?From Wanem Ol Jos Oli No Mekem Ol Man Oli Joen Gud?
SIPOS yumi talem se ol jos oli stamba blong olgeta trabol mo faet, i olsem we yumi stap talem se sipos ol jos oli finis, bambae i no gat plante tumas faet. ?Olsem wanem? ?Tingting ya i stret? ?Sipos yumi aotem ol jos, bambae yumi finisim ol faet tu? Nomata wanem ansa blong yu long ol kwestin ya, i gat wan samting we yumi makem gud, hemia se ol jos oli no mekem ol man oli joen gud. I gud yumi tingbaot sam risen from wanem i olsem.
Jos i Mekem Ol Man Oli Seraot
Ol man oli seseraot long ol defren jos, mo plante bigfala jos we oli holem paoa, oli stap raorao oltaem. ?Olsem wanem? ?I gat wan samting we i soemaot se wan dei, ol Budis, ol man Hindu, ol Jiu, ol Kristin, mo ol Muslim bambae oli stap tugeta long pis?
Yumi sore blong luk tu, se insaed long ol bigfala jos, ol man oli seseraot long ol defdefren grup. Olsem nao, wan ripot i soemaot se ol jos we oli talem se oli Kristin, oli seseraot long ol smosmol grup gogo namba blong ol grup ya i kasem bitim 30,000. Ol man long jos blong Muslim tu, oli gat defdefren tingting long saed blong bilif blong olgeta, ale oli seraot. Wan niuspepa blong Medel Is i tokbaot se i no longtaem i pas, wan man Muslim we nem blong hem Mohsen Hojjat mo we i wan man blong hae save, i luksave se “stamba blong ol problem we oli stap kamaot long ol Muslim kantri, hemia se ol Muslim oli no joen long wan tingting nomo.” Plante narafala bigfala jos tu, olsem Budis, Hindu, mo jos blong ol man Jiu, oli seraot long ol smosmol grup.
Ol Jos Oli Joen Long Politik
I luk olsem se ol jos oli gat paoa long evri haf blong laef blong ol man. Wan niuspepa (The Economist) i talem se “ol man blong jos oli stap mekem plante moa toktok long saed blong evri samting, mo long saed blong bisnes tu. Mo ol jos oli go insaed tu long ekonomi blong ol kantri.” Long rod ya, oli no mekem se ol man oli joen gud, be oli mekem se oli seraot moa. Be samting we i mowas, hemia taem oli joen long politik, olsem we oli stap mekem longtaem finis i kam.
Wan ripot we yumi tokbaot finis, we i kamaot long wan niuspepa i no longtaem i pas, i tokbaot wan grup blong ol man blong raetem histri. Ol man ya oli talem se “jos i save kam stamba blong faet taem hem i wok wetem gavman mo i joen long ol bisnes blong gavman.” Hemia i soemaot wan samting we i tru tumas: Stat bifo kam kasem tede, ol jos oli joen plante long politik mo ol ami.
Ol Defdefren Tingting We Oli Miksap Wanples, Oli Mekem Trabol
Long plante ples, ol man blong wan kantri no kala, oli go long wan bigfala jos, mo ol man blong narafala kantri no kala, oli go long wan narafala bigfala jos. From samting ya, ol man oli no luksave se fasin blong no laekem narafala i kamaot from kantri blong hem, kala blong hem, laen blong hem, no skul blong hem. Ol defdefren tingting ya we oli miksap wanples, oli save mekem bigfala trabol we i seraotem wol blong yumi.
Samting we i narakaen mo we i mekem tingting blong yumi i fasfas, hemia se bighaf blong ol jos ya oli talem se oli wok long nem blong God ya we i mekem yumi, mo we Baebol i tokbaot. ?Olsem wanem? ?I stret blong talem se God ya we i mekem yumi, we hem i hae olgeta, mo we i stamba blong waes mo lav, i stap wetem ol jos ya we oli seseraot tumas, mo we oli kilim plante man i ded long ol faet?
[Tok blong pija long pej 6]
Plante taosen Witnes blong Jehova oli go kalabus from we oli no wantem joen long faet