“I Nogud Yufala i Stap Tingting Tumas”
“Mane we mitufala i holem long bang i finis, wetem mane ya tu we mitufala i putum long bang long nem blong ol pikinini blong mitufala. Plante manis mifala i no winim wan mane nating.”
● Long taem ya, mi mi lukaot long wan skul blong ol pikinini long India, long wan ples afsaed long taon, mo skul ya i stap wingud. Fastaem i gat samwe long 500 studen long skul ya. Be biaen, wan skul we i stap long taon mo i flas moa long skul blong mi, i stat sanem wan bas blong karem ol pikinini we oli wantem go long taon. Hemia i mekem se i isi long ol pikinini blong go long skul ya long taon. Ale, plante studen oli jenisim skul. I no moa gat 500 studen long skul blong mi, be namba i godaon kasem 60 nomo. Mowas, long taem ya wan man we i stap long komiti blong skul ya i brekem kontrak we hem i mekem wetem mi long saed blong mane, mo hem i gat kaon long mi. Mi mi fesem wan bigfala trabol long saed blong mane, from we i gat plante tija mo wokman long skul we mi mas pem olgeta tu.
Ale, mi, woman blong mi, mo ol pikinini blong mitufala, mifala i sidaon blong tokbaot trabol ya. Mifala evriwan i traehad blong folem advaes blong Jisas blong mekem ‘ae blong mifala i klia gud.’ Mifala i rere blong lego sam samting we mifala i wantem, mo blong lukaotgud se mifala i no mekem kaon. (Matiu 6:22, 25, Nyutesteman wetem Ol Sam long Bislama) Blong smoltaem, mifala i no moa yusum trak blong mifala from we mifala i no gat mane blong fiksimap mo blong pem bensin. Blong katem mane we mifala i spenem long kakae, mifala i go long stoa long naet, from we long taem ya oli daonem praes blong ol samting blong oli save salem kwik. Mo tu, mifala i no moa kakae bigwan, mifala i kakae naf nomo.
Mifala i Witnes blong Jeova, ale mifala i save se i impoten blong joen wanples wetem ol Kristin brata sista blong mifala long ol miting. (Hibrus 10:25) Taswe, nating we mifala i no gat mane, mifala i promes se bambae mifala i no mestem ol miting mo asembli, we sam long olgeta oli stap longwe long ples blong mifala. Mo tu, blong prij mo tijim ol man long saed blong Baebol, mifala i mas go longwe long haos blong mifala. Ale, mifala i no moa yusum trak be mifala i yusum wan moto. Wan samting nomo, hemia se tu nomo long mifala i save ron long moto wantaem.
Hemia i no min se mifala i katem taem we mifala i spenem long wok blong prij, nogat. Defren olgeta, woman blong mi mo gel blong mitufala i mekem program blong spenem moa taem blong toktok wetem ol man long saed blong Baebol. Samtaem tufala i mas wokbaot 6 kasem 8 kilometa blong mekem Baebol stadi wetem samfala we oli intres, mo tufala i wokbaot bakegen blong kamhom. Mi mo boe blong mi, mitufala i traehad tu blong spenem moa taem long wok blong tijim ol narafala long Baebol.
Naoia ol samting i kamgud smol long saed blong mane. Be trabol we mifala i pastru long hem i tijim mifala se i nogud blong tinghae tumas long ol samting long saed blong bodi. Mifala i lanem tu se i nogud blong tingting tumas long ol trabol we mifala i no naf blong blokem. Tok blong Ol Sam 55:22 i rili leftemap tingting blong mifala. Vas ya i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” !Tok ya i tru 100 pesen, long taem ya we mifala i kasem bigfala trabol long saed blong mane!—Wan famle i sanem stori ya i kam.