Baebol i Talem Wanem

?Yumi Mas Gat Wanem Tingting Long Saed Blong Mane?

BAEBOL i talem se: “Mane i save givhan blong mekem laef blong yu i gud.” (Prija 7:12) Yumi yusum mane blong pem kakae, klos, mo haos, mo tu mane i save givhan long yumi blong blokem ol hadtaem we i kamaot from fasin pua. Yes, yumi yusum mane blong pem ol samting we yumi nidim long saed blong bodi. Prija 10:19 i talem se: “Hem i save givim ansa long evri problem.”

Tok blong God, Baebol, i leftemap tingting blong yumi blong wok strong blong kasem samting we yumi mo famle blong yumi i nidim. (1 Timoti 5:8) I tru ya, sipos yumi wokhad, bambae yumi save harem gud, yumi gat respek long yumi wan, mo yumi harem se yumi sef.—Prija 3:12, 13.

Mo tu, ol hadwok blong yumi bambae i mekem se yumi naf blong givim presen long narafala wetem gladhat blong yumi. Jisas i talem se, “man we i stap givim presen i save harem gud moa i winim man we i stap kasem presen.” (Ol Wok 20:35) Yumi harem gud taem yumi yusum mane blong yumi blong givhan long olgeta we oli gat nid, speseli ol Kristin brata mo sista blong yumi, no taem yumi pem presen blong wan we yumi laekem tumas.—2 Korin 9:7; 1 Timoti 6:17-19.

Jisas i leftemap tingting blong ol disaepol blong hem se oli mas gohed blong givim presen long narafala wetem gladhat blong olgeta, be i no wetem sore. Hem i talem se: “Yufala i mas givim.” (Luk 6:38) Yumi mas folem semfala rul ya taem yumi givim presen mane blong sapotem wok blong Kingdom. (Ol Proveb 3:9) Yes, fasin blong yumi blong givim presen bambae i givhan long yumi blong fren gud moa wetem Jeova mo Pikinini blong hem, Jisas.—Luk 16:9.

Lukaot Gud Blong “No Laekem Mane Tumas”

Man we i stap tingbaot hem wan, hem i no givim presen wetem gladhat, be taem hem i givim presen hem i gat rong tingting biaen. Plante taem, problem blong olgeta ya, hemia se oli laekem mane tumas, ale oli ting se mane bambae i mekem oli glad, be samting ya i mekem oli harem nogud nomo. Fas Timoti 6:10 i talem se: “Fasin blong laekem mane tumas, hem i stamba blong olgeta fasin nogud. Mo i gat sam man we oli bin strong blong folem fasin ya, nao oli gowe finis long fasin blong bilif. Mo oli stap mekem ol samting we olgeta tu oli harem nogud tumas from.” ?From wanem fasin blong laekem mane tumas i save mekem yumi harem nogud mo i wan nogud samting?

Wan risen se, man we i stap laekem mane tumas neva hem i harem se mane ya i naf blong mekem hem i haremgud. Prija 5:10 i talem se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud.” Taswe fasin blong laekem mane tumas i spolem man. Mo tu fasin blong wantem mane tumas i mekem se oli no save joengud wetem narafala, famle blong olgeta i no hapi, mo i mekem oli no spel gud. “Man blong wok we i stap wok strong oltaem, maet hem i kakae we i fulap gud no i no fulap gud, be long naet, hem i save slip gud. Be rijman hem i no save slip gud, oltaem i stap wekap nomo, from we i stap tingting tumas long ol samting we hem i gat.” (Prija 5:12) Antap long ol samting ya, God i no laekem ol man we oli laekem mane tumas.—Job 31:24, 28.

Long Baebol i gat plante stori blong ol man we oli stil, oli gat raf fasin, oli slip olbaot, oli kilim man i ded, oli spolem narafala, mo oli giaman, from we oli laekem mane tumas. (Josua 7:1, 20-26; Maeka 3:11; Mak 14:10,11; Jon 12:6) Taem Jisas i mekem minista wok blong hem long wol ya, hem i singaot wan yangfala “rijman” blong biaen long hem. Sore tumas, man ya i mestem nambawan janis we hem i save gat from we i no wantem lego mane blong hem. Jisas i talem se, “!Man! Bambae i strong long ol rijman blong oli go insaed long niufala wol ya we God i king long hem.”—Luk 18:23, 24.

Ol Kristin oli mas lukaot gud from we long taem blong “las dei,” ol man bambae oli “laekem mane tumas.” (2 Timoti 3:1, 2, NW ) Ol Kristin we oli luksave se oli nidim ol samting long saed blong spirit, oli no letem fasin griri i tekemaot ol samting we oli moa impoten i winim mane.

Samting We i Moa Gud i Winim Mane

King Solomon i talem se mane i save givhan blong mekem laef blong yumi i gud, be hem i ademap se waes i gud moa from we ‘hem i save lukaot gud long man’ mo i “save sevem laef blong man we i kasem hem.” (Prija 7:12, NW ) ?Hemia i minim wanem? Long ples ya, Solomon i tokbaot, stret save we i kamaot long Baebol, we i save mekem yumi fraet gud long God. Stret save blong Jeova i gud moa i winim mane from we hem i save givhan long yumi blong no foldaon long ol trap, mo i save mekem we yumi no lusum laef blong nating nomo. Mo tu, waestok i olsem wan hat blong king we i save leftemap olgeta we oli holemtaet hem mo i save mekem ol man oli ona gud long hem. (Ol Proveb 2:10-22; 4:5-9) Mo tu waes ya i mekem God i glad long man, taswe Baebol i kolem waes ya se “wan tri blong laef.”—Ol Proveb 3:18, NW.

Olgeta we oli wantem tumas blong gat waes ya mo oli traehad blong lukaotem hem, bambae oli luk se samting ya i isi nomo blong kasem. Olsem ol proveb i talem se: “Pikinini blong mi. . . . Yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting. Oltaem yu mas traehad blong kasem waes ya, olsem we yu save traehad blong faenem silva, no wan narafala samting, we man i bin berem. Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem. Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.”—Ol Proveb 2:1-6.

From we ol trufala kristin oli luksave se waes nao i moa sas bitim mane, ale samting ya nao i mekem se oli gat pis, oli harem gud, mo oli harem se oli sef, i no olsem ol man we oli laekem mane tumas. Hibrus 13:5 i talem se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’ ” Mane i save mekem man i harem se i no sef nating.

?YU YU BIN TINGBAOT?

◼ ?Olsem wanem mane i save givhan long yumi?—Prija 7:12.

◼ ?Wanem ya waes blong God we i gud moa i winim mane?—Ol Proveb 2:10-22; 3:13-18.

◼ ?From wanem i no gud blong laekem mane tumas?—Mak 10:23, 25; Luk 18:23, 24; 1 Timoti 6:9, 10.