Ol Yangfala Oli Askem

?Mi Mi Mas Faenem Ol Niufala Fren We Fasin Blong Olgeta i Moagud?

“Sipos mi kros, mi wantem talemaot kros ya long wan narafala. Sipos mi sore, mi wantem wan narafala i mekem mi mi haremgud bakegen. Sipos mi glad, mi wantem serem glad ya wetem wan narafala. Long tingting blong mi, i impoten tumas blong gat ol fren.”—Brittany.

OL MAN oli bin talem se ol smosmol pikinini oli nidim sam narafala blong oli save pleplei tugeta, be ol yangfala oli nidim ol fren. ?Tufala samting ya i defren olsem wanem?

Wan we i pleplei wetem yu, hem i wan we i kampani wetem yu nomo.

Be wan fren, hem i wan we i gat semfala tingting olsem yu long saed blong ol samting we oli impoten moa.

Mo tu, Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Ol Proveb 17:17, NW) !Tok ya i soemaot gud wan fasin fren we i dip moa i bitim hemia we yu gat wetem olgeta ya we yu pleplei wetem olgeta taem yu smol!

Samting we i tru: Taem yu stap kam bigwan moa, yu nidim ol fren we oli

(1) Gat ol gudfala fasin.

(2) Kasem ol hae mak we Baebol i putum long saed blong fasin mo bilif.

(3) Givhan long yu blong kam gud moa.

Kwestin: ?Olsem wanem blong luksave sipos ol trifala poen ya oli stret long ol fren blong yu? I gud yumi tokbaot wanwan long ol trifala poen ya.

Faswan Samting We Ol Fren Oli Mas Gat Ol Gudfala Fasin

Samting we yu mas save. I no evri man we oli save kam trufala fren blong yu. Baebol i talem se: “I gat sam man we oli save spolem ol fren blong olgeta.” (Ol Proveb 18:24, NW) Maet yu harem se tok ya i strong tumas. Be tingbaot: ?Yu yu bin gat wan “fren” finis we i yusum yu nomo? ?Yu bin gat wan fren we i tokbaot yu long baksaed blong yu mo i talemaot sam giaman tok long saed blong yu? Ol samting olsem oli save mekem se yu no moa save trastem ol fren.a !Taswe, taem yu mas jusum ol fren blong yu, yu mas tingbaot oltaem se fasin blong olgeta i moa impoten i bitim namba blong ol fren we yu save gat!

Samting we yu save mekem. Jusum ol fren we oli gat ol gudfala fasin mo we yu save folem fasin blong olgeta.

“Evriwan oli gat gudfala tingting long fren ya blong mi, Fiona. Mi tu mi wantem we ol narafala oli talem ol gudfala samting long saed blong mi. Mi wantem gat gudnem olsem Fiona. Long tingting blong mi, samting ya i gud tumas.—Yvette, we i gat 17 yia blong hem.

Traem samting ya.

1. Ridim Galesia 5:22, 23, NW.

2. Askem se: “?Ol fren blong mi oli gat ol fasin ya we oli ‘frut blong spirit’?”

3. Long lis daon, raetem nem blong ol bes fren blong yu. Afta long wanwan nem, raetemdaon fasin we fren blong yu i gat.

Nem Fasin

․․․․․ ․․․․․

․․․․․ ․․․․․

․․․․․ ․․․․․

Blong Givhan: !Sipos yu save tingbaot ol nogud fasin nomo we ol fren ya oli gat, maet i stret taem naoia blong yu faenem sam narafala fren we fasin blong olgeta i moagud!

Seken Samting We Ol Fren Oli Mas Gat Kasem Ol Hae Mak We Baebol i Putum Long Saed Blong Fasin Mo Bilif

Samting we yu mas save. Moa we yu wantem tumas blong gat ol fren, moa we bambae yu jusum olgeta we oli no stret. Baebol i talem se: “Sipos [man] i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) Tok ya “man we i no gat hed” i no tokbaot ol man we oli no gat save. Defren olgeta, tok ya i tokbaot olgeta we oli no wantem lesin long ol gudfala tingting, be oli folem ol fasin we oli no stret. !I moa gud we yu no joen nating wetem ol kaen fren olsem!

Samting we yu save mekem. Yu no mas fren wetem eniman nomo we oli glad blong fren wetem yu. Defren olgeta, yu mas jusumaot hu bambae yu fren wetem. (Ol Sam 26:4) Hemia i no min se yu mas gat nogud tingting long saed blong ol narafala. Long ples ya, jusumaot ol fren blong yu i min se yu mas luksave “wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.”—Malakae 3:18, NW.

God i no mekem i gud moa long sam man i bitim sam narafala. Be hem i jusumaot hu olgeta we bambae oli stret ‘blong stap long Haos Tapolen blong hem.’ (Ol Sam 15:1-5) Yu tu yu mas mekem sem mak. Yu mas kasem ol hae mak we Baebol i putum long saed blong fasin mo bilif. Sipos yu mekem olsem, ol narafala we oli stap traehad blong mekem sem mak, bambae oli faenem yu. !Mo biaen, bambae oli kam ol fren ya we oli beswan!

“Mi mi tangkiu tumas long papa mama blong mi, from we tufala i bin halpem mi blong faenem ol fren, hemia olgeta we oli yangfala olsem mi mo we oli stap traehad blong folem ol tingting blong God.”—Christopher, we i gat 13 yia blong hem.

Traem samting ya.

Ansa long ol kwestin ya:

◼ ?Taem mi stap wetem ol fren blong mi, mi fraet oltaem se bambae oli fosem mi blong mekem samting we mi save se i no stret?

□ Yes □ No

◼ ?Mi mi no glad blong soemaot ol fren blong mi long papa mama blong mi, from we mi fraet se maet tufala i no agri long olgeta?

□ Yes □ No

Blong givhan: Sipos yu ansa yes long tufala kwestin antap, yu mas lukaot olgeta we oli kasem ol hae mak long saed blong fasin mo bilif, blong oli kam fren blong yu. I gud we yu stat wetem olgeta we oli gat moa yia i bitim yu, mo we oli soem gudfala eksampol long Kristin laef blong olgeta.

Namba Tri Samting We Ol Fren Oli Mas Gat Givhan Long Yu Blong Kam Gud Moa

Samting we yu mas save. Baebol i talem se: “Ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15:33) Wan yangfala we nem blong hem Lauren, i talem se: “Ol fren blong mi long skul, oli fren wetem mi nomo taem mi mekem samting we oli talem long mi blong mekem. Mi mi no gat fren, taswe mi bin ting se i moagud blong mekem i sem mak olsem olgeta, blong oli glad blong fren wetem mi.” Lauren i faenemaot se, taem yu folem fasin blong laef blong ol narafala, yu save kam olsem wan pleplei long han blong olgeta, mo olgeta nao oli muvum yu olsem we oli wantem. !I no stret we oli mekem olsem long yu!

Samting we yu save mekem. Yu no moa fren wetem olgeta ya we oli wantem se yu folem fasin blong laef blong olgeta. Sipos yu no moa fren wetem olgeta, bambae yu glad long yu wan, mo bambae yu rere blong fren wetem olgeta ya we fasin blong olgeta i moagud, olgeta we bambae oli givhan long yu blong kam gud moa.—Rom 12:2.

“Bes fren blong mi, Clint, hem i save mekem ol gudfala desisen mo hem i kasem save long filing blong ol narafala. Taswe, hem i leftemap tingting blong mi plante.”—Jason, we i gat 21 yia blong hem.

Traem samting ya.

Tingbaot ol kwestin ya:

◼ ?Mi mi jenisim ol aksen blong mi, ol klos blong mi, mo fasin blong mi blong toktok, blong mekem ol fren blong mi oli glad?

□ Yes □ No

◼ ?Mi mi stap go long ol ples we oli no stret, we mi no save go long olgeta sipos ol fren blong mi oli no fosem mi?

□ Yes □ No

Blong Givhan: Sipos yu ansa yes long ol kwestin antap, i gud yu go luk papa mama blong yu, no wan narafala we i bigman long ol Kristin fasin, blong askem advaes. Sipos yu yu wan Witnes blong Jeova, yu save go luk wan Kristin elda mo talem long hem se yu wantem we hem i givhan long yu blong jusum ol fren we bambae oli givhan long yu blong kam gud moa.

[Futnot]

SAM SAMTING BLONG TINGBAOT

◼ ?Wanem ol fasin we yu yu laekem blong ol fren blong yu oli gat? ?From wanem?

◼ ?Wanem ol fasin we yu yu mas wokem, blong yu save stap olsem wan gudfala fren?

[Bokis/Foto blong pija long pej 19]

SAMTING WE OL FREN BLONG YU OLI TALEM

“Taem papa mama blong mi tufala i no moa letem mi blong joen long wan grup blong fren, tingting blong mi se mi wantem joen yet wetem olgeta ya. Be advaes we papa mama blong mi i givim, i gud, mo taem mi stat blong tingting gud long ol advaes ya, mi kasem save se i gat plante narafala we mi save fren wetem olgeta, we fasin blong olgeta i gud moa.”—Cole.

“Beswan rod blong mi mi savegud ol man long kongregesen, hemia blong joen long Kristin wok ya blong prij. Long taem ya nao mi joen wetem plante defren kaen man, ol yangfala mo ol olfala. Mo mi spenem taem blong mi wetem ol man we oli lavem Jeova.”—Yvette.

“Mi mi prea long God blong mi save faenem sam fren, be biaen mi kasem save se mi no mekem wan samting nating blong faenem ol fren ya. Taswe, mi traem wokem fasin ya blong talem halo long ol narafala we mi mitim long ol Kristin miting, mo mi storian wetem olgeta. I no longtaem biaen, mi gat plante niufala fren. Naoia, mi mi no moa harem se mi stap mi wan nomo.”—Sam.

[Bokis blong pija long pej 20]

TRAEM OL ADVAES YA

Toktok wetem papa mama blong yu long saed blong ol fren. Askem long tufala wanem kaen fren we tufala i gat taem tufala i yangfala olsem yu. ?Olsem wanem? ?Tufala i sore we tufala i bin jusum ol fren ya blong kampani wetem? ?Sipos yes, from wanem? Askem long tufala olsem wanem yu yu save blokem sam long ol trabol ya we tufala i bin kasem.

Askem long ol fren blong oli kam mitim papa mama blong yu. Sipos yu yu fraet blong mekem olsem, traem tingbaot se: “?From wanem mi mi fraet?” ?Olsem wanem? ?I gat sam samting long saed blong ol fren ya we yu save se papa mama blong yu bambae tufala i no glad from? Sipos yes, i gud yu lukaot moa blong jusum ol gudfala fren.

[Bokis blong pija long pej 20]

TRI ROD BLONG HOLEMTAET OL GUDFALA FREN

◼ Yu mas lesingud. Soem intres long ol samting we fren blong yu i glad long olgeta mo ol samting we oli mekem hem i wari.—Filipae 2:4.

◼ Yu mas fogivim narafala. Yu no mas ting se fren blong yu bambae i mekem evri samting i stretgud olgeta. “Plante taem, yumi evriwan i mekem i no stret.”—Jemes 3:2.

◼ Letem olgeta oli gat sam fri taem blong olgeta. I no nid blong yu biaen long fren blong yu long evri samting we hem i mekem. Ol trufala fren blong yu bambae oli stap wetem yu taem yu nidim olgeta.—Prija 4:9, 10.

[Tok blong pija long pej 18, 19]

Taem yu folem fasin blong laef blong ol narafala jes blong mekem se oli fren wetem yu, yu kam olsem wan pleplei long han blong olgeta, we oli save muvum olsem we oli wantem