?Olsem Wanem Blong Storian Wetem Yangfala Blong Yu?

SAMTING WE I HAD

Taem pikinini blong yu i smol, hem i talemaot evri samting long yu. Be taem hem i kam yangfala, hem i no moa talem wan samting. Taem yu traem pulum hem blong i storian, hem i no wantem toktok, no maet hem i mekem we storian ya i kam wan bigfala rao.

Yu save lanem blong storian wetem yangfala blong yu. Be fastaem, i gud yu tingbaot tu samting we oli mekem se i no isi blong storian wetem hem.

?FROM WANEM SAMTING YA I HAPEN?

Hem i wantem kam fri moa. Wan yangfala i lanem sloslo blong kam wan bigman we i naf blong winim ol trabol blong laef. Yu traem tingbaot se pikinini blong yu i lanem blong draevem trak. Fastaem hem i sidaon klosap long man we i draevem trak, ale sloslo, taem hem i langud, hem nao i sidaon long jea blong draeva. Sam yangfala oli wantem se papa mo mama blong olgeta oli letem olgeta oli mekem evri samting we oli wantem. Mo i gat sam papa mo mama we oli blokem tumas ol yangfala blong olgeta. Samting ya i save mekem se rao i kamaot, ale papa mama mo yangfala oli harem nogud. Brad,a we i gat 16 yia blong hem, i komplen se: “Papa mo mama blong mi tufala i traem blong kontrolem evri samting long laef blong mi. !Sipos tufala i stap blokem mi olsem kasem we mi gat 18 yia, bambae mi aot long haos ya!”

Hem i stat blong yusum tingting blong hem. Ol smol pikinini oli tingbaot nomo se wan samting i gud no i nogud. Be ol yangfala oli no olsem. Oli save tingting moa long wan samting, mo oli save gat prapa tingting blong olgeta long hem. Fasin blong tingting olsem i impoten, mo i givhan long yangfala blong i yusum moa tingting blong hem. Yu traem tingbaot: Long tingting blong wan pikinini, fasin blong mekem i stret long narafala, hemia taem mama i brekem wan bisket, mo i givim haf long hem mo haf long brata blong hem. Yes, long tingting blong hem, hem i ting se olgeta man i mas kasem samting we i sem mak nomo. Be long tingting blong ol yangfala i no olsem. Tru ya, taem man i wantem mekem i stret long narafala man, hemia i no min se hem i mas mekem sem mak long olgeta man. Mo fasin we man i mekem long narafala olsem we hem i bin mekem long wan narafala man, i no oltaem we fasin ya i gud. Taswe, taem yangfala blong yu i stat blong yusum tingting blong hem, mo i kasem save olsem wanem blong stretem wan problem no blong talemaot tingting blong hem, i isi nomo blong hem i no agri long samting we yu talem. ?Ale, wanem nogud samting i save kamaot from? Hem i save rao wetem yu.

SAMTING WE YU SAVE MEKEM

Sipos i gat rod, yu storian wetem hem. Sipos yufala i joen wanples blong mekem sam samting, yu mas yusum janis ya blong storian wetem yangfala blong yu. Sam papa mama, oli luk se taem yangfala blong olgeta i stap long saed blong olgeta mo oli mekem wan wok, yangfala i glad moa blong storian. Sam narafala oli luk se yangfala i glad blong storian taem hem i sidaon long fored wetem olgeta long trak.—Rul blong Baebol: Dutronome 6:6, 7.

Yu no toktok tumas. I no nid blong yu agiu wetem yangfala blong yu from evri smosmol samting gogo kasem we yu win. I moa gud yu talemaot tingting blong yu mo afta, yu stap kwaet. Taem hem i stap hem wan mo i stap tingtingbak long toktok blong yu, long taem ya nao bambae hem i “harem” bighaf blong ol samting we yu talem long hem. Yu mas givim janis long hem blong i mekem olsem.—Rul blong Baebol: Ol Proveb 1:1-4.

Yu lesin mo yu mas rere blong jenisim tingting blong yu. Yu lesin gud long yangfala blong yu, mo yu no katem tok blong hem. Olsem nao yu save kasem save long problem blong hem. Yu mas tingting gud taem yu stap ansa long hem. Sipos yu fosem hem blong hem i folem rul we yu stanemap, bambae hem i lukaot rod blong brekem rul ya. Wan buk (Staying Connected to Your Teenager) i givim woning ya se: “Long taem ya nao pikinini bambae i gat dabol laef. Faswan se bambae hem i tokbaot nomo ol samting we papa mo mama blong hem tufala i wantem harem. Mo narawan se bambae hem i mekem samting we hem nomo i wantem, taem papa mo mama blong hem tufala i no stap.”—Rul blong Baebol: Filipae 4:5.

Yu mekem tingting blong yu i kwaet. Wan yangfala gel we nem blong hem Kati, i talem se: “Taem mi mo mama i storian mo mitufala i no agri long wan samting, mama i kam kros long evri samting we mi talem, from we hem i ting se mi stap agensem hem. Samting ya i mekem mi tu mi kros, ale storian ya bambae i kam wan bigfala rao.” Taswe, yu no mas kros kwik from samting we yangfala blong yu i talem. I moagud yu talem wan samting we i soemaot se yu kasem save long filing blong hem. I gud we yu talem long hem se: “Mi luk se samting ya i mekem yu yu harem nogud.” Be yu no talem se: “!I no nid blong yu wari long samting ya!”—Rul blong Baebol: Ol Proveb 10:19.

Yu no talem wanem we hem i mas mekem, be yu traem blong lidim hem. Taem yangfala i stat blong yusum tingting blong hem, hemia i olsem wan man we i stap eksasaes blong mekem ol masel blong hem oli kam strong. Taswe, taem yangfala i kasem wan problem we hem i no moa save wanem blong mekem, yu no mas mekem “eksasaes” long ples blong hem. Taem yutufala i tokbaot problem ya, i gud yu givim janis long hem blong i faenem wan rod blong stretem problem ya. Afta we yutufala i tokbaot ol defdefren rod finis, yu save talem long hem se: “Hemia sam rod we yu save folem blong stretem problem ya. Yu tingting long olgeta fastaem blong wan no tu dei, mo biaen, bambae yumitu storian bakegen blong luk weswan long ol rod ya we yu yu laekem moa, mo from wanem yu laekem.”—Rul blong Baebol: Hibrus 5:14.