Step 5
Putumap Wan Program Mo Gohed Blong Folem
?From wanem yu mas tekem step ya? Taem yumi kam bigman, yumi folem program long plante samting we yumi mekem long laef blong yumi. Long saed blong wok, wosip, mo maet pleplei tu, klosap oltaem yumi folem wan program. Sipos papa mama i no tijim pikinini blong makemaot taem blong ol samting mo blong folem wan program, tufala i mekem i nogud long hem. Laurence Steinberg we hem i wan tija long saed blong tingting mo fasin blong man, i talem se: “Ol stadi oli soemaot se taem i gat ol rul mo program long famle, pikinini i harem se hem i sef, tingting blong hem i no trabol, mo samting ya i tijim hem tu blong bos long tingting blong hem mo blong trastem hem wan se hem i naf blong mekem samting.”
?From wanem i hadwok?: I gat plante samting blong mekem laef blong yumi i bisi. Plante papa mama oli wok plante aoa evri dei blong winim mane, ale oli gat smol taem nomo i stap blong spenem wetem ol pikinini blong olgeta. Blong putumap wan program mo gohed blong folem, oli mas stretem olgeta bakegen mo oli mas gat strong tingting blong winim pikinini we i no wantem folem wan program.
?Wanem i save givhan long yu?: Yu mas folem tingting blong Baebol blong “mekem olgeta samting long fasin we i stret gud, we ol man oli glad long hem.” (1 Korin 14:40) Olsem nao, taem pikinini i smol, plante papa mama oli mekem waes fasin ya blong putum wan stret taem blong pikinini i go slip long naet. Be oli mas mekem se pikinini i glad blong go slip long taem olsem. Tatiana blong Gris, hem i mama blong tu smol gel, mo hem i talem se: “Taem tufala i go long bed, mi mi holem tufala mo mi tokbaot samting we mi bin mekem taem tufala i stap long skul. Nao mi askem long tufala sipos tufala i wantem talem sam samting we tufala i bin mekem long dei ya. Tufala i haremgud, mo plante taem tufala i tokbaot ol tingting mo filing blong tufala.”
Hasban blong Tatiana we nem blong hem Kostas, hem i ridim wan stori long tufala gel ya taem tufala i go long bed. Hem i se: “Tufala i talem tingting blong tufala long stori ya mo plante taem tufala i go long samting we tufala i wari long hem. Sipos mi askem stret long tufala blong talemaot ol wari blong tufala, bambae tufala i neva mekem.” Taem pikinini i kam bigwan moa, i tru se bambae yu jenisim taem we yu putum blong hem i go slip. Be sipos yu gohed blong folem semfala program, ating pikinini blong yu bambae i gohed nomo blong talemaot ol tingting mo filing blong hem.
Mo tu, ol famle we oli no save kakae tugeta tri taem evri dei, oli waes sipos oli meksua se wan taem evri dei oli joen tugeta blong kakae. Blong folem program ya, samtaem maet oli mas jenisim taem blong kakae. Charles we hem i papa blong tu gel, i talem se: “Sam dei mi mi kambak long wok let. Sipos tufala gel i hanggri bifo mi kambak, maet woman blong mi i givim wan smol samting long tufala blong kakae, be oltaem hem i mekem se tufala i wet blong mifala evriwan i save kakae tugeta. Mifala i tokbaot samting we mifala wanwan i mekem long dei ya, wan vas blong Baebol, ol problem blong mifala, mo mifala i laf tugeta. Mi no save olsem wanem blong talem se program ya i impoten tumas blong mekem se famle i hapi.”
Blong lanem step ya, yu no mas letem fasin blong ronem mane i kakae taem we yu mas spenem blong folem program long famle. Yu mas lesin long advaes ya blong Baebol blong ‘jusumaot ol samting we oli impoten moa.’—Filipae 1:10, NW.
?Wanem narafala samting we ol papa mama oli save mekem blong pulum ol pikinini blong tokbaot evri samting wetem olgeta?
[Tok blong makem poen long pej 7]
“Yufala i mas mekem olgeta samting long fasin we i stret gud, we ol man oli glad long hem.”—1 Korin 14:40