long mi, mi faetem waef blong mi mo ol pikinini blong mitufala. Mi mekem semfala fasin bakegen olsem hemia we i hapen long famle blong mi taem mi mi pikinini yet. Klosap olgeta mane we mi kasem mi spenem long dring nomo. Mifala i no gat tebol no jea no sam narafala samting blong putum long haos, taswe mi mo waef blong mi, mitufala i slip long floa nomo. Laef blong mi i no gat mining mo mi no traehad nating blong mekem laef blong mi i gud.

Wan dei, mi toktok wetem wan Witnes blong Jeova. Mi askem long hem se from wanem i gat tumas fasin safa. Witnes ya i soemaot long mi ol promes blong God long Baebol long saed blong wan wol we bambae i no moa gat ol trabol. Samting ya i pulum tingting blong mi, nao mi stat blong stadi Baebol wetem ol Witnes blong Jeova. Taem mi mekem ol tijing blong Baebol oli wok long laef blong mi mo mi no moa dring tumas, laef blong famle blong mi i kamgud bigwan. Nating se i olsem, mi luksave se sipos mi wantem blong mekem wok blong Jeova God long fasin we Hem i wantem, mi mas lego dring fulwan. Afta we mi traehad blong tri manis, mi lego dring. Sikis manis biaen, mi givim laef blong mi i go long God mo mi tekem baptaes.

Taem mi lego fasin ya blong dring bitim mak, mi naf blong pem ol kaon blong mi. Afta, mi pem wan haos, mo wan trak tu we mifala i save yusum blong go long ol miting mo long wok blong prij. Naoia, mi no moa daonem mi wan be mi gat gud tingting long saed blong mi wan.

Samtaem long ol lafet, oli wantem givim dring long mi. Plante oli no save bigfala traehad we mi stap mekem oltaem blong stap longwe long dring mo se jes wan glas nomo i save mekem mi mi foldaon long fasin blong mi blong bifo. Filing ya blong wantem dring i stap yet long mi. Mi mas prea plante mo mi mas gat strong tingting blong talem ‘no’ taem wan man i wantem givim dring long mi. Taem mi mi tosta, mi dring plante wota no sam nara dring we i no gat alkol insaed long olgeta. Ten yia nao we mi no moa dring ol dring we i gat alkol insaed long hem.

Jeova i save mekem wanem we man i no naf blong mekem. Hem i halpem mi blong mi kam fri long fasin ya blong dring. !Hemia wan samting we mi bin ting se neva bambae mi save lego! Mi stap harem nogud yet from ol samting we oli bin hapen long laef blong mi taem mi yangfala, mo mi mas gohed oltaem blong faet strong blong winim tingting we i foldaon. Be nating se i olsem, mi glad tumas from gudfala fasin fren we mi gat wetem God, ol trufala fren insaed long kongregesen, mo famle blong mi we olgeta tu oli gat sem bilif olsem mi. Waef mo ol pikinini blong mi oli halpem mi bigwan blong mi stap longwe long dring. Waef blong mi i talem se: “Bifo laef blong mi i nogud olgeta. Tede, mi tangkiu bigwan long Jeova from we hem i mekem se mi save gat wan famle laef we i hapi wetem hasban mo tufala pikinini blong mi.”—Wan man i sanem stori ya i kam.

[Tok blong makem pija long pej 23]

Taem mi gat 14 yia, mi stap dring oltaem

[Tok blong makem pija long pej 24]

Jeova i save mekem wanem we man i no naf blong mekem

[Bokis/Foto blong pija long pej 24]

BAEBOL MO STRONG DRING

◼ Baebol i no agensem dring. Baebol i tokbaot waen olsem wan presen we God i givim, mo i talem se ‘waen i save mekem man i glad.’ (Ol Sam 104:14, 15) Baebol i yusum grep tu olsem wan pijatok we i minim se man i gat wan gudfala laef mo i harem sef. (Maeka 4:4) I tru ya, faswan merikel we Jisas i mekem hemia long wan lafet blong mared, hem i mekem wota i kam waen. (Jon 2:7-9) Mo taem aposol Pol i harem se Timoti ‘i stap sik oltaem,’ hem i talem long Timoti blong i dring “smol waen.”—1 Timoti 5:23.

◼ Samting we Baebol i agensem hemia fasin blong dring bitim mak:

“Man we i stap dring we i lusum hed . . . neva bambae hem i save kasem kingdom blong God.”—1 Korin 6:9-11, “The Jerusalem Bible.”

“Yufala i no dring waen, gogo yufala i lusum hed. Samting ya bambae i spolem yufala nomo.”—Efesas 5:18.

“?Hu i gat trabol? ?Hu i no save stap kwaet? ?Hu i stap rao? ?Hu i wari? ?Hu i kasem kil blong nating nomo? ?Hu i no save luklukgud? Hemia ol man ya we oli dring plante tumas waen, olgeta we oli kam blong lukaot waen we oli meksem. Nating we waen i red gud, mo i stap saen gud insaed long glas, mo taem yu dring, i stap godaon gud nomo long bel blong yu, be yu mas blokem fasin ya blong i no pulum tingting blong yu. Long en blong hem, hem i kakae olsem snek i kakae man, mo hem i wokem posen blong hem stret olsem posen snek i mekem. Ae blong yu bambae i luk ol samting we oli narakaen, mo hat blong yu bambae i talem ol samting we oli no stret.”—Ol Proveb 23:29-33, NW.

Olsem haf we i joen wetem bokis ya i soem, samfala we oli bin gat ol trabol olsem long saed blong dring oli mekem jus we i waes blong no tekem nating enikaen strong dring.—Matiu 5:29.