Baebol i Talem Wanem
?I Stret We Ol Kristin Oli Bilif Long Gudlak Mo Badlak?
WAN man blong raetem niuspepa i no flae long plen blong wan fulyia from we wan kleva i bin talem long hem, se bambae hem i ded long wan aksiden long plen. Nomata wanem wok, fasin blong laef, mo mane we ol man oli gat, plante man long olgeta ples long wol oli joen long sam kastom we oli ting se i save karem gudlak long olgeta. Long ol man ya, i gat ol man blong politik, ol bisnesman, ol man blong plei sinema, ol man blong spot, mo ol studen blong yunivesiti. Taem oli harem se oli no sef, oli kasem trabol, no oli wari, oli filim se ol kastom ya oli blokem olgeta long ol denja, mo oli givhan long olgeta blong oli kasem samting we oli wantem.
Ol man oli luk se bilif ya long gudlak mo badlak i wan kastom blong ol olfala bifo mo hem i oraet nomo, mo se i givhan long tingting blong man. Taem Margaret Mead i laef yet, hem i bin mekem stadi long saed blong fasin blong laef blong ol man mo kastom blong olgeta, mo hem i talem se: “Bilif ya long gudlak mo badlak i soemaot se yumi wantem tumas samting we yumi putum tingting blong yumi i stap strong long hem, mo se yumi wantem blokem trabol blong i no kasem yumi. Maet yumi no bilif fulwan long gudlak mo badlak from we yumi no wantem kam slef blong bilif ya, be sipos yumi joen long sam kastom blong hem, bambae i givhan blong mekem yumi haremgud long tingting blong yumi.” Nating se i olsem, ol man we oli wantem mekem God i glad oli mas askem kwestin ya se: “?I stret we ol trufala Kristin oli bilif long gudlak mo badlak?”
Stamba Blong Bilif Long Gudlak Mo Badlak
Ol man oli fraet long plante samting—oli fraet long ded, oli fraet blong fesem ol samting we oli no bin fesem bifo, oli fraet long samting we bambae i hapen afta we oli ded, mo long sam narafala samting bakegen. Setan, we i agensem God, i gat strong tingting blong mekem ol man oli kam olsem we oli kalabus long ol fraet ya, mo hem i ademap sam giaman tingting blong mekem se oli fraet moa. (Jon 8:44; Revelesen 12:9) I no Setan nomo we i stap traehad blong pulum ol man oli gowe long God. Baebol i kolem Setan se “jif blong ol devel.” (Matiu 12:24-27) ?Ol devel ya oli hu? Long taem blong Noa, sam enjel oli joen wetem Setan blong agensem God, nao long rod ya oli kam ol devel. Stat long taem ya, oli traem blong gat paoa long tingting blong ol man. Wan long ol trik we oli yusum, hemia bilif ya long gudlak mo badlak.—Jenesis 6:1, 2; Luk 8:2, 30; Jud 6.
Bilif long gudlak mo badlak i stanap long wan long ol giaman tok blong Setan. Hemia tingting ya se taem man i ded, wan haf blong hem we yumi no save luk, i stap laef yet, mo i save kambak blong givhan no spolem olgeta we oli laef i stap. Be Baebol i talem se: “Ol man we oli ded finis oli no moa save wan samting. . . . I no gat wok, mo tingting, mo save, mo waes” afta we man i ded.—Prija 9:5, 10.
“[Jeova] i No Laekem Nating”
Plante man oli bilivim ol giaman tok ya blong Setan. Be plante yia bifo, God i givim ol klia advaes long ol kastom we oli joen wetem gudlak mo badlak. Tok blong hem i talem se: “Yufala i mas lukaot gud blong yufala i no folem fasin blong . . . ol kleva, mo blong makemgud ol smosmol saen we [yufala i] luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long [yufala]. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.”—Dutronome 18:10-12.
Sore tumas, be i no oltaem we ol man Isrel oli lesin long woning ya. Long taem blong profet Aesea, sam man Isrel oli ting se sipos oli givim plante presen long “god blong Laki,” bambae hem i glad long olgeta mo bambae i mekem garen blong olgeta i karem plante kakae. Oli kasem bigfala trabol from giaman bilif ya. Jeova i no moa glad long olgeta mo i no moa blesem olgeta.—Aesea 65:11, 12, NW.
Taem Kristin skul i stanap, tingting blong Jeova long saed blong bilif ya long gudlak mo badlak i no jenis. Aposol Pol i tok strong blong pulum ol man Listra, we oli bilif long gudlak mo badlak, blong oli “no moa mekem wosip long ol narafala god ya we oli no gat paoa [“oli blong nating nomo,” no “bilif ya long gudlak mo badlak,” The Emphatic Diaglott], [oli] mas mekem wosip long God ya nomo we i laef, i stap we i stap. Hem nomo i mekem skae, mo graon, mo solwota, mo olgeta samting we oli stap long ol ples ya.”—Ol Wok 14:15.
Lego Bilif Long Gudlak Mo Badlak
I gat plante defren kastom we oli joen wetem bilif ya long gudlak mo badlak, be i gat wan samting we i mekem se olgeta evriwan oli sem mak—hemia se oli no stanap long ol trufala save. Bilif ya long gudlak mo badlak i karem plante nogud frut. Wan long olgeta, hemia se taem man i kasem trabol, hem i putum i go long badlak nomo, be hem i no luksave se trabol ya i kamaot from rong blong hem.
Yumi glad se plante man oli lego bilif long gudlak mo badlak. Jisas i talem se: “Bambae yufala i save trutok, mo trutok ya bambae i mekem yufala i fri man.” (Jon 8:32) Blong 25 yia, wan woman Brasil, nem blong hem Clementina, i talemaot fiuja blong ol man. Hem i talem se: “Wok ya blong talemaot fiuja blong ol man i rod ya nomo we mi mi gat blong kasem samting we mi nidim long laef. Be trutok blong Baebol i mekem se mi mi lego bilif long gudlak mo badlak.” Blong talem stret, sipos yumi stadi oltaem long Baebol mo yumi prea long Jeova God wetem ful hat blong yumi, sloslo bambae yumi kasem paoa we i save givhan long yumi blong tingting gud mo skelem gud ol samting. Nao yumi save tekem ol gudfala desisen we oli no karem trabol long yumi mo oli no mekem yumi wari.—Filipae 4:6, 7, 13.
Baebol i askem kwestin ya se: “?Olsem wanem delaet mo tudak, tufala i save stap wanples? ?Olsem wanem Kraes mo Setan, tufala i save agri?” Taswe, ol trufala Kristin oli mas stap longwe long bilif ya long gudlak mo badlak.—2 Korin 6:14-16, Nyutesteman wetem Ol Sam long Bislama.
?YU YU BIN TINGBAOT?
◼ Long taem blong Aesea, ol man Isrel oli bilif long gudlak mo badlak. ?Oli no trastem God, be oli trastem hu?—Aesea 65:11, 12, NW.
◼ ?Aposol Pol i pulum ol man Listra we oli bilif long gudlak mo badlak, blong oli mekem wanem?—Ol Wok 14:15.
◼ ?I stret we ol trufala Kristin oli bilif long gudlak mo badlak?—2 Korin 6:14-16.
[Tok blong pija long pej 15]
Bilif ya long gudlak mo badlak i trikim man blong i no luksave rong blong hem, be i ting se hem i oraet nomo