Step 7
Eksampol Blong Yu i Tijim Pikinini
?From wanem yu mas tekem step ya? Ol aksen blong yumi oli save tijim narafala. Plante taem ol toktok i givim save nomo. Tingbaot sipos papa mama i talem long pikinini se hem i mas gat respek mo hem i no mas giaman. Be sem papa mama ya i tok nogud long tufala, mo tufala i singaot strong long tufala, mo tufala i giaman from we tufala i no wantem mekem sam wok we tufala i no laekem blong mekem. Tufala ya i stap tijim pikinini se hemia nao fasin we bigman i mas mekem. Long buk we Dokta Sal Severe i raetem, hem i talem se “samting we i gat moa paoa blong tijim pikinini i bitim ol narafala samting,” hemia fasin we papa mama i mekem.
?From wanem i hadwok?: Ol papa mama oli no stretgud olgeta. Aposol Pol i raetem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) Long saed blong fasin blong bos long ol toktok blong yumi, disaepol Jemes i talem se: “I no gat man samtaem we i save mekem tang blong hem i stap kwaet.” (Jemes 3:8) Mo tu, sam samtaem pikinini i save traem longfala tingting blong papa mama bitim mak. Larry we hem i papa blong tu pikinini, hem i wan kwaet man we i bosgud long tingting mo fasin blong hem. Nating se i olsem, hem i talem se: “Mi mi sek se ol pikinini blong mi oli save mekem mi mi kros hareap nomo.”
?Wanem i save givhan long yu?: Traehad blong soem gudfala eksampol. Hemia i no min se yu mas stret olgeta. Sipos samtaem yu mestem long fasin blong yu, yusum samting ya blong tijim pikinini. Chris we hem i gat tu pikinini blong hem, i talem se: “Sipos mi faerap long kros long pikinini blong mi, no sipos mi tekem wan nogud desisen we i mekem i nogud long hem, oltaem mi talemaot mastik blong mi mo mi talem sore. Hemia i tijim pikinini se ol papa mama tu oli save mestem mo se yumi evriwan i mas wok strong blong kamgud moa long fasin blong yumi.” Kostas we yumi tokbaot hem finis, i se: “Mi mi talem sore taem mi faerap long kros long tufala gel blong mi. From we mi mekem olsem, mi luk we tufala tu i lanem blong talem sore taem tufala i mekem mastik.”
Jeova God i talem se: “Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.” (Efesas 6:4) Taem wan man we i bos long narafala i talem wan samting be i mekem defren samting, hemia i save mekem narafala ya i kros, mo i sem mak long saed blong ol pikinini wetem mama papa blong olgeta. Taswe, long en blong dei, i gud yu traem ansa long ol kwestin ya: ?Tede, ol pikinini blong mi oli bin lanem wanem long ol aksen blong mi? ?Hemia i sem mak long samting we mi stap tijim olgeta long ol toktok blong mi?
[Tok blong makem poen long pej 9]
“Yufala i save tijim ol narafala man. ?Be from wanem yufala i no save tijim yufala bakegen?”—Rom 2:21
[Tok blong pija long pej 9]
Taem papa no mama i talem sore, pikinini tu i lanem blong talem sore