Ol Yangfala Oli Askem
?I Gud Blong Mi Lego Skul, No Nogat?
?Long tingting blong yu, yu mas skul kasem wanem klas?
․․․․․
?Papa mama blong yu, tufala i wantem se yu yu skul go kasem wanem klas?
․․․․․
?ANSA blong yu long tufala kwestin ya oli sem mak? Maet yes. Nating se i olsem, sipos yu stap skul yet, maet i gat sam dei we yu yu wantem lego skul. Yu traem tingbaot ol tok we i kam biaen. ?Samtaem yu yu gat tingting olsem ol narafala yangfala ya?
● “Samtaem mi tingting tumas nao mi no wantem girap long moning. Mi tingting se, ‘?From wanem mi mas go long skul mo lanem ol samting we bambae oli no givhan long laef blong mi?’”—Rachel.
● “Plante taem, mi taed blong go long skul, mi wantem lego nomo mo faenem wan wok. Mi harem se skul i no givhan long mi nating, i moa gud mi wok blong kasem mane.”—John.
● “!Evri naet mi spenem fo aoa blong mekem ol homwok blong mi! Ol homwok we mi mas mekem, ol projek blong skul, mo ol eksam, oli plante tumas. Mi jes finisim wan, afta i gat wan moa bakegen. Mi harem se mi no naf blong mekem olgeta evriwan mo mi wantem lego nomo.”—Cindy.
● “Long skul blong mifala, wan man i talem se hem i putum wan bom long skul, wan yangfala i kilim hem wan i ded, mo ol gang oli faetfaetem olgeta. !Samtaem mi harem se mi fraet tumas, mi wantem lego skul nomo!”—Rose.
?Olsem wanem? ?Samtaem sam samting olsem oli hapen long yu tu? Sipos yes, ?wanem samting i hapen we i mekem se yu wantem lego skul?
․․․․․
Maet yu stap mekem plan finis blong lego skul. ?Be olsem wanem blong save sipos yu wantem finis long skul from we i stret taem blong yu mekem olsem, no from we yu les blong skul mo yu wantem lego nomo? Blong ansa long kwestin ya, fastaem yu mas kasem save se i minim wanem blong lego skul.
?Bambae Yu Finisim Skul Blong Yu No Yu Lego Skul?
?Olsem wanem man we i finisim skul blong hem i defren long man we i lego skul?
․․․․․
Long sam kantri, i stret blong wan yangfala i finisim skul blong hem taem hem i skul samwe faef kasem eit yia. Be long sam narafala kantri, ol studen oli mas stap long skul ten no twelef yia. Taswe i no gat wan stret yia no klas long skul we ol man long olgeta ples long wol oli mas kasem.
Antap long samting ya, long sam kantri, ol studen oli save skul long haos nomo. Oli no go long wan skul. Taem ol studen oli skul long haos, papa mama blong olgeta oli agri mo oli givhan long olgeta blong mekem olsem. Ol studen olsem oli no stap lego skul.
Nating se yu stap go long wan prapa skul no yu skul long haos nomo, maet yu stap tingting blong lego skul bifo we yu finisim skul blong yu. Ale, i gud we yu tingbaot ol kwestin ya:
?Loa blong kantri i talem se mi mas mekem wanem? Olsem yumi talem finis, wanwan kantri i gat prapa loa blong hem blong talem se pikinini i mas skul kasem wanem yia no klas. ?Loa long ples blong yu i talem wanem long saed ya? ?Yu yu kasem mak ya finis? Sipos yu no folem tok blong Baebol we i talem se ‘yu mas ona long gavman,’ mo yu finis long skul bifo we yu kasem mak ya we loa i talem, hemia i min se yu yu stap lego skul.—Rom 13:1.
?Mi mi kasem ol mak blong mi long saed blong edukesen? ?Wanem ol mak we yu wantem se edukesen i givhan long yu blong kasem? ?Yu no save? !I gud blong yu save! Sipos no, bambae yu olsem wan man we i stap long wan bas no wan tren, be i no save wanem ples we hem i wantem go long hem. I gud yu sidaon wetem papa mama blong yu mo yutrifala i fulumap bokis ya long pej 28, we i talem se, “Ol Mak We Mi Wantem Kasem Long Saed Blong Edukesen.” Samting ya bambae i givhan long yu blong putum tingting blong yu i stap long ol mak ya, mo bambae i givhan long yu mo papa mama blong yu blong save se bambae yu skul go kasem wanem klas.—Ol Proveb 21:5.
Ating ol tija blong yu mo sam narafala oli talem long yu wanem klas we oli ting se i gud blong yu kasem long skul. Nating se i olsem, papa mama blong yu, tufala i gat raet blong mekem laswan desisen long saed ya. (Ol Proveb 1:8; Kolosi 3:20) Sipos yu finis long skul bifo we yu kasem ol mak we yu wetem papa mama blong yu yutrifala i putum, yu yu stap lego skul.
?From wanem mi wantem lego skul? Yu mas lukaot blong no giaman long yu wan bakegen. (Jeremaea 17:9) Yumi ol sinman yumi gat fasin ya we yumi ting se yumi gat gudfala risen blong mekem samting we yumi nomo yumi wantem.—Jemes 1:22.
Long ples ya, yu save raetemdaon ol risen we yu ting se oli stret, blong yu lego skul bifo long stret taem blong hem.
․․․․․
Long ples ya, yu save raetemdaon sam risen blong lego skul, we oli stanap long samting we yu nomo yu wantem.
․․․․․
?Wanem sam risen we yu raetemdaon se oli stret? Maet yu wantem wok blong givhan long famle blong yu no maet yu wantem givhan long ol man blong oli save God. ?Wanem sam risen we oli stanap long samting we yu nomo yu wantem? Maet yu no wantem mekem ol eksam mo ol homwok. Naoia i gud yu tingbaot se, ?wanem stamba risen we i mekem se yu wantem lego skul? ?Hem i wan gudfala risen no i wan risen we i stanap long samting we yu nomo yu wantem?
Plis yu lukluk bakegen ol samting we yu raetem antap, mo putum wan namba klosap long olgeta, stat long 1 i go kasem 5 (1 i min se i no wan bigfala samting long tingting blong yu, mo 5 hem i stamba risen). Yu mas tru taem yu makem olgeta ya. Sipos yu wantem lego skul from we yu wantem ronwe long ol problem nomo, ating bambae yu sapraes bigwan se yu yu kasem plante moa problem.
?From Wanem i Nogud Blong Lego Skul?
Sipos yu lego skul, i olsem se yu jam aot long bas no tren bifo we yu kasem ples we yu wantem go long hem. I tru, maet yu harem nogud long bas no tren ya, mo ol narafala pasenja oli no kaen long yu. Be sipos yu jam aot long hem taem i stap ron yet, bambae yu no kasem ples we yu wantem go long hem, mo ating bambae yu kasem bigfala kil. Long sem fasin, sipos yu lego skul, maet bambae yu no kasem ol mak we yu wantem kasem long edukesen, mo ating samting ya bambae i mekem problem long yu naoia mo biaen tu. Yu save kasem ol problem olsem:
Ol problem naoia Ating bambae i had moa long yu blong faenem wan wok. Mo sipos yu faenem wan wok, ating bambae pei blong hem i daon moa long wok we yu save kasem sipos yu finisim gud skul blong yu. Ale blong kasem mane we i naf blong pem ol samting we yu nidim, bambae yu mas wok plante moa aoa. Mo ating fasin blong ol man long wok bambae i nogud moa bitim fasin blong ol pikinini long skul.
Ol problem we bambae yu kasem biaen Ol stadi we ol man oli mekem, oli soemaot se plante studen we oli no finisim skul blong olgeta, oli no gat gudfala helt, oli gat pikinini taem oli yangfala tumas, oli go long kalabus, mo oli dipen long gavman mo long ol narafala man blong givim mane long olgeta.
I tru se, sipos yu finisim gud skul blong yu, hemia i no min se bambae yu no kasem ol problem ya. Be sipos yu finisim gud skul blong yu, bambae yu gat moa janis blong winim ol problem ya i bitim taem we yu lego skul.
Ol Gudfala Samting We Yu Save Kasem Sipos Yu No Lego Skul
I tru, maet tingting blong yu i foldaon sipos mak blong yu i nogud long wan eksam no yu gat wan hadtaem long skul. Maet yu harem se yu wantem lego skul nomo. Mo maet yu ting se ol problem we bambae yu kasem sipos yu lego skul oli smol nomo taem yu tingbaot laef blong yu naoia. Maet i luk olsem se i isi moa blong lego skul i bitim we yu finisim skul blong yu. Be bifo we yu mekem wan desisen olsem, i gud yu tingbaot ol tok we ol studen long stat blong stori ya, oli talem. Oli tokbaot ol gudfala samting we oli kasem taem oli no lego skul.
● “Mi mi lanem blong stanap strong longtaem, mo blong gat strong tingting. Mo mi lanem tu se sipos yu wantem harem gud taem yu mekem wan samting, yu mas gat gudfala tingting long samting ya. From we mi no lego skul, mi lanem wan samting we i save givhan long mi blong faenem wok taem mi finisim skul.”—Rachel.
● “Naoia mi save se sipos mi wok had, bambae mi save kasem ol mak we mi putum. Mi mekem wan kos long sekendri skul, blong kasem trening we bambae i givhan long mi blong kasem wok blong fiksimap ol masin blong printim ol buk.”—John.
● “Skul i givhan long mi blong kam gud moa long fasin blong mi blong winim ol problem, nating se hemia ol problem long klas no long narafala ples. Mi kam bigman moa long tingting blong mi from we mi lanem rod blong winim ol problem long skul, ol problem wetem ol narafala, mo plante narafala problem long laef.”—Cindy.
● “Skul i givhan long mi blong rere from ol problem we bambae mi kasem taem mi statem wok. Mo tu, plante samting we i hapen long skul i mekem se mi tingting gud long bilif blong mi. Yes skul i mekem se bilif blong mi long Baebol i kam strong moa.”—Rose.
Waes man ya King Solomon i talem se: “Taem man i statem wan wok, hem i save glad long hem, be taem hem i finisim, bambae i save harem gud moa. Mo man we i gat longfala tingting, hem i moa gud, i winim man we i stap flas.” (Prija 7:8) Taswe bitim we yu lego skul, i moa gud yu gat longfala tingting blong winim ol problem we yu kasem long skul. Sipos yu mekem olsem, bambae yu luk se biaen yu harem gud tumas.
SAM SAMTING BLONG TINGBAOT
● ?Sipos yu putum ol mak long saed blong edukesen we oli no tekem longtaem blong kasem, samting ya i save givhan long yu olsem wanem blong yusum gud taem blong yu long skul?
● ?From wanem yu mas tingting long wanem wok we yu wantem mekem taem bambae yu finisim skul blong yu?
[Bokis/Tok blong pija long pej 23]
SAMTING WE OL NARAFALA YANGFALA OLI TALEM
“Mi laekem tumas blong ridim ol buk, hemia wan samting we mi lanem taem mi stap long skul. Taem mi rid, mi laekem blong kasem save long tingting blong narafala, mo blong save se hem i harem olsem wanem.”
“Problem blong mi se mi no yusum gud taem blong mi. !Sipos mi no skul, ating problem ya bambae i mowas! Skul i givhan long mi blong folem wan program, blong mi save ol samting we mi mas mekem evri wik, mo blong mi mekem ol samting we oli impoten.”
[Ol foto]
Esme
Christopher
[Bokis blong pija long pej 24]
OL MAK WE MI WANTEM KASEM LONG SAED BLONG EDUKESEN
Wan stamba samting we edukesen i mekem, hemia se i rerem yu blong faenem wan wok we bambae i givhan long yu blong kasem ol samting we yu nidim. Biaen taem yu gat wan famle, bambae yu naf blong lukaot long olgeta tu. (2 Tesalonaeka 3:10, 12) ?Olsem wanem? ?Yu yu tingbaot finis wanem wok we yu wantem mekem? ?Olsem wanem yu save yusum taem blong yu long skul, blong givhan long yu blong rere from wok ya? Blong luksave sipos edukesen i stap lidim yu long stret rod, i gud yu ansa long ol kwestin ya:
?Wanem ol samting we mi mi gat gudhan long olgeta? (?Maet yu yu wok gud wetem ol narafala man? ?Maet yu yu gat gudhan blong wokem samting, no fiksimap samting? ?Maet yu yu gat gudhan blong luksave ol problem mo faenem rod blong winim olgeta?)
․․․․․
?Wanem sam wok we mi save mekem, we oli givim janis long mi blong yusum gudhan we mi gat?
․․․․․
?Long ples blong mi, i gat wanem wok we mi save mekem?
․․․․․
?Wanem ol klas we mi mekem naoia, we oli rerem mi blong faenem wan wok?
․․․․․
?Wanem kos we mi save mekem naoia we bambae i mekem i isi moa long mi blong kasem ol mak blong mi?
I gud yu tingbaot se, mak blong yu hemia blong lanem ol samting we oli save givhan long yu taem yu finisim skul blong yu. Taswe, bambae i no stret sipos yu gat tingting blong mekem plante plante kos from we yu no wantem wok. Hemia i olsem se yu stap ronron nomo long bas no tren, yu no moa godaon long hem.
[Bokis blong pija long pej 25]
ADVAES I GO LONG OL PAPA MAMA
“!Mi mi les long ol tija blong mi!” “!Ol tija oli givim tumas homwok long mi!” “I hadwok long mi blong kasem mak blong winim ol eksam blong mi, mi no save from wanem mi traehad.” Sam yangfala oli harem nogud from ol samting olsemia, nao oli wantem lego skul bifo we oli lanem ol samting we oli mas save long hem blong faenem wan wok. Sipos yu yu gat wan yangfala boe no gel we i wantem lego skul, ?yu yu save mekem wanem blong givhan long hem?
I gud yu jekem prapa tingting blong yu long saed blong edukesen. ?Taem yu yu yangfala, yu gat tingting se yu stap westem taem nomo long skul? ?Yu yu ting se skul i olsem wan kalabus we yu mas stap long hem gogo kasem taem we yu save mekem sam samting we yu yu wantem? Sipos yes, maet tingting blong yu i save gat paoa long tingting blong pikinini blong yu. Yu mas tingbaot se, wan gudfala edukesen i save givhan long hem blong kasem ‘waes mo fasin ya blong luksave mining blong ol samting we oli had.’ Hemia ol fasin we hem i mas lanem, blong hem i save karem gudfala frut long laef blong hem taem hem i kam bigman.—Ol Proveb 3:21.
Yu save givim ol samting we hem i nidim. Sam yangfala oli no kasem ol gudfala mak from we oli no save olsem wanem blong stadi no oli no gat wan kwaet ples mo ol samting we oli nidim blong stadi. Wan gudfala ples blong stadi, hemia wan tebol we i no gat tumas samting long hem mo we i gat gudfala laet i saen long hem. Mo i gud blong gat ol buk mo samting olsem blong lukaot moa save. Taem yu trenem gud pikinini blong yu mo yu mekem wan ples we i stret blong hem i save tingting gud long ol niufala save we hem i lanem, samting ya i givhan long hem blong gohed gud long saed blong skul mo long saed blong wok blong God.—1 Timoti 4:15.
Yu mas traem kasem save mo givhan. I gud yu tingbaot se ol tija mo man blong givim advaes long skul oli no ol enemi blong yu, be oli stap long saed blong yu. I gud yu save olgeta mo nem blong olgeta. Yu save toktok wetem olgeta long saed blong ol mak we pikinini blong yu i wantem kasem mo long ol samting we oli had long hem. Sipos pikinini blong yu i no kasem ol gudfala mak long skul, yu mas traem faenemaot from wanem i olsem. ?Hem i fraet se sipos hem i gohed gud long skul bambae ol narafala yangfala oli jikim mo kilim hem? ?Hem i gat wan problem wetem wan tija blong hem? ?Olsem wanem long ol klas we hem i mekem? I gud we hem i luk se ol wok i had lelebet long hem be i nogud sipos i had tumas, nao hem i harem nogud from. Maet wan samting long bodi blong hem i mekem trabol long hem, olsem maet hem i no save lukluk gud no hem i gat problem blong lanem samting.
Sipos yu traem kasem save long trening we pikinini blong yu i stap kasem, mo yu givhan long hem blong i gohed gud long saed blong skul mo long saed blong bilif, bambae hem i gat janis blong karem gudfala frut long laef blong hem.—Ol Proveb 22:6.
[Tok blong pija long pej 25]
Sipos yu lego skul, i olsem se yu jam aot long tren bifo we yu kasem ples we yu wantem go long hem