Ol Fis Oli Swim Long Grup

Evri yia, bitim wan milian man oli ded long ol aksiden long trak, mo samwe long 50 milian man oli kasem kil. Be plante milian fis oli save swim long grup, mo oli no kasem aksiden mo kil. ?Ol fis oli mekem samting ya olsem wanem? ?Oli save tijim yumi long sam samting, blong yumi no moa gat plante aksiden long trak?

Tingbaot: Ol fis oli save wanem samting i stap raonabaot long olgeta, taem oli lukluk ol samting ya, mo taem oli haremsave se wan samting i stap muvmuv klosap long olgeta. Long saedsaed blong ol fis, i gat wan laen blong ol smosmol samting, i stat long hed i go kasem tel blong olgeta. Ol smosmol samting ya oli kasem signal we i mekem ol fis oli haremsave se wan samting i muvmuv klosap long olgeta. Nao oli save se i gat ol narafala fis oli stap swim raonabaot long olgeta. Ale oli mekem trifala samting ya:

1. Oli swim i go wetem ol narafala fis. Oli swim long sem spid olsem ol fis we oli stap long saed blong olgeta. Oli no kam klosap moa long olgeta mo oli no gowe moa long olgeta.

2. Oli go klosap moa. Oli go klosap moa long ol fis we oli stap longwe long olgeta.

3. Oli blokem aksiden. Oli jenisim rod blong olgeta blong oli no bangem ol narafala fis.

Long Japan, ol man blong wokem ol trak, oli traem folem trifala fasin ya blong ol fis. Oli wokem ol smosmol trak we oli olsem robot. Ol trak ya oli save ron long grup be oli no bangbangem olgeta. Ol robot trak ya oli no gat ae blong lukluk ol narafala trak, be i gat wan smol masin long olgeta we i mekem se oli save toktok long ol narafala trak. Oli no gat wan laen long saed blong olgeta, be i gat wan masin long olgeta we i talem se narafala trak i stap longwe olsem wanem. Ol man we oli wokem ol robot ya oli ting se bambae oli givhan long ol man blong oli wokem “ol trak we oli no save aksiden.” Mo tu, “ol trak ya bambae oli no putum doti long win, mo bambae oli no fasfas long rod.”

Bos blong ol man we oli wokem ol robot ya, i talem se: “Mifala i yusum ol niufala save we man i gat, blong traem folem fasin blong ol fis we oli swim long grup.” Hem i gohed i se: “Mifala ol man blong wokem ol trak, mifala i gat plante samting yet blong lanem from ol fis we oli swim long grup.”

?Wanem tingting blong yu? ?Fasin ya we ol fis oli swim long grup, i kamaot olsem nomo? ?Yu ting se i gat wan Man we i putum fasin ya long olgeta?