?I Gat Wan Man We i Wokem Samting Ya?

Silik Blong Spaeda

◼ Silik blong spaeda i no hevi nating, koten i moa hevi long hem. Nating se i olsem, wan gram silik blong spaeda i moa strong, i bitim wan gram aean. Plante yia finis, ol saentis oli stadi long silik ya we ol spaeda oli mekem, antap moa ol spaeda we oli wokem bed blong olgeta i raon. I gat seven kaen silik we ol spaeda ya oli save wokem, be ol tred blong silik we oli wokem olsem ol stamba tred blong bed blong olgeta (dragline silik) oli strong moa, mo ol saentis oli intres moa long olgeta. Ol tred ya oli strong moa mo oli blokem ren moa i bitim ol tred blong silik we ol wom oli wokem, hemia ol tred we ol man oli yusum blong wokem plante kaen kaliko.

Tingbaot: Taem ol man oli wokem ol strong tred ya we oli kolem Kevlar blong mekem kaliko long hem, oli mas boelem sam asid we oli faenem long ol tri mo long sam narafala samting raonabaot long yumi. Be taem ol spaeda oli wokem ol tred blong silik long bed blong olgeta, oli no nidim blong hotem wan samting, mo oli no nidim enikaen asid, oli yusum wota nomo. Mo tu, dragline silik i strong moa, i bitim Kevlar. !Sipos spaeda i wokem wan bed blong dragline silik we i bigwan olsem wan futbol fil, bambae bed ya i naf blong stopem wan jet plen we i stap flae!

Yumi kasem save from wanem ol saentis oli intres moa long silik ya we i strong tumas. Aimee Cunningham i raetem (long buk ya Science News) se: “Ol saentis oli wantem tumas blong wokem wan kaliko [we i olsem dragline silik] blong yusum long ol smol samting, olsem klos we man i save werem blong blokem bolet, mo long ol bigfala samting tu, olsem strong rop ya we oli save yusum blong hangem ol brij long hem.”

Be i no isi nating blong wokem samting we i sem mak long dragline silik. Spaeda i wokem silik ya insaed long bodi blong hem, mo ol saentis oli no savegud yet olsem wanem hem i mekem samting ya. Long wan buk, (Chemical & Engineering News) oli raetem tok blong wan woman saentis we i stadi long ol laef samting, nem blong hem Cheryl Y. Hayashi, i se: “Yumi harem se yumi smol we yumi smol tumas, taem yumi tingbaot se plante man we oli gat bigfala save oli stap traehad blong kopi wan samting we ol spaeda oli stap mekem evri dei, olbaot long ol smosmol kona blong haos blong yumi.”

?Wanem tingting blong yu? ?Spaeda mo silik we spaeda i wokem we i strong olsem aean, oli kamaot olsem nomo? ?Yu ting se God we i gat bigfala save mo waes i wokem olgeta, no nogat?

[Tok blong pija long pej 30]

Samting ya we ol saentis oli lukluk wetem strong glas, i kamaot long bodi blong spaeda taem i stap wokem bed blong hem

[Credit Line]

Copyright Dennis Kunkel Microscopy, Inc.