Baebol i talem Wanem

?Sipos Yu Yu Wan ‘Gudfala Man’ Hemia i Naf?

“MI TRAEM blong mekem laef blong mi i gud mo mi traem blong stap olsem wan gudfala woman.” Hemia wanem we yangfala woman ya Allison i talem. Olsem Allison, plante man oli ting se samting ya nomo we God i wantem hemia we yumi ‘gudfala man.’

Sam narafala oli ting se nating we oli mekem wan bigfala sin, be God bambae i no tingbaot samting ya sipos long bighaf blong laef blong olgeta oli ‘gudfala man.’ Oli bilif se God i laekem moa blong fogivim man i bitim we i panisim man.

I tru se ol man oli gat defdefren tingting long saed blong tok ya ‘gudfala man.’ ?Be Baebol i talem wanem? ?Yumi mas mekem wanem blong God i glad long yumi? ?I minim wanem blong stap olsem wan gudfala man long fes blong God?

Letem Man Ya We i Wokem Yumi i Lidim Yumi

Jeova God we i wokem yumi, hem i gat raet blong givim ol advaes blong lidim yumi. (Revelesen 4:11) Long Baebol, God i givim ol loa mo ol rul blong lidim yumi long saed blong ol fasin mo wosip blong yumi. God i talem long ol man blong hem se: ‘Yufala i mas obei long mi, mo yufala i mas mekem evri samting we mi talem long yufala. Mo mi talem se sipos yufala i obei long mi, bambae yufala i kam man blong mi, mo mi bambae mi God blong yufala.’—Jeremaea 11:4.

Taswe, long tingting blong God, wan ‘gudfala man’ i minim se man i mas savegud ol rul blong hem mo mekem laef blong hem i laenap wetem ol rul ya. Tingbaot se yu wantem kam fren blong wan man no woman. I sua se bambae yu wantem save wanem samting we hem i wantem yu blong mekem long hem blong biaen yu save mekem ol samting we hem i glad long hem. Baebol i soemaot se, olsem Ebraham, yumi save kam fren blong Jeova, we hemia i minim se Jeova i glad long yumi. (Jemes 2:23) Antap long hemia, from we ol rul blong God oli hae moa long ol rul blong man, yumi no mas ting se God bambae i jenisim sam rul blong hem blong mekem i laenap wetem tingting blong yumi.—Aesea 55:8, 9.

Fasin Obei i Impoten

?Olsem wanem? ?God bambae i no glad long yumi sipos yumi no obei long ol “smosmol” loa blong hem? Samfala oli ting se i no impoten tumas blong obei long sam “smosmol” loa blong God. Be evri loa blong God oli impoten, i no gat wan we i no impoten. Makem se long 1 Jon 5:3, Baebol i no talem se sam loa blong God oli smosmol taem i talem se: “Sipos yumi lavem God, hemia i min se yumi stap folem ol tok blong hem.” Taem yumi traehad blong folem ol loa blong God, yumi pruvum se yumi gat trufala lav long hem.—Matiu 22:37.

Jeova i no ting se man i mas stretgud olgeta long evri samting. Sipos yumi rili sore from ol mastik blong yumi mo yumi traehad blong no moa mekem ol semfala mastik ya bakegen, Hem i glad blong fogivim yumi. (Ol Sam 103:12-14; Ol Wok 3:19) ?Be, yu ting se God i glad taem yumi no obei long sam loa blong hem from we yumi ting se i naf blong obei long ol narafala loa blong hem nomo? Wan eksampol blong Baebol i soemaot se, yumi no save mekem olsem.

King Sol blong Isrel bifo i jusum blong obei long sam loa blong God nomo. Taem hem i stap mekem faet agensem ol man Amalek, God i talem long hem se hem i no mas letem eni anamol blong ol man Amalek i stap laef. Hem i mas “kilim olgeta evriwan i ded.” Be hem i girap i obei long ol narafala tok be i no obei long tok ya. Hem i no moa obei long God, i no kilim i ded “ol nambawan buluk blong olgeta, mo ol nambawan sipsip” blong olgeta. ?From wanem? Hem wetem ol narafala man oli wantem holem ol anamol ya i blong olgeta nomo.—1 Samuel 15:2-9.

Taem profet Samuel i askem long Sol from wanem hem i no obei long oda blong God, Sol i traem blong talem se, si hem i obei long God. Hem i talemaot ol gudfala samting we hem mo ol man blong hem oli mekem, wetem ol sakrefaes tu we oli mekem i go long God. Samuel i askem se: “?Wanem nao we Hae God i wantem moa? ?Hem i wantem blong yumi obei long tok blong hem, no blong yumi mekem sakrefaes long hem? I tru we hem i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.” (1 Samuel 15:17-22) Taswe, yumi no save talem se, from we yumi stap givim plante sakrefaes i go long hem mo yumi stap mekem plante narafala gudfala wok, i oraet nomo we yumi no obei long sam long ol loa blong hem.

Ol Rul Blong God i Soemaot Lav Blong Hem

From we Jeova i lavem yumi, hem i no livim yumi we yumi no sua olsem wanem blong mekem hem i glad. Long Baebol, Hem i givim ol klia rul blong lidim yumi. I olsem we hem i talem se: “Hemia rod. Yufala i folem.” (Aesea 30:21) Taem yumi letem Hem i lidim yumi, yumi no olsem ol man we oli harem nogud mo oli no sua long wanem we oli mas mekem, from we oli mas jusumaot long plante tumas defdefren tingting wanem fasin we oli ting se i gud mo wanem fasin i nogud. Mo yumi save sua se taem yumi letem God i lidim yumi, oltaem fasin ya bambae i mekem i gud long yumi mo i ‘tijim yumi blong givhan long yumi.’—Aesea 48:17, 18.

?Wanem denja i stap taem yumi nomo i jusum wanem samting i mekem wan ‘gudfala man’? Yumi evriwan yumi bon wetem fasin ya blong tingbaot yumi wan. Hat blong yumi i save trikim yumi. (Jeremaea 17:9) From samting ya, i isi nomo we yumi no moa tinghae long sam loa blong God we yumi ting se oli had blong folem no oli blokem yumi tumas.

Eksampol, maet wan man mo woman we tufala i no mared, tufala i jusum blong slip tugeta from tufala i ting se hemia i bisnes blong tufala nomo. Maet tufala i save se samting we tufala i mekem i no laenap wetem ol rul blong Baebol, be maet tufala i talem se sipos ‘i no gat wan we i kasem trabol no i harem nogud from fasin blong tufala,’ God bambae i no kros tumas long tufala. Samting we tufala i wantem i save mekem se tufala i no luksave bigfala rong we tufala i stap mekem mo nogud frut we bambae i kamaot from. Baebol i givim woning ya se: “I gat rod i stap we man i ting se i stret gud, be hem i rod blong ded nomo.”—Ol Proveb 14:12.

Olgeta loa blong Jeova oli soemaot se hem i lavem ol man mo se hem i no wantem we yumi kasem trabol. Ol man we oli brekem ol rul blong Baebol long saed blong seks no sam narafala fasin, oli no haremgud moa mo oli no win moa long laef blong olgeta. Plante man we oli mekem olsem, oli mekem we laef blong olgeta i kam had moa. Be, taem yumi folem ol loa blong God, hemia i halpem gud yumi blong gat wan gudfala laef mo blong blokem ol samting we oli save spolem yumi mo ol narafala tu. —Ol Sam 19:7-11.

Sipos yu rili wantem kam wan gudfala man long fes blong God, yu mas traehad fulwan blong letem hem i lidim yu. Bambae yu luk we “ol tok blong hem i no strong tumas blong folem.”—1 Jon 5:3.

?YU YU BIN TINGBAOT?

◼ ?From wanem yumi mas letem Man ya we i Wokem yumi i lidim yumi?—Revelesen 4:11.

◼ ?Yumi mas obei long evri loa blong God?—1 Jon 5:3.

◼ ?From wanem i no waes we yumi jusum ol loa we yumi nomo i wantem folem?—Ol Proveb 14:12; Jeremaea 17:9.

[Tok blong pija long pej 17]

?Yu yu gat tingting blong God long saed blong ol gudfala fasin?