I Impoten Blong Soemaot We Yumi Lavem Narafala
“!PLANTE taem yu mas putum han blong yu i goraon long tufala, holem tufala klosap long yu!” Wan tija we i stadi long sik long tingting blong pikinini, i talem toktok ya long wan mama we i jes bonem tufala faswan pikinini blong hem we tufala i twin. Mama ya i askem long tija ya se wanem beswan rod blong tijim gud ol pikinini blong hem. Tija ya i gohed blong ansa long mama ya se: “Yu mas soemaot long plante defren rod se yu lavem tufala pikinini blong yu, olsem taem yu holemtaet tufala klosap long yu mo yu kisim tufala, yu kaengud long tufala mo yu talem ol toktok blong soemaot we yu lavem tufala, yu traem kasem save long tufala, yu glad long tufala, yu givim samting long tufala long gladhat blong yu, mo yu fogivim tufala, mo taem i nidim, bambae yu mas stretem tufala tu. Yumi neva mas ting se ol pikinini blong yumi oli save we yumi lavem olgeta.”
Wan woman we nem blong hem Tiffany Field, i daerekta blong Touch Research Institute long Yunivesiti blong Miami, Florida, Yunaeted Stet. I luk olsem se hem i agri wetem advaes blong tija ya we yumi tokbaot long haf antap. Hem i se: “I impoten tumas blong putum han blong yu i goraon long pikinini mo holem hem, fasin ya i givhan long hem blong gru gud mo harem gud, olsem taem hem i kakae gud mo mekem eksasaes.”
?Olsem wanem? ?Ol bigman tu oli nidim we man i soemaot long olgeta se i lavem olgeta? Yes. Wan dokta we i wok long saed blong ol sik long tingting, nem blong hem Claude Steiner, i faenemaot long ol stadi we hem i mekem se, nomata wanem yia blong yumi, ol toktok mo aksen we i leftemap tingting blong yumi oli impoten tumas blong mekem yumi harem gud long filing blong yumi. Wan nes we i lukaot long wan bigfala grup blong ol olfala man, nem blong hem Laura, i talem se: “Mi mi luk we fasin ya blong soemaot we yu lavem ol olfala i rili givhan long olgeta bigwan. Taem yu kaen long olgeta mo yu tajem olgeta, oli trastem yu mo oli glad moa blong folem toktok blong yu. Antap long samting ya, taem yu soemaot long fasin blong yu se yu lavem olgeta, oli luk se yu respektem tingting mo filing blong olgeta.”
Taem yu soemaot we yu lavem narafala, samting ya i mekem i gud long narafala ya, mo i mekem i gud long yu tu. Wan taem Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Yumi harem gud tumas speseli taem yumi soemaot we yumi lavem ol man we tingting blong olgeta i trabol no i foldaon, no we oli no trastem tumas olgeta wan. I gat plante stori long Baebol we i tokbaot olsem wanem samfala oli mekem samting olsem blong halpem narafala.
Tingbaot man ya we “bodi blong hem i fulap long wan rabis sik blong skin,” mo ol man long komuniti oli lukluk nogud long hem. !Ating hem i harem gud tumas taem Jisas Kraes i gat sore long hem mo i putum han blong hem long hem!—Luk 5:12, 13; Matiu 8:1-3.
Wan enjel blong God i kam mekem tingting blong olfala profet ya Daniel i strong bakegen. Tingbaot filing blong Daniel, olsem wanem hem i harem gud bakegen taem enjel ya i soemaot we hem i lavem Daniel, i leftemap tingting blong hem, mo tu taem enjel ya i holem hem mo i tajem hem wetem han blong hem. Fasin blong enjel ya blong tajem mo holem Daniel mo talem ol tok blong leftemap tingting blong hem, hemia nao stret samting we Daniel i nidim, from we hem i taed tumas long bodi mo tingting blong hem.—Daniel 10:9-11, 15, 16, 18, 19.
Wan taem, ol fren blong aposol Pol long Efesas oli wokbaot samwe 50 kilometa blong kam mitim Pol long Maelitas. Long ples ya, Pol i talem long olgeta se maet bambae oli no moa luk hem bakegen. !Ating Pol i harem gud tumas taem ol gudfala fren blong hem oli ‘holem hem mo kis long hem blong talem tata long hem’!—Ol Wok 20:36, 37.
Taswe, Baebol mo ol niufala save we man i faenem tede, oli pulum yumi blong soemaot long narafala we yumi lavem hem. Taem yumi mekem olsem, yumi givhan long narafala blong harem gud long bodi mo long filing blong hem. I klia we olgeta man oli nidim ol narafala blong soemaot se oli lavem olgeta, i no ol pikinini nomo.