?I GAT WAN MAN WE I WOKEM SAMTING YA?
Samting We i Blokemgud Silva Anis Blong Sahara
Silva anis blong Sahara (Cataglyphis bombycina) hem i wan long ol anamol we strong san i no save kilim hem i ded. Long ples ya Sahara, taem san i strong long medel dei, ol anamol oli go lukaot ples blong haed, be hemia stret taem we anis ya i kamaot long hol blong hem blong go lukaotem kakae. Ol kakae blong hem, hemia ol narafala anamol we strong san i kilim olgeta i ded.
[50] μm
Tingbaot: Silva anis i gat spesel hea we i kavremap baksaed blong hem go kasem saedsaed blong hem. Mo aninit long bodi blong hem i no gat hea. Ol hea blong hem oli blokemgud hem blong hot blong san i no kilim hem i ded. Ol hea ya (1, 2), oli mekem anis ya i saen olsem silva. Mo tu, oli smosmol, oli tintin mo i luk olsem se oli gat trikona (3). Long trikona ya, tufala saed blong hem oli raf, be saed we i stap daon, i smut. Tufala samting ya oli mekem tu wok. Faswan, i blokem hot blong san taem i kasem hem. Sekenwan, i givhan blong karemaot hot long bodi blong hem. Mo bodi blong hem aninit we i no gat hea, i blokem strong hit we i stap long graon.a
[10] μm
Hea blong silva anis blong Sahara i halpem bodi blong hem blong i no kam hot tumas. Spesel anis ya i pulum ol man blong stadi, blong oli wokem sam spesel samting blong pentem haos mo mekem i stap kolkol. Nao oli no nidim fan o narafala masin blong mekem ples i stap kol.
?Wanem Tingting Blong Yu? ?Samting we i blokemgud silva anis blong Sahara, i kamaot olsem nomo, no i gat wan Man i wokem?
a Sam moa narafala samting we i spesel long anis ya, hemia ol spesel protin we i stap long bodi blong hem, we strong san i no save spolem. Mo ol longlongfala leg blong hem i mekem se bodi blong hem i no save kasem graon we i hot, mo i save ron spid. Mo tu, hem i naf blong luksave kwiktaem rod we hem i mas folem blong gobak long hol blong hem.